សេដ្ឋកិច្ច

កម្ពុជានាំចេញគ្រាប់ស្វាយចន្ទី កើនជាង ៣០% ក្នុងទឹកប្រាក់ ៨៥១ លានដុល្លារនៅ ៥ ខែឆ្នាំនេះ

បានផុស

៤ ខែ មុន

នៅ

ថ្ងៃអាទិត្យ ២ មិថុនា ២០២៤

ដោយ

នៅក្នុងរយៈពេល៥ខែឆ្នាំ២០២៤ កម្ពុជាផលិតគ្រាប់ស្វាយចន្ទីឆៅសម្រេចបាន ៧១ ម៉ឺន ៦ ពាន់តោន ក្នុងនោះនាំចេញទៅប្រទេសវៀតណាមចំនួន ៦៦ ម៉ឺន ៧ ពាន់តោន កើនឡើងជាង ៣០ ភាគរយ បើប្រៀបធៀបរយៈពេលដូចគ្នាកាលពីឆ្នាំមុន ដែលគិតជាទឹកប្រាក់ចំនួន ៨៥១ លានដុល្លារ។ នេះបើតាមរបាយការណ៍របស់សមាគមស្វាយចន្ទីកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងនៅថ្ងៃទី ០២ ខែមិថុនា ឆ្នាំ ២០២៤នេះថា បាតុភូតអេលនីណូ បានធ្វើឱ្យទិន្នផលស្វាយចន្ទីធ្លាក់ចុះ ប៉ុន្តែសមាគមបានប្រកាសឱ្យសមាជិកត្រៀមខ្លួន និងប្រាប់ដំណោះស្រាយតាំងពីខែកញ្ញា ឆ្នាំមុន ក្នុងនោះសមាជិករបស់សមាគមប្រមាណ ៦០ ភាគរយ បានអនុវត្តតាម ដែលធ្វើឱ្យពួកគាត់រួចផុតពីឥទ្ធិពលអេលនីណូ នឹងនាំឱ្យពួកគាត់កើនទិន្នផល។

ម្យ៉ាងទៀត សមាគមក៏បានណែនាំឱ្យសមាជិករបស់ខ្លួនផ្អាកការលក់កាលពីខែកុម្ភៈ និងខែមីនា កន្លងមកនេះ ទើបធ្វើឱ្យតម្លៃគ្រាប់ស្វាយចន្ទីនៅលើចរន្តទីផ្សារបានហក់ឡើង។

លោក អួន ស៊ីឡុត បញ្ជាក់ថា នៅទ្វីបអាហ្វ្រិកក៏បានជួបបញ្ហាអាកាសធាតុ ដែលធ្វើឱ្យទិន្នផលស្វាយចន្ទីថយចុះដែរ ម្យ៉ាងទៀត ប្រទេសកូឌីវ័រ ដែលជាប្រទេសផលិតស្វាយចន្ទីជាប់លេខ១លើពិភពលោកបានផ្អាកការនាំចេញគ្រាប់ស្វាយចន្ទីបណ្ដោះអាសន្នដើម្បីផ្គត់ផ្គង់រោងចក្រកែច្នៃក្នុងស្រុក ទើបធ្វើឱ្យតម្លៃស្វាយចន្ទីហក់ឡើង។

បើតាមប្រធានសមាគមរូបនេះ បច្ចុប្បន្នតម្លៃគ្រាប់ស្វាយចន្ទីស្ងួត ជាមធ្យម អាចលក់បាន ១ ៧៣០ ដុល្លារក្នុងមួយតោន។

នៅឆ្នាំ ២០២៣ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារអន្តជាតិចំនួន ៦៥ ម៉ឺន ៦ ពាន់តោន ថយចុះ ៧.៦% គិតជាទឹកប្រាក់ចំនួន ៨៣៧ លានដុល្លារ បើប្រៀបធៀបឆ្នាំ ២០២២។ នេះបើតាមរបាយការណ៍សមាគមស្វាយចន្ទីកម្ពុជា៕