កម្ពុជាទទួលបានចំណូលជាង ២២ លានដុល្លារ ពីការលក់សំបុត្រចូលទស្សនាអង្គរ​នៅ ៥ ខែ ឆ្នាំនេះ

ភ្ញៀវទេសចរបរទេសជាង ៤៧ ម៉ឺននាក់ ​បានទិញសំបុត្រចូលទស្សនារមណីយដ្ឋានអង្គរ​នារយៈ​ពេល ៥ ខែ ឆ្នាំ ២០២៤ ​ដែលជួយឱ្យគ្រឹះស្ថានអង្គររក​ចំណូលបាន​ជាង ​២២ លានដុល្លារ កើនឡើង ៣៧ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២៣។

យោង​តាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃទី ០១ ខែមិថុនា ឆ្នាំ ២០២៤ ​បង្ហាញ​ថា ​ចាប់ពីខែមករា-ខែឧសភា ឆ្នាំ ២០២៤ ​មានភ្ញៀវទេសចរបរទេសចំនួន ៤៧២ ២៥៨ នាក់ បាន​ទិញ​សំ​​បុត្រ​ចូល​ទស្សនា​រមណីយដ្ឋាន​អង្គរ កើនឡើង ៣៧ ភាគរយបើធៀបឆ្នាំ ២០២៣ ខណៈថវិកា​ដែលប្រមូលបានពីការលក់សំបុត្រសរុប ២២ ២០៦ ៨៩១ ដុល្លារ កើនឡើងជាង ៣៨ ភាគរយ។

ត្រឹតែនៅក្នុងខែឧសភានេះ ទេសចរបរទេសចំនួន ៥០ ៨៧៩ នាក់ បានទិញសំបុត្រចូលទស្សនាគ្រឹះស្ថានអង្ករ ​ដែលរកចំណូលបាន ២,២៩ លានដុល្លារ កើនឡើង ១២ ភាគរយ ប្រៀបធៀបនឹងខែមុន។

លោក ខៀវ ធី ប្រធាន​សមាគម​មគ្គុទ្ទេសក៍​ទេសចរណ៍​អង្គរ ប្រាប់កម្ពុជាថ្មីថា ​ចំនួនភ្ញៀវទេស​ចរ​បានកើនឡើងវិញ​ចាប់តាំងពីខែមករា ​ដើមឆ្នាំនេះ ​ដោយសារ​ទេសចរនៅអឺរ៉ុប​ចូលចិត្តដើរលេងអំឡុងពេល​ដំណាច់ឆ្នាំ ខណៈ​អាកាសធាតុនៅទីនោះ​ត្រជាក់​ ម្យ៉ាងទៀត​ទេសចរ​ជ្រើសរើសប្រទេសដែលមានសុវត្ថិភាព និងប្រទេសដែលមានវប្បធម៌ សេវាកម្មល្អ ចំណី​អា​ហារឆ្ងាញ់ ប្រជាជនរាក់ទាក់។

យោងតាមក្រសួងទេសចរណ៍នៅក្នុងត្រីមាសទី០១ ឆ្នាំ ២០២៤ កម្ពុជាទទួលបានទេសចរជាង ១,៥៨ លាននាក់ កើនឡើង ២២ ភាគរយ បើធៀបរយៈពេលដូចគ្នា កាលពីឆ្នាំមុន។

នៅក្នុងឆ្នាំ ២០២៣ កម្ពុជា​ទទួលបាន​ភ្ញៀវទេសចរ​បរទេសចំនួន ៥,៤៥​ លាននាក់ ចំណែក​ថវិកា​ដែល​រកបាន​ពី​វិស័យ​ទេសចរណ៍​បរទេស​​ប្រមាណ ៣,០៤​ ពាន់​លាន​ដុល្លារ។ នេះបើយោងតាមក្រសួងទេសចរណ៍៕

អត្ថបទ៖ ឡេង ដេត