ក្រុមហ៊ុន Aeroprime ​នឹងក្លាយជាអ្នកផ្តល់សេវា​ដឹកជញ្ជូនទំនិញផ្តាច់មុខរបស់​ Cambodia Angkor Air ប្រចាំនៅ​ប្រទេសឥណ្ឌា

ក្រុមហ៊ុនអាកាសចរណ៍ Cambodia Angkor Air ដែលជាក្រុមហ៊ុន​ជាតិរបស់កម្ពុជា បានប្រកាសសហការជាមួយក្រុមហ៊ុន Aeroprime Group ជាភ្នាក់ងារលក់ និងសេវាកម្មដឹកជញ្ជូនទំនិញផ្តាច់មុខរបស់ខ្លួន (GSSA) ​ប្រចាំនៅ​ប្រទេសឥណ្ឌា ខណៈដែលខ្លួនគ្រោងនឹង​បើកការហោះហើរ​ត្រង់​ពីភ្នំពេញទៅកាន់ក្រុងញូវដេលីនៅថ្ងៃទី១៦ខែមិថុនានេះ។

យោងតាមសេចក្តីប្រកាសព័ត៌មានរបស់ក្រុមហ៊ុន Aeroprime Group  ការចាត់តាំងថ្មីនេះ គឺជាព្រឹត្តិការណ៍ដ៏សំខាន់មួយសម្រាប់ Aeroprime Group ដោយពង្រឹងជំហររបស់ខ្លួនជាក្រុមហ៊ុនដឹកទំនិញឈានមុខគេ GSSA នៅក្នុងឧស្សាហកម្មអាកាសចរណ៍ឥណ្ឌា។ លើសពីនេះ វាបង្ហាញពីការយកចិត្តទុកដាក់របស់ Aeroprime ក្នុងការផ្តល់នូវដំណោះស្រាយផ្នែកលក់ និងសេវាកម្មលំដាប់កំពូលដល់ក្រុមហ៊ុនអាកាសចរណ៍ទូទាំងពិភពលោក បង្កើនជំហ៊រដ៏គួរឱ្យគោរព​ និងពង្រឹងកេរ្តិ៍ឈ្មោះរបស់ខ្លួនសម្រាប់ឧត្តមភាពក្នុងវិស័យដឹកទំនិញតាមផ្លូវ​អាកាស។

លោក Abhishek Goyal នាយកប្រតិបត្តិក្រុមហ៊ុន Aeroprime Group មានប្រសាសន៍ថា៖« ភាពជាដៃគូជាមួយក្រុមហ៊ុន Cambodia Angkor Air គឺជាជំហានដ៏សំខាន់ឆ្ពោះទៅរកចក្ខុវិស័យយុទ្ធសាស្ត្ររបស់យើងក្នុងការផ្តល់ជូននូវផលិតផលចម្រុះ និងទូលំទូលាយដែលផ្តល់សេវាកម្មដល់ដៃគូ និងអតិថិជនរបស់យើង។ យើងប្តេជ្ញាគាំទ្រក្រុមហ៊ុន Cambodia Angkor Air ក្នុងដំណើររីកចម្រើនរបស់ពួកគេដើម្បីសម្រេចតាម​ផែនការពង្រីកខ្លួនរបស់ក្រុមហ៊ុន និងបង្កើនការលក់នៅក្នុងទីផ្សារឥណ្ឌា»។

លោក ស៊ិន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យ​អាកាសចរណ៍ស៊ីវិល​បានថ្លែងប្រាប់កម្ពុជាថ្មីកន្លងមកថា ​ក្រុមហ៊ុន​ ​Cambodia Angkor Air ​បានត្រៀមខ្លួនរួចស្រេចក្នុងការបើកជើងហោះហើររបស់ខ្លួនទៅកាន់ប្រទេសឥណ្ឌា​ចាប់ពីថ្ងៃទី១៦ ខែមិថុនា ឆ្នាំ២០២៤នេះ។ លោកថា ជាមួយគ្នានេះដែរក្រុមហ៊ុនអាកាសចរណ៍ឥណ្ឌា IndiGo ក៏ទទួលបាន​អនុញ្ញាតពីប្រទេសទាំងពីរក្នុងការឱ្យបើកជើងត្រង់ហើរត្រង់មកកម្ពុជា ចាប់ពីខែតុលា ឆ្នាំ​​២០២៤ខាងមុខនេះផងដែរ។

បើយោងតាមលោក ​ចាន់សិរីវុត្ថា៖« ​ចំពោះក្រុមហ៊ុនអាកាសចរណ៍​​ Cambodia Angkor Air នឹងចាប់ផ្តើមបើកការហោះហើរត្រង់ទៅប្រទេសឥណ្ឌា ដោយធ្វើឡើង៣ជើងក្នុងមួយសប្តាហ៍។ ដូច្នេះនៅថ្ងៃទី១៤ មិថុនា ក្រុមហ៊ុននេះនឹងបើកសម្ពោធជើងហោះហើរដំបូងជាផ្លូវការ នៅប្រទេសឥណ្ឌា ដើម្បី​ផ្សព្វផ្សាយបង្ហាញពីកម្មវិធីហោះហើររបស់ខ្លួនទៅកាន់ប្រជាជនឥណ្ឌា»។

សម្រាប់​របស់ក្រុមហ៊ុនអាកាសចរណ៍ IndiGo លោកបានថ្លែងបញ្ជាក់ថា បើតាមផែនការ ក្រុមហ៊ុននេះ នឹងបើកការហោះហើរត្រង់ពី ទីក្រុង​ញូវដេលី មកសៀមរាប ចាប់ពី​ថ្ងៃទី២៧ ខែតុលា ឆ្នាំ២០២៤ ជាមួយនឹងជើងហោះហើរ៧ជើងក្នុងមួយសប្តាហ៍។ ​យន្តហោះរបស់ក្រុមហ៊ុនអាកាសចរណ៍ Cambodia Angkor Air បានកំពុងហោះហើរទៅកាន់គោលដៅជាង ១១ នៅទូទាំងប្រទេសកម្ពុជា ចិន ឡាវ សិង្ហបុរី និងវៀតណាម។ ចាប់ពីថ្ងៃទី ១៦ ខែមិថុនា ឆ្នាំ ២០២៤ ក្រុមហ៊ុន Cambodia Angkor Airlines នឹងដំណើរការជើងហោះហើរចំនួន ៤ ដងក្នុងមួយសប្តាហ៍ពីទីក្រុងញូវដេលីទៅកាន់រាជធានីភ្នំពេញ (PNH) ដោយប្រើយន្តហោះ A320 ដោយផ្តល់ជូននូវការតភ្ជាប់ដោយផ្ទាល់តែមួយគត់រវាងប្រទេសឥណ្ឌា និងកម្ពុជា ដែលនឹងបើកឱកាសអាជីវកម្មបន្ថែមទៀតសម្រាប់ការដឹកទំនិញផងដែរ៕