សេដ្ឋកិច្ច

ប្រធានាធិបតីឥណ្ឌូណេស៊ី ប្រកាសបំពេញការងារពីរដ្ឋធានីថ្មីចាប់ពីខែកក្កដាទៅ

បានផុស

៩ ខែ មុន

នៅ

ថ្ងៃព្រហស្បតិ៍ ៦ មិថុនា ២០២៤

ដោយ

ប្រធានាធិបតីឥណ្ឌូណេស៊ី លោក ចូកូ វីដូដូ បានប្រកាសកាលពីថ្ងៃពុធថា លោកគ្រោងនឹងចាប់ផ្ដើមធ្វើការងារពីរដ្ឋធានីថ្មីចាប់ពីខែក្រោយទៅ ចំពេលមានការព្រួយបារម្ភពីអនាគតរបស់ទីក្រុងដែលមិនទាន់ប្រសិទ្ធិនាមជាផ្លូវការនេះ ក្រោយប្រធានស្ថាប័នត្រួតពិនិត្យការអភិវឌ្ឍន៍ក្រុងបានលាលែងចេញពីតំណែង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចូកូ បាននិយាយក្នុងសារបង្ហោះលើបណ្ដាញសង្គម Instagram ថា វឌ្ឍនភាពនៃគម្រោងអភិវឌ្ឍន៍ហេដ្ឋារចនាសម្ព័ន្ធមួយចំនួន ក្រោមដំណាក់កាលទី១ នៃរដ្ឋធានីថ្មីឈ្មោះ នូសានតារ៉ា (Nusantara) បានសម្រេចបាន ៨០ ភាគរយហើយ។

ប្រធានាធិបតីជិតផុតអាណត្តិរូបនេះ បានសរសេរយ៉ាងដូច្នេះថា៖ «តាមបំណងហឫទ័យព្រះ នៅខែកក្កដាខ្ញុំនឹងចាប់ផ្តើមធ្វើការពីរដ្ឋធានីថ្មី»។ លោកបន្ថែមថា ការត្រៀមរៀបចំដើម្បីអបអរសាទរទិវាបុណ្យឯករាជ្យជាតិលើកទី ៧៩ របស់ប្រទេសនៅក្នុងរដ្ឋធានីថ្មីនាខែសីហា កំពុងដំណើរការទៅយ៉ាងល្អ។

ការប្រកាសរបស់លោក ចូកូ ធ្វើឡើងក្រោយមន្ត្រីឥណ្ឌូណេស៊ីម្នាក់បានឱ្យដឹងកាលពីថ្ងៃចន្ទថា ប្រមុខស្ថាប័នដែលមើលការខុសត្រូវលើការអភិវឌ្ឍរដ្ឋធានីថ្មី បានលាលែងចេញពីតំណែងដោយមិននឹកស្មានដល់ ដោយបង្កើនក្តីបារម្ភថា វានឹងធ្វើឱ្យរង្គោះរង្គើអារម្មណ៍វិនិយោគិន។

យ៉ាងណាមិញ លោក ចូកូ បានច្រានចោលការព្រួយបារម្ភនេះកាលពីព្រឹកថ្ងៃពុធ នៅពេលរងការចោទសួរថាតើការណ៍នេះធ្វើឱ្យលោកភ័យព្រួយដែរឬយ៉ាងណា ខណៈលោកធ្វើដំណើរទស្សនកិច្ចទៅក្រុង នូសានតារ៉ា ផ្ទាល់ ដើម្បីពិនិត្យមើលវឌ្ឍនភាពនៃការអភិវឌ្ឍ និងចាប់ផ្តើមការសាងសង់អគារបន្ថែមទៀត។

គួរគូសបញ្ជាក់ថា ឥណ្ឌូណេស៊ី មានគម្រោងផ្លាស់ប្តូររដ្ឋធានីរបស់ខ្លួនចេញពីក្រុងហ្សាការតា ដែលមានមនុស្សរស់នៅយ៉ាងច្រើនកកកុញ និងកំពុងប្រឈមហានិភ័យនៃការលិចទឹកសមុទ្រ ទៅកាន់ទីក្រុងនូសានតារ៉ា ដែលត្រូវចំណាយលុយសាងសង់ ៣២ ប៊ីលានដុល្លារក្នុងព្រៃនៃខេត្ត គីលីម៉ាន់តាន់ខាងកើត លើកោះ បរនេអូ។

យ៉ាងណាមិញ ក្រោមច្បាប់បច្ចុប្បន្ន ទីក្រុងហ្សាការតានឹងនៅតែជារដ្ឋធានីរបស់ប្រទេសឥណ្ឌូណេស៊ី រហូតទាល់តែប្រធានាធិបតីចេញក្រឹត្យមួយ ដាក់ឈ្មោះក្រុងនូសានតារ៉ា ទៅជារដ្ឋធានីថ្មីជាផ្លូវការ ដែលរំពឹងថានឹងកើតឡើងនៅឆ្នាំនេះ៕

Related Topics: