សេដ្ឋកិច្ច

កម្ពុជាទទួល អ្នកដំណើរតាមជើងអាកាសជាង ២ លាននាក់ កើនឡើង ២៥%

បានផុស

១០ ខែ មុន

នៅ

ថ្ងៃសុក្រ ៧ មិថុនា ២០២៤

ដោយ

គិតចាប់ពីខែមករា ដល់ខែ មេសា ឆ្នាំ២០២៤ កម្ពុជាទទួលអ្នកធ្វើដំណើរតាមផ្លូវអាកាសជាង ២ លាននាក់ កើនឡើង ២៥% ធៀបនឹងរយៈពេលដូចគ្នានៅឆ្នាំ២០២៣ ដែលមានចំនួនត្រឹមតែជាង ១លាន ៦សែននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ៅ ហាវណ្ណាល់ រដ្ឋមន្ដ្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល មានប្រសាសន៍នៅថ្ងៃទី ០៦ ខែមិថុនា ម្សិលមិញថា នៅក្នុងឆ្នាំ២០២៤នេះ កម្ពុជាមានក្រុមហ៊ុនអាកាសចរណ៍ក្នុងស្រុក និងបរទេសចំនួន៣១ ដែលកំពុងតភ្ជាប់ជើងហោះហើរឡើងវិញពីប្រទេសអាស៊ានទាំង៨ ចិន កូរ៉េខាងត្បូង ហុងកុង កោះតៃវ៉ាន់ រដ្ឋកាតា និងអារ៉ាប់រួមអេមីរ៉េត ហើយចាប់តាំងពីដើមខែឧសភា ឆ្នាំ២០២៤មក ក្រុមហ៊ុន Emirates Airlines បានហោះហើរមកកម្ពុជាឡើងវិញពីទីក្រុង Dubai ដោយឆ្លងកាត់ប្រទេសសិង្ហបុរីជាលក្ខណៈសិទ្ធិហោះហើរទី៥។

ប្រធានសមាគមមគ្គទេសក៍ទេសចរអង្គរ លោក ខៀវ ធី ប្រាប់កម្ពុជាថ្មីនៅថ្ងៃទី ០៧ ខែមិថុនា ២០២៤ នេះថា កំណើនអ្នកធ្វើដំណើរតាមផ្លូវអាកាស ជាសញ្ញាវិជ្ជមានសម្រាប់វិស័យទេសចរនៅកម្ពុជា ដែលលោកអះអាងថា កំណើនទេសចរណ៍ជួយទៅដល់ប្រជាជនក្នុងស្រុក ឱ្យមានការងារធ្វើ រាប់ចាប់តាំងពីអ្នកបើកបរ មគ្គុទេសទេសចរ អ្នកលក់ដូរ សណ្ឋាគារផ្ទះសំណាក់ ហើយក៏បានផលទៅដល់អ្នកដាំដុះ ចិញ្ចឹមសត្វផងដែរ ខណៈរដ្ឋាភិបាលក៏បានពន្ធពីគ្រប់វិស័យទាំងអស់នោះដែរ។

រដ្ឋលេខាធិការដ្ឋានអាកាសចរណ៍ស៊ីវិលបានឱ្យដឹងថា នៅក្នុងឆ្នាំ ២០២៣ កម្ពុជាទទួលអ្នកដំណើរតាមផ្លូវអាកាសទាំងក្នុងស្រុក និងអន្តរជាតិចំនួនជាង ៥ លាន ១ សែននាក់ កើនឡើង ១១៥% ធៀបនឹងរយៈពេល ១២ខែ ឆ្នាំ២០២២ ដែលជាដំណាក់កាលងើបឡើងវិញក្រោយវិបត្តិជំងឺកូវីដ-១៩។

ភ្ញៀវទេសចរបរទេសជាង ៤៧ ម៉ឺននាក់ បានទិញសំបុត្រចូលទស្សនារមណីយដ្ឋានអង្គរនារយៈពេល ៥ ខែ ឆ្នាំ ២០២៤ ដែលជួយឱ្យគ្រឹះស្ថានអង្គររកចំណូលបានជាង ២២ លានដុល្លារ កើនឡើង ៣៧ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២៣។ នេះបើតាមគ្រឹះស្ថានអង្គរ។

ចំណែកឯក្រសួងទេសចរណ៍ក៏បានបង្ហាញដែរថា នៅក្នុងត្រីមាសទី០១ ឆ្នាំ ២០២៤ កម្ពុជាទទួលបានទេសចរជាង ១,៥៨ លាននាក់ កើនឡើង ២២ ភាគរយ បើធៀបរយៈពេលដូចគ្នា កាលពីឆ្នាំមុន។

នៅក្នុងឆ្នាំ ២០២៣ កម្ពុជាទទួលបានភ្ញៀវទេសចរបរទេសចំនួន ៥,៤៥ លាននាក់ ចំណែកថវិកាដែលរកបានពីវិស័យទេសចរណ៍បរទេសប្រមាណ ៣,០៤ ពាន់លានដុល្លារ៕