សេដ្ឋកិច្ច

កម្ពុជានាំចេញផលិតផលវាយនភណ្ឌ សម្រេចបានទឹកប្រាក់ជិត ៥ ពាន់លានដុល្លារ កើនឡើង ២០%

បានផុស

៤ ខែ មុន

នៅ

ថ្ងៃចន្ទ ១០ មិថុនា ២០២៤

ដោយ

កម្ពុជាបាននាំចេញផលិតផលក្នុងវិស័យវាយនភណ្ឌទៅទីផ្សារអន្តរជាតិ ក្នុងទឹកប្រាក់ជាង ៤,៩៦ ពាន់លានដុល្លារ នៅក្នុងរយៈពេល ៥ ខែ ដើមឆ្នាំ ២០២៤ មានការកើនឡើង ២០ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមរបាយការណ៍របស់ក្រសួងពាណិជ្ជកម្មចេញផ្សាយកាលពីថ្ងៃអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ដដែលបង្ហាញថា គិតចាប់ពីខែមករា ដល់ខែឧសភា ២០២៤ ការនាំចេញសម្លៀកបំពាក់មានទឹកប្រាក់ ៣,៦២ ពាន់លានដុល្លារ កើនឡើង ២២ ភាគរយ បើធៀបនឹងរយៈពេលដូចនៅឆ្នាំ ២០២៣។ រីឯទឹកប្រាក់នាំចេញស្បែកជើងសម្រេចបាន ៦១៥ លានដុល្លារ កើន ១០ ភាគរយ ខណៈផលិតផលធ្វើដំណើរសម្រេចបាន ៧២៦ លានដុល្លារ កើនឡើងជាង ១៨ ភាគរយ។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង ប្រាប់កម្ពុជាថ្មី នៅថ្ងៃទី ១០ ខែមិថុនាថា រោងចក្រសហគ្រាសបរទេសចូលមកវិនិយោគនៅកម្ពុជាមានកំណើន ខណៈទីផ្សារនៃការបញ្ជាទិញមានការកើនឡើងនៅអាមេរិក និងអឺរ៉ុប ទន្ទឹមនឹងប្រទេសនៅអាស៊ីមួយចំនួនកំពុងជួបវិបត្តិផ្នែកសន្តិសុខ និងនយោបាយ ធ្វើឱ្យរោងចក្រមួយចំនួរុះរើមកកម្ពុជាដែលធ្វើឱ្យមានការផលិតកែច្នៃ និងនាំចេញកើនឡើងនៅកម្ពុជា។

លោកបណ្ឌិត ហុង វណ្ណៈ អ្នកជំនាញផ្នែកសេដ្ឋកិច្ចនៅរាជ្យបណ្ឌិត្យសភាកម្ពុជាបានឱ្យដឹងដែរថា តម្រូវការនៅទីផ្សារអន្តរជាតិចាប់ផ្ដើមមានភាពល្អប្រសើរឡើង ខណៈទីផ្សារសម្លៀកបំពាក់ ស្បែកជើង និងសម្ភារធ្វើដំណើររបស់កម្ពុជានាំចេញទៅកាន់ទីផ្សារអាមេរិក និងអឺរ៉ុបភាគច្រើន។

លោកយល់ឃើញថា វិបត្តិនៅអាមេរិក និងអឺរ៉ុប ចាប់ផ្ដើមមានការធូរស្រាល ធ្វើឱ្យប្រជាជនមានលទ្ធភាពអាចធ្វើដំណើរកម្សាន្តចេញទៅបណ្ដាប្រទេសផ្សេងៗ ទើបធ្វើឱ្យមានតម្រូវការសម្លៀកបំពាក់ និងសម្ភារធ្វើដំណើររផ្សេងៗទៀតកើនឡើង។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បង្ហាញថា នៅក្នុងរយៈពេល ៥ ខែចាប់ពីខែមករា ដល់ខែ ឧសភា ដើមឆ្នាំ ២០២៤ ទំហំពាណិជ្ជកម្មអន្តរជាតិរបស់កម្ពុជា សម្រេចបានទឹកប្រាក់ជាង ២១ ពាន់លានដុល្លារអាមេរិក កើនឡើង ១៣ ភាគរយ បើធៀបរយៈពេលដូចគ្នាកាលពីឆ្នាំមុន។

យោងតាម GDCE ទំនិញកម្ពុជានាំចេញរបស់កម្ពុជាទៅទីផ្សារអន្តរជាតិបានជាង ១០,០៧ ពាន់លានដុល្លារ កើន ១៥,៤ ភាគរយ ខណៈទំនិញនាំចូល ១១,២៦ ពាន់លានដុល្លារ កើន ១៣ ភាគរយ៕

អត្ថបទ៖ ឡេង ដេត