កម្ពុជាអំពាវនាវដល់វិនិយោគិនអឺរ៉ុបមកបណ្តាក់ទុននិងចាប់យកឱកាសវិនិយោគ

មន្រ្តីជាន់ខ្ពស់និងវិស័យឯកជននៃប្រទេសកម្ពុជាបានអំពាវនាវដល់បណ្តាវិនិយោគិននៅអឺរ៉ុបសំឡឹងមើលកម្ពុជាជាទិសដៅវិនិយោគមួយរបស់ខ្លួននៅតំបន់អាស៊ីអាគ្នេយ៍និងដើម្បីចាប់យកឪកាសនៃការអនុគ្រោះពន្ធនានាដែលកម្ពុជាកំពុងមាន។

លោក ស៊ុន ចាន់ថុល ​ អនុប្រធានទី១ ក្រុមប្រឹក្សាអភិវឌ្ឍន៍កម្ពុជាកាលពីថ្ងៃទី១០ ខែមិថុនាបានដឹកនាំគណៈប្រតិភូ និងវិស័យឯកជនមួយក្រុម​ក្នុងដំណើរបេសកកម្មគោះទ្វារវិនិយោគនៅសហភាពអឺរ៉ុប បានជួបជាមួយលោកស្រី​ Amparo Lopez Senovilla រដ្ឋលេខាធិការទទួលបន្ទុកពាណិជ្ជកម្ម នៃក្រសួងពាណិជ្ជកម្ម នៃអេស្ប៉ាញ ក្នុងសិក្ខាសាលាស្តីពីការវិនិយោគនៅកម្ពុជា ក្នុងគោលបំណងផ្សព្វផ្សាយអំពីសក្តានុពល និងកាលានុវត្តភាពវិនិយោគនៅកម្ពុជាទៅកាន់សហគ្រាសរបស់អេស្ប៉ាញ ដែលបានរៀបចំនិងមានការចូលរួមពី សភាពាណិជ្ជកម្មអេស្ប៉ាញ, សហព័ន្ធអង្គការពាណិជ្ជកម្មអេស្ប៉ាញ(CEOE), គណៈប្រតិភូកម្ពុជា និងវិស័យឯកជនជាច្រើនរូប។

លោក ស៊ុន ចាន់ថុល បានលើកឡើងអំពីសក្តានុពលរបស់កម្ពុជាដែលរួមមាន ស្ថិរភាពនយោបាយ ស្ថិរភាពម៉ាក្រូសេដ្ឋកិច្ច កម្លាំងពលកម្មកម្ពុជា ភាពប្រទាក់ក្រឡានៃហេដ្ឋារចនាសម្ព័ន្ធកម្ពុជាទាំងផ្លូវទឹក ផ្លូវគោក ផ្លូវអាកាស និងផ្លូវដែក ពិសេសមានរាជរដ្ឋាភិបាលផ្ដល់ការគាំទ្រដល់ភាពរីកចម្រើនរបស់ធុរជន និងច្បាប់វិនិយោគមានភាពបើកចំហរជូនវិនិយោគិនពីគ្រប់ប្រទេស។

លោកមានសុទិដ្ឋិនិយមសម្រាប់កិច្ចសម្របសម្រួលជូនវិនិយោគិន ​ដោយ បានបង្ហាញនូវជំនឿយ៉ាងមុតមាំថាវិនិយោគិន និងធុរជនដែលបានអញ្ជើញចូលរួមនាពេលនេះនឹងអញ្ជើញមកសិក្សាស្វែងយល់ដោយផ្ទាល់នៅកម្ពុជា ក៏ដូចជាពាំនាំនូវបច្ចុប្បន្នភាពនៃបរិយាកាសវិនិយោគនៅកម្ពុជាទៅកាន់សហគមន៍ធុរកិច្ចអេស្ប៉ាញឱ្យកាន់តែទូលំទូលាយបន្ថែមទៀត។

លោកថា៖«រាជរដ្ឋាភិបាលដែលគាំទ្រដល់ធុរកិច្ច មានរបបវិនិយោគដែលមានភាពអនុគ្រោះ និងភាពប្រទាក់ក្រឡានៃហេដ្ឋារចនាសម្ព័ន្ធអន្តរមធ្យោបាយកម្ពុជាដែលបាននិងកំពុងផ្ដល់ឱកាសឱ្យវិនិយោគិនបណ្ដាក់ទុនវិនិយោគបានផងដែរ»។

លោករំពឹងថាព្រះរាជាណាចក្រកម្ពុជា និងព្រះរាជាណាចក្រអេស្ប៉ាញ អាចពិនិត្យរៀបចំឱ្យមានសន្ធិសញ្ញាវិនិយោគទ្វេភាគី សំដៅបង្កភាពងាយស្រួលដល់ការវិនិយោគ និងទំនាក់ទំនងផងដែរ។

លោកជំទាវ Amparo Lopez Senovilla បានបង្ហាញការស្វាគមន៍​ចំពោះវត្តមានរបស់មន្ត្រី និងគណៈប្រតិភូកម្ពុជា ចំពោះដំណើរទស្សនកិច្ចក្នុងប្រទេសអេស្ប៉ាញនាឱកាសនេះ ព្រមទាំងបានបង្ហាញចំណាប់អារម្មណ៍ដែលវិនិយោគិនអេស្ប៉ាញ អាចវិនិយោគលើវិស័យទេសចរណ៍ ថាមពលកកើតឡើងវិញ ឱសថ វិស័យហេដ្ឋារចនាសម្ព័ន្ធដឹកជញ្ជូន ពិសេសហេដ្ឋារចនាសម្ព័ន្ធប្រព័ន្ធចម្រោះទឹកកខ្វក់ និងវិស័យផ្សេងៗមួយចំនួនទៀតនៅកម្ពុជាផងដែរ។

​ ​កម្ពុជា​បាន​នាំចេញ​ទំនិញ​ដែល​មាន​ទំហំ​ទឹកប្រាក់​ ​១​,​១៧៥​ ​ពាន់លាន​ដុល្លារក្នុងរយៈពេល៤ខែដើមឆ្នាំនេះ​ទៅកាន់​សហភាព​អឺរ៉ុប​ ​កើន​ឡើង​ ៨​,​៥១​ ​ភាគរយ​ធៀប​នឹង​ ​១​,​០៨៣លាន​ដុល្លារ​ក្នុងរយៈពេល​ដូចគ្នា​កាលពីឆ្នាំមុន​។​ នេះបើយោងតាមរបាយការណ៍​របស់​អគ្គនាយកដ្ឋាន​គយ​ ​និង​រដ្ឋាករ​។

​របាយការណ៍​បាន​បន្ថែម​ថា​ ​ការនាំចូល​របស់​កម្ពុជា​ពី​សហភាព​អឺរ៉ុប​មាន​ចំនួនជិត ២៧៨​ ​លាន​ដុល្លារ​ ​ធៀប​នឹង​រយៈពេល​៤ខែដើម​ឆ្នាំនេះ​ ​ធ្លាក់ចុះ​ ​១​៨​,​២១​ ​ភាគរយ​ពី​ជិត៣៤០​ ​លាន​ដុល្លារ​។​ ខណៈដែរពាណិជ្ជកម្ម​ទ្វេភាគី​បាន​កើន​ឡើង​ ​២​,​១៣​ ​ភាគរយ​ដល់​ ​១​,​​​៤៥៣ ពាន់​​លាន​ដុល្លារ​។​

​របាយការណ៍​បាន​បញ្ជាក់​ថា​ ​អាល្លឺម៉ង់​ ​និង​អេស្បា​ញ​ជា​ដៃគូ​ពាណិជ្ជកម្ម​អឺរ៉ុប​ធំបំផុត​របស់​កម្ពុជា​ដែល​មាន​ទំហំ​ពាណិជ្ជកម្ម​ទ្វេភាគី​ចំនួន​ ​២​៥៤​លាន​ដុល្លារ​ ​និង​ ​២៦០​លាន​ដុល្លារ​រៀងគ្នា៕

​

​