សេដ្ឋកិច្ច

ផែភ្នំពេញរកចំណូលបានជាង១៤លានដុល្លារក្នុងរយៈពេល៥ខែកន្លងមកនេះ

បានផុស

៨ ខែ មុន

នៅ

ថ្ងៃសុក្រ ១៤ មិថុនា ២០២៤

ដោយ

ប្រាក់ចំណូលសរុបរបស់កំពង់ផែស្វយ័តភ្នំពេញ (PPAP) ដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា (CSX)បានកើនប្រមាណ ១០ ភាគរយ នៅក្នុងរយៈពេល៥ខែដើមឆ្នាំ ២០២៤ ធៀបនឹងរយៈពេលដូចគ្នាកាលពីឆ្នាំ ២០២៣។ នេះបើយោងតាមសេចក្តីប្រកាសរបស់ PPAP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍មិនបានធ្វើសវនកម្ម ដែល PPAP ផ្ញើទៅផ្សារមូលបត្រកម្ពុជាកាលពីម្សិលមិញឱ្យដឹងថា ក្នុងរយៈពេល៥ខែដើមឆ្នាំ ២០២១ កំពង់ផែស្វយ័តភ្នំពេញ រកចំណូលសរុបបានជាង១៤លានដុល្លារ កើនពីចំនួនជាង១៣លានដុល្លារ ឬស្មើនឹងកំណើន ១០ ភាគរយធៀបទៅរយៈពេលដូចគ្នាកាលពីឆ្នាំ ២០២៣។

របាយការណ៍ឱ្យដឹងទៀតថា កំណើន ១០ ភាគរយនេះ គឺបានមកពីការរួមចំណែកយ៉ាងច្រើនពីចំណូលពីប្រតិបត្តិការផែ (Port Operation) ដែលមានចំនួន១១,៦លានដុល្លារ កើនឡើង ១១ភាគរយពីចំនួន ១០,៩ លានដុល្លារ កាលពីរយៈពេលដូចគ្នាកាលពីឆ្នាំ ២០២៣។ ចំណូលពីអាជ្ញាធរផែ (Port Authority) មានចំនួនជាង ២ លានដុល្លារ កើនឡើង១២ភាគរយ ពីចំនួន ជាង ១,៨ លានដុល្លារ និងចំណូលពីសេវាកម្មផ្សេងៗ (Other Services) មានចំនួន ៦៣៧ ៣៦៨ ដុល្លារ ធ្លាក់ចុះ ១៤ ភាគរយ ពីចំនួន ៧៤០ ៩៩១ ដុល្លារ ។

លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានប្រាប់កម្ពុជាថ្មីនៅថ្ងៃសុក្រនេះថា ចាប់តាំងពីមានការផ្ទុះរាលដាលជំងឺកូវីដ ១៩ ថមថយ និងទោះបីជាការបន្តឡើងកំដៅនៃបញ្ហាភូមិសាស្រ្តនយោបាយ ការដឹកជញ្ជូនលើគ្រប់មធ្យោបាយមានសភាពដូចមុនបន្តិច ដោយសារតែស្ថានភាពសេដ្ឋកិច្ចសកលនិងក្នុងតំបន់ហាក់ល្អប្រសើរ។ ការរក្សាបាននូវភាពវិជ្ជមានទោះក្នុងកម្រិតទាប ក៏ជារឿងល្អផងដែរនៅក្នុងដំណាក់កាលនេះ។

លោកថ្លែងថា៖«យើងសង្កេតឃើញថាក្រោយពីបញ្ហាកូវិដ១៩ មក យើងនៅតែបន្តជួបប្រទះបញ្ហាប្រឈមមួយចំនូនពីខាងក្រៅពាក់ព័ន្ធនឹងរឿងសង្រ្គាមរុស៊្សីនិងអ៊ុយក្រែន ប៉ុន្តែស្ថានភាពសេដ្ឋកិច្ចសកលនិងក្នុងតំបន់មានភាពល្អប្រសើរបន្តិចជាហេតុអំណោយផលខ្លះៗដល់វិស័យដឹកជញ្ជូនទំនិញ។ ជាមួយគ្នានេះដែរ យើងក៏ឃើញថាការនាំចេញនិងនាំចូលរបស់យើងក៏មានកំណើនផងដែរ»។

ការនាំចេញ-នាំចូលទំនិញរបស់កម្ពុជាទៅកាន់ទីផ្សារអន្តរជាតិក្នុងរយៈពេល៥ខែនេះសម្រេចបានទឹកប្រាក់ប្រមាណ ២១ពាន់លានដុល្លារអាមេរិក មានការកើនឡើង ១៣% បើប្រៀបធៀបនឹងពេលដូចគ្នា កាលពីឆ្នាំមុន។ នេះបើយោងតាមទិន្នន័យផ្លូវការចេញផ្សាយដោយ អគ្គនាយកដ្ឋានគយ និងរដ្ឋាករកម្ពុជា។

អគ្គនាយកដ្ឋានគយ បានបញ្ជាក់បន្ថែមថា កម្ពុជា សម្រេចបានការនាំចេញជាង ១០ពាន់លានដុល្លារអាមេរិក ដែលកើនឡើង ១៥% ធៀបទៅនឹងរយៈពេលដូចគ្នានៅឆ្នាំ ២០២៣ មានទឹកប្រាក់ ៨,៧លាពាន់លានដុល្លារអាមេរិក។

ការនាំចូលមកវិញ កម្ពុជា បាននាំចូលទំនិញប្រមាណ ១១ពាន់ ២រយលានដុល្លារអាមេរិក ដែលមានការកើនឡើង ប្រហែល ១១% ហើយវាបានធ្វើឲ្យ កម្ពុជា រងនូវឱនភាពពាណិជ្ជកម្មប្រមាណ ១ពាន់លានដុល្លារអាមេរិក។ដៃគូពាណិជ្ជកម្មសំខាន់របស់កម្ពុជា រួមមាន ចិន សហរដ្ឋអាមេរិក វៀតណាម ថៃ ជប៉ុន ឥណ្ឌូនេស៊ី និងកាណាដា ខណៈទីផ្សារនាំចេញធំៗរួមមាន អាមេរិក ចិន វៀតណាម ជប៉ុន ថៃ និងកាណាដា៕