សេដ្ឋកិច្ច

ឡាវជួបឱនភាពពាណិជ្ជកម្ម៤ខែជាប់ៗគ្នា ខណៈអតិផរណាបន្តខ្ពស់កប់ពពក ហើយលុយគីបធ្លាក់ចុះ

បានផុស

៣ ខែ មុន

នៅ

ថ្ងៃសុក្រ ១៤ មិថុនា ២០២៤

ដោយ

ប្រទេសឡាវបានជួបប្រទះនឹងឱនភាពពាណិជ្ជកម្មរយៈពេល៤ខែជាប់ៗគ្នាចាប់ពីខែមករា ដល់ខែមេសាឆ្នាំ ២០២៤ ខណៈស្ថានភាពនេះកាន់តែយ៉ាប់យឺនទៅៗដោយសារតែកម្រិតអតិផរណាខ្ពស់កប់ពពក ដែលនាំឱ្យតម្លៃប្រាក់គីប ធ្លាក់ចុះជាគំហុក។ នេះបើតាមការចុះផ្សាយរបស់កាសែត The Loatian Times កាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅខែមេសា ប្រទេសឡាវបានកត់ត្រាទំហំពាណិជ្ជកម្មទ្វេភាគីចំនួន ១,១២២ ប៊ីលានដុល្លារអាមេរិក ដោយការនាំចេញមានចំនួន ៤៦២ លានដុល្លារ ហើយការនាំចូល មានចំនួន ៦៦០ លានដុល្លារ។ អតុល្យភាពនេះ បង្ហាញពីឱនភាពពាណិជ្ជកម្មប្រមាណ ១៩៨ លានដុល្លារ ដែលនេះជាចំនួនខ្ពស់បំផុតក្នុងឆ្នាំនេះសម្រាប់ឡាវ និងកើតឡើង៤ខែជាប់ៗ គ្នា។

ស្ថិតិចុងក្រោយរបស់រដ្ឋាភិបាលឡាវ បង្ហាញថា អំបិលគឺជាទំនិញនាំចេញនាំមុខគេ បន្ទាប់មកមាន មាស រ៉ែទង់ដែង និងដំឡូងមី។ ការនាំចេញបន្ទាប់បន្សំគួរឱ្យកត់សម្គាល់ផ្សេងទៀតរួមមាន ស្ករ ចេក កៅស៊ូ ម្សៅដំឡូងមី និងរ៉ែដែក។

ការនាំចូលធំៗ រួមមានប្រេងម៉ាស៊ូតជាទំនិញនាំចូលច្រើនជាងគេ បន្ទាប់មករថយន្ត គ្រឿងខ្ចងខ្ចៅម៉ាស៊ីន និងផលិតផលដែកថែបផ្សេងៗ។ ការនាំចូលកំពូលផ្សេងៗទៀត រួមមានសម្ភារៈផ្ទះបាយប្លាស្ទិក ផលិតផលគីមីបញ្ចប់ ប្រេងសាំង និងគ្រឿងបន្លាស់ជាដើម។

ជាមួយគ្នានោះ វៀតណាមជាទីផ្សារនាំចូលធំជាងគេសម្រាប់ទំនិញនាំចេញរបស់ឡាវ បន្ទាប់មកគឺថៃ ចិន អូស្រ្តាលី និងស្វីស។ ចំណែកឯថៃវិញ ជាប្រភពនាំចូលធំបំផុតរបស់ឡាវ ហើយបន្ទាប់មករួមមានចិន វៀតណាម សហរដ្ឋអាមេរិក និងកូរ៉េខាងត្បូង។

ទោះបីជាប្រឈមមុខនឹងឱនភាពពាណិជ្ជកម្មក៏ដោយ រដ្ឋឡាវបានបញ្ជាក់ថា តួលេខពាណិជ្ជកម្មដែលបានរាយការណ៍មិនរាប់បញ្ចូលតម្លៃនៃពាណិជ្ជកម្មអគ្គិសនីនោះទេ។ ការមិនរាប់បញ្ជូលបែបនេះ ធ្លាប់បានជះឥទ្ធិពលយ៉ាងខ្លាំងទៅលើសេដ្ឋកិច្ចរបស់ប្រទេស ដោយរួមចំណែកយ៉ាងធំដល់អត្រាអតិផរណាខ្ពស់ជាបន្តបន្ទាប់។ នៅក្នុងខែឧសភា អតិផរណានៅឡាវបានកើនឡើងដល់ ២៥,៨ ភាគរយ កើនឡើង ១ ភាគរយ ពី ២៤,៩ ភាគរយនៅខែមេសា។

ថ្មីៗនេះ លោកស្រី Bounleua Sinxayvoravong ទេសាភិបាលធនាគារកណ្តាលឡាវ បានមានប្រសាសន៍ថា អតិផរណាខ្ពស់កប់ពពកនឹងបន្តរហូតដល់ចុងឆ្នាំ ដែលរាំងស្ទះដល់ការដាក់កម្រិតឱ្យសម្រេចបានអត្រាអតិផរណាក្រោម២ខ្ទង់។

ក្នុងពេលជាមួយគ្នានោះ ប្រាក់គីបឡាវនឹងបន្តនិន្នាការធ្លាក់ចុះ ដោយឈានដល់កម្រិតទាបថ្មីមួយធៀបនឹងរូបិយប័ណ្ណសំខាន់ៗដូចជា ប្រាក់បាតថៃ ប្រាក់ដុល្លារអាមេរិក និងប្រាក់យន់ចិនជាដើម។ គិតត្រឹមថ្ងៃទី ១៣ ខែមិថុនា អត្រារបស់ធនាគារពាណិជ្ជឡាវ បានបង្ហាញថា តម្លៃប្រាក់គីប ធ្លាក់ដល់ ២១ ៨២៥ គីប/ដុល្លារ និង ៦៩៤,៤៥ គីប/បាត៕

Related Topics: