កំណើននាំចេញផលិតផលមិនមែនកាត់ដេរ មន្ត្រី និងអ្នកវិភាគលើកឡើងថា ជាការផ្លាស់ប្ដូររចនាសម្ព័ន្ធសេដ្ឋកិច្ចថ្មី

មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានបញ្ជាក់ប្រាប់ឱ្យដឹងថា ការនាំចេញវិស័យឧស្សាហកម្ម​មិនមែន​កាត់​ដេរ បានហក់ឡើងគួរឱ្យ​កត់សម្គាល់ នៅក្នុងរយៈពេល​ចុងក្រោយនេះ ដែលកំណើននេះគឺជារចនាសម្ព័ន្ធសេដ្ឋកិច្ចថ្មីមួយ នៃ​ការ​អនុវត្តគោលនយោបាយការធ្វើពិពិធកម្មសេដ្ឋកិច្ច របស់រាជរដ្ឋាភិបាលកម្ពុជា។

លោក មាស សុខសេនសាន រដ្ឋលេខាធិការ ​និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ​មានប្រសាសន៍នៅថ្ងៃទី ១៧ ខែមិថុនា ឆ្នាំ ២០២៤នេះថា វិស័យធំៗ ៣ ដែលជំរុញកំណើនសេដ្ឋកិច្ចកម្ពុជាមាន ដូចជា​វិស័យ​កសិកម្ម ឧស្សាហម្ម និងសេវាកម្ម។

លោក មាស សុខសេនសាន បានបញ្ជាក់ថា នៅរយៈពេល ៤ ខែដើមឆ្នាំ ២០២៤ ពាណិជ្ជកម្មនាំចេញទៅទីផ្សារអន្តរ​ជាតិរបស់កម្ពុជា​មានកំណើន ក្នុងនោះការនាំចេញផលិតផលវិស័យមិនមែនកាត់ដេរ ដែលមានដូចជា កង់ សូឡា និងគ្រឿង​អេឡិកត្រូនិក មានការកើនឡើងគួរឱ្យកត់សម្គាល់។

អ្នកនាំពាក្យរូបនេះ បញ្ជាក់ថា កំណើននៃការនាំចេញវិស័យមិនមែនកាត់ដេរ គឺជារចនាសម្ព័ន្ធ​សេដ្ឋកិច្ច​​ថ្មីមួយ ដែលបង្កើតតម្លៃបន្ថែមសម្រាប់ប្រជាជនកម្ពុជា។

យោងតាមអ្នកនាំពាក្យ នៅក្នុងរយៈពេល ៤ ខែដើមឆ្នាំនេះ វិស័យកសិកម្មបានចូលរួមចំណែកសេដ្ឋកិច្ច ២២ ភាគរយ វិស័យឧស្សាហកម្ម ៣០ ភាគរយ វិស័យសេវាកម្ម ក្នុងរង្វង់ ៤២ ភាគរយ ខណៈ​វិស័យ​មិនមែនកាត់ដេរមានកំណើន៣,១ ភាគរយនៃការរួមចំណែកក្នុងវិស័យឧស្សាហកម្ម។       

លោកបណ្ឌិត ហុង វណ្ណៈ អ្នក​ជំនាញ​ផ្នែក​សេដ្ឋកិច្ច​នៅ​រាជ្យ​បណ្ឌិត្យសភា​កម្ពុជា លើក​ឡើងថា វិស័យមិនមែនកាត់ដេរ និងវិស័យកមន្តសាល ជាវិស័យដែលមានផលិតកម្មរឹង​មាំ​រយៈពេលវែង។

លោកថា វិស័យកាត់ដេរក៏ជួយជំរុញកំណើនសេដ្ឋកិច្ចដែរ ប៉ុន្តែមានលក្ខណៈផុយស្រួយជាង ហើយ​នៅពេលដែលកម្ពុជាកំពុងទទួលបានកូតា EBA នៅឡើយ នោះកម្ពុជានៅមានតម្រូវការទីផ្សារសម្លៀកបំពាក់ពីសហរដ្ឋអាមេរិក និងអង់គ្លេសជាដើម។

លោកបណ្ឌិត ហុង វណ្ណៈ បានបញ្ជាក់ថា ប្រសិនបើកម្ពុជាជំរុញលើកកម្ពស់វិស័យមិនមែនកាត់ដេរ ឱ្យកាន់តែប្រសើរ ដែលហៅថា ឧស្សាហកម្មធុនមធ្យម ឬក៏ឈានដល់កម្រិតខ្ពស់ថែមទៀត ដូចជាវិស័យ​បច្ចេកវិទ្យា វិស័យគ្រឿងយន្ត និង​រោងចក្រសហគ្រាស ដែលគាំទ្រ​ដោយវិស័យ​កសិកម្មបន្ថែមទៀត រឹតតែប្រសើរ ដែលនឹងជួយ​ជំរុញឱ្យ​វិស័យឧស្សា​ហកម្ម​ទាំងអស់នេះ ឱ្យមានភាពរឹងមាំ ចាក់ជ្រៅនៅក្នុងការអភិវឌ្ឍ សេដ្ឋកិច្ចកម្ពុជា។

លោកបណ្ឌិតបញ្ជាក់ថា សញ្ញានៃការនាំចេញវិស័យមិនមែនកាត់ដេរ ជាសញ្ញាវិជ្ជមាន ដែលអាច​នាំ​ឱ្យ​ផលិត​កម្ម មានសន្ទុះឡើងមួយកម្រិត។

យោងតាមក្រសួងសេដ្ឋកិច្ច នៅឆ្នាំ ២០២៣ ការនាំចេញផលិតផលមិនមែនកាត់ដេរមានដូចជា កង់ សូឡា គ្រឿងអេឡិកត្រូនិក សម្រេចបានទឹកប្រាក់ ៣,៦៤ ពាន់លានដុល្លារ៕

អត្ថបទ៖ ឡេង ដេត