សេដ្ឋកិច្ច

កម្ពុជាស្នើឱ្យសិង្ហបុរី ពង្រីកជើងហោះហើរត្រង់ទៅខេត្តព្រះសីហនុ

បានផុស

១ ថ្ងៃ មុន

នៅ

ថ្ងៃព្រហស្បតិ៍ ២០ មិថុនា ២០២៤

ដោយ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើឱ្យមេដឹកនាំប្រទេសសិង្ហបុរីពង្រីកជើងហោះហើរត្រង់របស់ខ្លួនមកកម្ពុជា ដោយធ្វើការហោះហើរផ្ទាល់ទៅកាន់ខេត្តព្រះសីហនុ បន្ថែមពីការជើងហោះហើរដែលមានស្រាប់ហើយមករាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត ស្នើរបែបនេះ គឺបានធ្វើឡើងនៅក្នុងជំនួបទ្វេភាគីជាមួយលោក ឡរ៉េន វ៉ុន នាយករដ្ឋមន្ត្រីសិង្ហបុរី អំឡុងពេលបំពេញទស្សនកិច្ចផ្លូវការរយៈពេល ២ ថ្ងៃនៅប្រទេសសិង្ហបុរី។

លោក ហ្សង់ ហ្វ្រង់ស័រតាន់ រដ្ឋមន្ត្រីប្រតិភូអមនាយករដ្ឋមន្ត្រី បានបញ្ជាក់ប្រាប់នៅថ្ងៃទី ១៩ ខែមិថុនា នេះថា កម្ពុជា និងសិង្ហបុរី អបអរសាទរចំពោះការកើនឡើងជាលំដាប់ នៃចំនួនទេសចរកម្ពុជាទៅប្រទេសសិង្ហបុរី និងទេសចរសិង្ហបុរីមកកម្ពុជា ខណៈសម្ដេចធិបតី ហ៊ុន ម៉ាណែត បានស្នើឱ្យសិង្ហបុរីបើកការហោះហើរផ្ទាល់ពីសិង្ហបុរីទៅទីក្រុងព្រះសីហនុ បន្ថែមលើការហោះហើរត្រង់ដែលមានស្រាប់ពីសិង្ហបុរីមកភ្នំពេញ និងខេត្តសៀមរាប។

ចំនួនជើងហោះហើរផ្ទាល់រវាងប្រទេសទាំងពីរបានកើនឡើង ដល់ប្រមាណ ៥០ ជើងក្នុងមួយសប្ដាហ៍ ខណៈកំណើនភ្ញៀវទេសចររវាងប្រទេសទាំងពីរក៏កើនឡើងដូចគ្នា។

យោងតាមរដ្ឋលេខាធិការដ្ឋានអាកាសចរណ៍ស៊ីវិល នៅក្នុងរយៈពេល៥ខែ ចាប់ពីខែមករា ដល់ខែឧសភា ឆ្នាំ២០២៤ កម្ពុជាបានទទួលអ្នកដំណើរតាមផ្លូវអាកាសជាង ២,៥ លាននាក់ កើនឡើង ២២% បើធៀបរយៈពេលដូចគ្នាកាលពីឆ្នាំមុន៕