សេដ្ឋកិច្ច
កត្តាភូមិសាស្ត្រនយោបាយ នាំឱ្យការព្យាករកំណើនសេដ្ឋកិច្ចកម្ពុជាមិនប្រាកដប្រជា
លោក មាស សុខ សេនសាន រដ្ឋលេខាធិការ និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា នៅលើសកលលោក គ្មានប្រទេសណាមួយអាចវាយតម្លៃអំពីកំណើនសេដ្ឋកិច្ចរបស់ខ្លួនឱ្យបានត្រឹមត្រូវ ១០០ ភាគរយ នោះទេ ដូចធ្លាប់មានបទពិសោធន៍នៅឆ្នាំ ២០០៨ វិបត្តិហិរញ្ញវត្ថុ ទីផ្សារភាគហ៊ុនធ្លាក់ចុះ ឬក៏កាធ្លាក់ចុះនៃវិស័យអចលទ្រព្យនៅបរទេសជាដើម។
![](https://www.kampucheathmey.com/wp-content/uploads/2024/06/DSC00-38-1024x683.jpg)
លោក មាស សុខ សេនសាន លើកឡើងក្នុងបទសម្ភាសន៍ជាមួយកម្ពុជាថ្មីកាលពីពេលថ្មីៗនេះថា រាជរដ្ឋាភិបាលកម្ពុជាបានគិតអំពីហានិភ័យមួយចំនួនដូចជា កត្តាភូមិសាស្ត្រនយោបាយ ដែលបង្កនូវភាពមិនប្រាកដប្រជា សម្រាប់ការព្យាករកំណើនសេដ្ឋកិច្ចរបស់កម្ពុជា ការផ្លាស់ប្ដូរប៉ូលសេដ្ឋកិច្ច និងប៉ូលនយោបាយដែលបានប្ដូរពីប៉ូលច្រើនក៏ជាកត្តាហានិភ័យ។
មន្ត្រីនាំពាក្យដដែលរូបនេះបញ្ជាក់ថា៖ «អត្រាកំណើនការប្រើប្រាស់សម្ភារបរិក្ខាមួយចំនួននៅលើសកលលោក មានការកើនដោយសារតែអត្រាការប្រាក់ទាបនាំឱ្យកម្ចីកើនឡើង ហើយដើម្បីកាត់បន្ថយអត្រាអតិផរណាត្រូវបង្កើនអត្រាការប្រាក់ខ្ពស់ដើម្បីធ្វើឱ្យកម្ចីថយចុះនោះសង្វាក់ផលិតកម្មក៏ថយដែរ ប៉ុន្តែគេធ្វើបែបនេះ ដើម្បីទប់ទល់កុំឱ្យមានអតិផរណាកើនឡើង»។
![](https://www.kampucheathmey.com/wp-content/uploads/2024/06/441048866_438270932293250_8737065086134954534_n-1.jpg)
បើតាមលោក មាស សុខ សេនសាន ការព្យាករសេដ្ឋកិច្ចសកលលោកមានកំណើនទាប មានន័យថា ទីផ្សារក៏មិនទាន់មានសន្ទុះខ្លាំងដែរ ខណៈការបញ្ជាទិញក៏មិនផុសផុលដូចមុនពេលវិបត្តិជំងឺកូវីដ១៩ ដែរ។
ម្យ៉ាងទៀតការប្រែប្រួលអាកាសធាតុ និងគ្រោះធម្មជាតិ ក៏ជាកត្តាមួយទៀតដែលកម្ពុជាត្រូវគិត។ ទោះយ៉ាងណា រាជរដ្ឋាភិបាលកម្ពុជា មានសុទិដ្ឋិនិយម ផ្លាស់ប្ដូរពីសកលភាវូបនីយកម្ម ទៅជាតំបន់ភាវូបនីយកម្ម ដែលមានន័យថា សង្វាក់ផលិតកម្មមួយចំនួននឹងផ្ដោតទៅលើតំបន់នីមួយៗវិញ អញ្ចឹងយើង នឹងចាប់យកឱកាសនៅតាមតំបន់ៗ ខណៈប្រទេសមួយចំនួន មិនអាចធ្វើដូចកម្ពុជាបាន យើងនឹងជំនួសគាត់ ហើយប្រទេសមួយចំនួន ដែលមានបញ្ហាយើងនឹងឆក់យកឱកាសហ្នឹងដើម្បីបង្កើនសង្វាក់ផលិតកម្ម។
លោក មាស សុខ សេនសាន បញ្ជាក់ថា តំបន់សេដ្ឋកិច្ចទីផ្សារសេរី សុទ្ធតែជាឱកាសសម្រាប់កម្ពុជា ក្នុងការចាប់យក និងបង្កើនសមត្ថភាពផលិតដើម្បីនាំចេញ។
ម្យ៉ាងទៀត តម្លៃពលកម្មនៅក្នុងប្រទេសកម្ពុជានៅមានភាពប្រកួតប្រជែង ដែលជាសក្ដានុពលទាក់ទាញសម្រាប់ការវិនិយោគ គ្រាដែលរដ្ឋាភិបាលកំពុងខិតខំកែទម្រង់រដ្ឋបាលសាធារណៈ និងហិរញ្ញវត្ថុសាធារណៈ និងកែទម្រង់ផ្សេងៗ ដើម្បីឆ្លើយតបលើបញ្ហាប្រឈម។
![](https://www.kampucheathmey.com/wp-content/uploads/2024/06/១-33-1024x614.jpg)
លោកឧកញ៉ា លឹម ហេង ប្រធានស្តីទីសភាពាណិជ្ជកម្មកម្ពុជា បានលើកឡើងថា តាមការព្យាកររបស់រដ្ឋាភិបាល និងធានាគារពិភពលោក សេដ្ឋកិច្ចកម្ពុជានៅតែមានកំណើន ៦ ភាគរយ នៃ GDP ក្នុងឆ្នាំ ២០២៤ និងឆ្នាំបន្ទាប់ ដែលមិនមានបញ្ហាប្រឈមនោះទេ។
លោកឧកញ៉ា លឹម ហេង បញ្ជាក់ថា បច្ចុប្បន្ននេះ ពិតមែនតែវិស័យអចលនទ្រព្យនៅទ្រឹង ប៉ុន្តែវិស័យផ្សេងៗកំពុងមានភាពល្អប្រសើរដូចជាវិស័យទេសចរណ៍ កសិកម្ម និងផលិតផលឧស្សាហកម្មកែច្នៃនាំចេញមានការកើនឡើង។
យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បង្ហាញថា នៅក្នុងរយៈពេល ៥ ខែចាប់ពីខែមករា ដល់ខែ ឧសភា ដើមឆ្នាំ ២០២៤ ទំហំពាណិជ្ជកម្មអន្តរជាតិរបស់កម្ពុជា សម្រេចបានទឹកប្រាក់ជាង ២១ ពាន់លានដុល្លារអាមេរិក កើនឡើង ១៣ ភាគរយ បើធៀបរយៈពេលដូចគ្នាកាលពីឆ្នាំមុន។
យោងតាម GDCE ទំនិញកម្ពុជានាំចេញរបស់កម្ពុជាទៅទីផ្សារអន្តរជាតិបានជាង ១០,០៧ ពាន់លានដុល្លារ កើន ១៥,៤ ភាគរយ ខណៈទំនិញនាំចូល ១១,២៦ ពាន់លានដុល្លារ កើន ១៣ ភាគរយ។
ទោះយ៉ាងណា សេដ្ឋកិច្ចរបស់ប្រទេសកម្ពុជាត្រូវបានព្យាករណ៍ថា នឹងសម្រេចបាននូវអត្រា ៦ ភាគរយនៅឆ្នាំ ២០២៤ កើនឡើងពី ៥ ភាគរយនៅឆ្នាំ ២០២៣។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
កំណើននេះត្រូវបានគាំទ្រជាចម្បងនៃការកើនឡើងក្នុងការនាំចេញផលិតផលសម្លៀកបំពាក់ ស្បែកជើង និងទំនិញធ្វើដំណើរ វិស័យទេសចរណ៍ កសិកម្ម និងអចលនទ្រព្យ និងសំណង់៕
អត្ថបទ៖ ឡេង ដេត
-
សន្តិសុខសង្គម៤ ថ្ងៃ ago
ជនដៃដល់ បាញ់មនុស្ស២នាក់ស្លាប់ នៅបុរីប៉េងហួត មានគោរម្យងារជា ឧកញ៉ា
-
KPT+៧ ថ្ងៃ ago
ប្រវត្តិដ៏គួរឱ្យចាប់អារម្មណ៍របស់ វត្តចំណាស់ទាំង ៧ ក្នុងខេត្តបាត់ដំបង
-
សន្តិសុខសង្គម៤ ថ្ងៃ ago
សមត្ថកិច្ច ចាប់បានបុរសដែលបាញ់មនុស្ស២នាក់ឱ្យស្លាប់ និងរបួស នៅបុរីប៉េងហ៊ួតបឹងស្នោ
-
សន្តិសុខសង្គម៤ ថ្ងៃ ago
Update៖ សមត្ថកិច្ចចាប់ខ្លួនជនសង្ស័យម្នាក់ ក្នុងហេតុការណ៍ផ្ទុះអាវុធ នៅក្នុងបុរីប៉េងហួតបឹងស្នោ
-
ព័ត៌មានជាតិ៣ ថ្ងៃ ago
សមាគមឧកញ៉ា នឹងស្នើបញ្ចប់ងារឧកញ៉ាពីឈ្មោះ ស្រី ស៊ីណា ក្រោយបាញ់ឱ្យមនុស្សស្លាប់
-
អត្ថាធិប្បាយ៤ ថ្ងៃ ago
សមត្ថកិច្ចប្រើពេល៣ម៉ោង ក្របួចកឧកញ៉ាប្រើកាំភ្លើងផ្ដាច់ជីវិតគូរស្នេហ៍មួយគូរ
-
KPT+១ ថ្ងៃ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
ព័ត៌មានជាតិ១ សប្តាហ៍ ago
ស្ពានអាកាសភ្លោះភ្ជាប់ផ្លូវ ៦០ ម៉ែត្រ ទៅព្រលានអន្តរជាតិតេជោ ប្រកាសបើកការដ្ឋាននៅថ្ងៃ ១៧ មិថុនា នេះ