រោងចក្រ ហុងដា មានសមត្ថភាព​ផលិតម៉ូតូ ១​​​​ ៥០០ គ្រឿងក្នុងរយៈ ពេល​​ ៨ ម៉ោង

រោងចក្រផលិតម៉ូតូ ហុងដា នៅរាជធានីភ្នំពេញ ​អាចមានសមត្ថភាពផលិតម៉ូតូបានចំនួន ១​ ៥០០ គ្រឿង​ក្នុង​មួយវេនដែលមានរយៈពេលត្រឹមតែ ៨ ម៉ោង។

នៅក្នុងដំណើរទស្សនកិច្ចរោងចក្រម៉ូតូ ហុងដា នៅថ្ងៃទី ២៤ ខែមិថុនា លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា ម៉ូតូគឺជាមធ្យោបាយធ្វើដំណើរដ៏មានសារៈ​សំខាន់ទាំងសម្រាប់ ជីវភាពរស់នៅប្រចាំថ្ងៃ និងសម្រាប់សេដ្ឋកិច្ចរបស់ប្រជាជនកម្ពុជា។

លោក ហែម វណ្ណឌី បានបញ្ជាក់ឱ្យដឹងថា បច្ចុប្បន្ន គ្រឿងបង្គុំម៉ូតូហុងដា ឌ្រីម ភាគច្រើនត្រូវបានផលិត​នៅក្នុង​ប្រទេស​កម្ពុជា មិនតែប៉ុណ្ណោះ​គ្រឿង​បង្គុំមួយចំនួនក៏ត្រូវបានផលិត​នាំចេញ​ទៅប្រទេសជិតខាងផងដែរ ខណៈការអភិវឌ្ឍ​នេះ​បានលើកមុខ​មាត់​ផលិត​ផលកម្ពុជា និងបង្ហាញពីការរីកចម្រើន​នៃវិស័យ​ឧស្សាហកម្មក្នុង​ស្រុក។

លោករដ្ឋមន្ត្រីក៏បានលើកទឹកចិត្តក្រុមហ៊ុនឱ្យបើកខ្សែច្រវាក់ផលិតកម្មរបស់ខ្លួនដល់សហគ្រាសធុនតូច និង​មធ្យម បានមកសិក្សាស្វែងយល់ពីស្តង់ដារ និងវិន័យការងាររបស់ក្រុមហ៊ុន។

ក្រុមហ៊ុន ហុងដា តាមរយៈដៃគូក្នុងស្រុករបស់ខ្លួនគឺ NCX Co., Ltd. បានបង្កើតការងារជាង ២,០០០ កន្លែងក្នុងប្រទេស​​​កម្ពុជា ដែល NCX គឺជាក្រុមហ៊ុនផលិត និងចែកចាយផ្តាច់មុខនូវម៉ូតូ ហុងដា នៅកម្ពុជា ហើយ​បានរួមចំណែកយ៉ាងសំខាន់ដល់ការបង្កើតការងារ តាមរយៈប្រតិបត្តិការ​ផលិត ផ្គុំ និងចែកចាយ​ផលិតផល ហុងដា របស់ខ្លួន។

មកទល់ពេលបច្ចុប្បន្ន ក្រុមហ៊ុន ហុងដា បានផលិតម៉ូតូជាង ៤,៣ លានគ្រឿង ក្នុងរយៈពេល ២៥ ឆ្នាំកន្លងមកនៅកម្ពុជា។

យោងតាមក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជាមានរោងចក្រកំពុងដំណើរការមកពីប្រទេសជប៉ុនមានចំនួន ៨១ រោងចក្រ ជាមួយទុនវិនិយោគសរុបជាង ៦៧៤ លានដុល្លារអាមេរិក៕

អត្ថបទ៖ ឡេង ដេត