សេដ្ឋកិច្ច

ការផលិតរថយន្តរបស់ Toyota ប្រចាំខែឧសភា ធ្លាក់ចុះជាសកល ជាពិសេសនៅចិន

បានផុស

៨ ខែ មុន

នៅ

ថ្ងៃព្រហស្បតិ៍ ២៧ មិថុនា ២០២៤

ដោយ

ការផលិតរថយន្តជាសាកលរបស់ក្រុមហ៊ុន Toyota Motor បានបន្តធ្លាក់ចុះនៅខែឧសភា បើធៀបនឹងរយៈពេលដូចគ្នាកាលពីឆ្នាំមុន ដោយការផលិតនៅតាមប្រទេសជាច្រើនបានធ្លាក់ចុះ ជាពិសេសនៅចិន ដែលម៉ាករថយន្តប្រភេទនេះមានការប្រកួតប្រជែងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការរាយការណ៍របស់ទីភ្នាក់ងារសារព័ត៌មានរ៉យទ័រ វាជាការបន្តធ្លាក់ចុះ ៤ ខែជាប់គ្នាៗ ដោយខែឧសភា ទិន្នផលផលិតរថយន្តទូទាំងពិភពលោករបស់ Toyota បានថយចុះ ៤ ភាគរយ មកនៅត្រឹម ៨១២ ១៩១ គ្រឿង។

នៅក្នុងប្រទេសចិន ផលិតកម្មនេះបានធ្លាក់ជាគំហុករហូតដល់ ២២ ភាគរយ ដោយសារតែការប្រកួតប្រជែងពីក្រុមហ៊ុនរថយន្តក្នុងស្រុកចិន ដែលធ្វើការផ្ដល់ជូនផ្សេងៗសម្រាប់ការលក់រថយន្តរបស់ពួកគេ បន្ថែមពីលើ «សង្រ្គាមតម្លៃ»។

ក្រៅពីនេះ ផលិតកម្មរបស់ក្រុមហ៊ុនផលិតរថយន្តជប៉ុនដដែល ក៏មានកម្រិតទាបនៅតាមបណ្ដាប្រទេសផ្សេងៗទៀត រួមមានថៃ ម៉ិកស៊ិក ប្រេស៊ីល និងបារាំង។ ប៉ុន្តែការផលិតនៅសហរដ្ឋអាមេរិក និងជប៉ុនកើនឡើង។

ទន្ទឹមនឹងនេះ ការលក់នៅទូទាំងពិភពលោករបស់ក្រុមហ៊ុនតូយ៉ូតា បានកើនឡើងត្រឹមតែ ០,៣ ភាគរយប៉ុណ្ណោះក្នុងអំឡុងខែឧសភា ដោយសារកំណើនលក់នៅសហរដ្ឋអាមេរិក និងអឺរ៉ុប ដែលប៉ះប៉ូវការធ្លាក់ចុះនៅក្នុងប្រទេសជប៉ុនផ្ទាល់ និងចិន។
អ្នកវិភាគនិយាយថា ការធ្លាក់ចុះជាសកលផ្នែកផលិត និងកំណើនតិចតួចនៃការលក់រថយន្តរបស់ក្រុមហ៊ុនតូយ៉ូតា បណ្ដាលមកពីការប្រកួតប្រជែងទីផ្សារកាន់តែខ្លាំងឡើងជាមួយបណ្ដាក្រុមហ៊ុនចិន ខណៈរឿងអាស្រូវសុវត្ថិភាពរថយន្តក្នុងស្រុកជប៉ុនរបស់តូយ៉ូតា ក៏ជាផ្នែកមួយនៃការធ្លាក់ចុះផងដែរ៕

Related Topics:ក្រុមហ៊ុន Toyota