ប្រធានផ្សារហ៊ុន៖ ផ្សារមូលបត្រគឺជាប្រភពទុនមិនចេះរីងស្ងួត

មន្រ្តីជាន់ខ្ពស់នៃផ្សារមូលបត្រកម្ពុជា (CSX) វិស័យមូលបត្រគឺជាវិស័យ​មួយ​ដើរតួយ៉ាងសំខាន់ ក្នុង ការជំរុញសេដ្ឋកិច្ចជាតិ តាមរយៈការគាំទ្រ និងផ្តល់ជា​ប្រភពទុនមិនចេះ រីងស្ងួត ហើយក៏ជាកន្លែងដែលផ្តល់នូវ​ឧបករណ៍​ហិរញ្ញវត្ថុថ្មី ដែល​មាន​ភាពទាក់ទាញ ឮ និងផ្តល់អត្ថប្រយោជន៍​ជា​ច្រើនជូនសង្គម និងសេដ្ឋកិច្ចជាតិ។

ថ្លែងក្នុងកម្មវិធីចុះបញ្ជីសញ្ញាបណ្ណបៃតងជាផ្លូវការរបស់ក្រុមហ៊ុនតំបន់សេដ្ឋកិច្ចពិសេស រ៉ូយ៉ាល់ ក្រុម ភ្នំពេញ កាលពីថ្ងៃទី២៨កន្លងទៅនេះ លោក ហុង សុហ៊ួរ អគ្គនាយកនៃ CSX បានលើកឡើងថា ទោះបីជាស្ថានភាព​សេដ្ឋកិច្ចជា​សកលហាក់មានភាពតានតឹង ​ទីផ្សារ មូលបត្រកម្ពុជាមានភាពមមាញឹកក្នុង​ការទទួល​ស្វាគមន៍នូវក្រុមហ៊ុនថ្មីៗជាច្រើនក្នុងការចុះបញ្ជីទាំងមូលបត្រ កម្មសិទ្ធិ និង​មូលបត្របំណុល។

លោកបានថ្លែងបន្តទៀតថា៖«យើងក៏រំពឹងថា នឹងមានក្រុមហ៊ុនចុះបញ្ជី​លក់​មូលបត្រកម្ម​សិទ្ធិ និងសញ្ញាបណ្ណសាជីវកម្ម ក៏ដូចជា​សញ្ញាបណ្ណ​តាមវិស័យជា បន្តបន្ទាប់ក្នុងឆ្នាំ២០២៤ នេះផងដែរ»។

«យើងក្រលេកមើល ទិន្នន័យទីផ្សារវិញ បរិមាណជួញដូរភាគហ៊ុន​ប្រចាំថ្ងៃ​ជា​មធ្យម​គិតត្រឹម ៤ខែ ឆ្នាំ២០២៤ មានប្រមាណ ១0ម៉ឺនដុល្លារកាយហ៊ុន​ រីឯបរិមាណជួញដូរ​ភាគហ៊ុនប្រចាំថ្ងៃជាមធ្យមក្នុងខែ ឧសភានេះមាន​ការ​កើន​ឡើង ​ប្រមាណ ២៦ ម៉ឺនដុល្លារអាមេរិក ។ ចំនួនគណនីជួញដូរ​មាន​ការ​កើនឡើងគួរឱ្យកត់ សម្គាល់ ដោយ​ក្នុង​១ខែ​មានអ្នកបើកគណនី​ប្រមាណ១ពាន់នាក់»។ ​ ​នេះបើយោងតាមលោកសុហួរ។

​​គិតមកត្រឹមថ្ងៃទី២៨ ខែឧសភា  CSX មានក្រុមហ៊ុន​ចុះបញ្ជីចំនួ  ២៣ ដែលរួមមាន​ក្រុមហ៊ុនចំនួន១១បានចុះបញ្ជីជាភាគហ៊ុន និងក្រុមហ៊ុន១២ ទៀតបានចុះបញ្ជីជា​សញ្ញាបណ្ណ ​ និងបានប្រមូលទុន​ពីផ្សារ​មូលបត្រសរុបប្រមាណជា ៤០០លានដុល្លារ​អាមេរិក៕