ព័ត៌មានអន្ដរជាតិ

តម្លៃប្រេងឡើងតិចតួច ដោយសារការរំពឹងទុកពីកំណើនតម្រូវការនៅរដូវក្ដៅ

បានផុស

៣ ខែ មុន

នៅ

ថ្ងៃចន្ទ ១ កក្កដា ២០២៤

ដោយ

តម្លៃប្រេងជួញដូរនៅព្រលឹមថ្ងៃចន្ទដើមសប្ដាហ៍នេះ បានកើនឡើងតិចតួច ដោយអ្នកជំនាញចង្អុលបង្ហាញទៅលើការព្យាករនៃឱនភាពផ្គត់ផ្គង់ ដែលកើតចេញតម្រូវការប្រេងឥន្ធនៈខ្ពស់នៅរដូវក្តៅ ខណៈអង្គការនៃប្រទេសអ្នកនាំចេញប្រេងកាត និងសម្ព័ន្ធមិត្ត (OPEC+) បន្តកាត់បន្ថយផលិតកម្មប្រេងរបស់ខ្លួន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគតរបស់ Brent បានកើនឡើង ១៦ សេន ឬ ០,២ ភាគរយ ដោយជួញដូរនៅតម្លៃ ៨៥,១៦ ដុល្លារ/បារ៉ែល ខណៈប្រេងឆៅអាមេរិក West Texas Intermediate (WTI) ជួញដូរនៅតម្លៃ ៨១,៧១ ដុល្លារ/បារ៉ែល ដោយកើនឡើង ១៧ សេន ឬ ០,២ ភាគរយ។

តម្លៃម៉ាកប្រេងអន្តរជាតិធំៗទាំង២ បានកើនឡើងប្រហែល ៦ ភាគរយក្នុងខែមិថុនា ដោយម៉ាក Brent បានជួញដូរលើសពី ៨៥ ដុល្លារ/បារ៉ែល ក្នុងរយៈពេល២សប្តាហ៍ចុងក្រោយនេះ បន្ទាប់ពី OPEC+ បានបន្តការកាត់បន្ថយផលិតកម្មប្រេងទ្រង់ទ្រាយធំរបស់ខ្លួនរហូតដល់ចុងឆ្នាំ ២០២៥។

យុទ្ធសាស្រ្តរបស់ OPEC+ នាំឱ្យអ្នកវិភាគព្យាករពីឱនភាពនៃការផ្គត់ផ្គង់នៅក្នុងត្រីមាសទី ៣ ដោយសារតម្រូវការប្រេងខ្ពស់ក្នុងវិស័យដំណឹកជញ្ជូន និងវិស័យផ្សេងៗទៀតក្នុងអំឡុងពេលរដូវក្តៅ ធ្វើឱ្យស្តុកប្រេងឥន្ធនៈធ្លាក់ចុះ។

អ្នកវិភាគខ្លះគូសបញ្ជាក់ថា ការរំពឹងទុកនៃការកាត់បន្ថយអត្រាការប្រាក់ដោយធនាគារកណ្តាលអាមេរិក និងការកើនឡើងនៃកង្វល់ភូមិសាស្ត្រនយោបាយនៅក្នុងទ្វីបអឺរ៉ុប និងរវាងអ៊ីស្រាអែល និងក្រុមហេសបូឡាហ៍របស់លីបង់ ក៏ជាកត្តាធ្វើឱ្យតម្លៃប្រេងឡើងផងដែរ៕

Related Topics: