ទេសចរបរទេសជាង ៥២ ម៉ឺននាក់ ទិញសំបុត្រចូលទស្សនារមណីយដ្ឋានអង្គរ កើនជាង ៣៥% នៅឆមាសទី០១ ឆ្នាំនេះ

ភ្ញៀវទេសចរបរទេសជាង ៥២ ម៉ឺននាក់ បានទិញសំបុត្រចូលទស្សនារមណី​យដ្ឋាន​អង្គរ​នៅក្នុងឆមាសទី០១ ឆ្នាំ ២០២៤ ​ដែលជួយឱ្យគ្រឹះស្ថានអង្គររក​ចំណូលបាន​ជាង ២៤ លានដុល្លារ កើនឡើងជាង ៣៦ភាគរយ បើធៀបនឹងរយៈពេល​ដូចគ្នាកាលពីឆ្នាំមុន។

យោង​តាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃទី ០១ ខែកក្កដា ឆ្នាំ ២០២៤ ​បង្ហាញ​ថា ​នៅក្នុងឆមាស​ទី០១ ឆ្នាំ ២០២៤ (គិតចាប់ពីខែមករា-មិថុនា) ​មានភ្ញៀវទេសចរបរទេសចំនួន ៥២១ ៩៥០ នាក់ បាន​ទិញ​សំ​​បុត្រ​ចូល​ទស្សនា​រមណីយដ្ឋាន​អង្គរ មានការកើនឡើង ៣៥,៣០ ភាគរយ ខណៈប្រាក់ចំណូលទទួលបានពីការលក់សំបុត្រចំនួន ២៤ ៣៥៧ ៦៩៥ដុល្លារ កើន ៣៦,២៥ ភាគរយ បើធៀបនឹងរយៈពេលដូចគ្នានៅឆ្នាំ ២០២៣។

លោក ខៀវ ធី ប្រធាន​សមាគម​មគ្គុទ្ទេសក៏ទេសចរណ៍​អង្គរប្រាប់កម្ពុជាថ្មីនៅថ្ងៃទី ០១ ខែកក្កដា ឆ្នាំ ២០២៤នេះថា ​កំណើនទេសចរបានកើនឡើងជាលំដាប់ដោយសារតែកម្ពុជាមានសុខសន្តិភាពពេញលេញ។

លោក ខៀវ ធី បញ្ជាក់ថា៖ «កាលណាប្រទេសយើងមានសុខសន្តិភាព មានសន្តិសុខល្អ ទេសចរគេមកលេងអត់មានបញ្ហាកើតឡើង គេទៅវិញណែនាំមិត្តភក្ដិ ក្រុមគ្រួសារបងប្អូនគេនឹងមកលេងដែរ អញ្ចឹងហើយបានជាទេសចរកើនឡើង»។

បើតាមលោក ខៀវ ធី ប្រាសាទបុរាណអង្គរ និងម្ហូបខ្មែរ ក៏ជាកត្តាទាក់ទាញទេសចរ ដែលធ្វើឱ្យសេដ្ឋកិច្ចជាតិរីកចម្រើន និងនាំឱ្យចំណូលប្រជាពលរដ្ឋល្អប្រសើរ។

យោងតាមក្រសួងទេសចរណ៍ នៅក្នុងរយៈពេល ៥ ខែ (គិតចាប់ពីខែមករា-ឧសភា) ដើមឆ្នាំ ២០២៤ កម្ពុជាទទួលទេសចរអន្តរជាតិជាង ២,៦៤ លាននាក់ កើនឡើង ២២,១ ភាគរយ ធៀបនឹងរយៈពេលដូចគ្នានៅឆ្នាំ ២០២៣។

ក្នុងចំណោមទេសចរជាង ២ លាននាក់ ទេសចរថៃឈរនៅ​លំដាប់​លេខរៀងទី ១ មានចំនួន ៥៨៨ ៣១២ នាក់ កើន ៣,២ ភាគរយ វៀតណាមចំនួន ៤១៤ ៣៦៦ នាក់ កើន ៤៣ ភាគរយ ចិន ២៦០ ៤៥៥ កើន ៤១,៥ ភាគរយ ឡាវ ១១៧ ៧២៥ កើន ៤៦ ភាគរយ និងអាមេរិក ចំនួន ៨២ ៨៦២ កើន ២០ ភាគរយ។ នេះបើយោងតាមរបាយការណ៍ក្រសួងទេសចរណ៍ចេញផ្សាយរយៈពេល ៤ ខែ ដើមឆ្នាំ ២០២៤។

នៅក្នុងឆ្នាំ ២០២៣ កម្ពុជា​ទទួលបាន​ភ្ញៀវទេសអន្តរជាតិចំនួន ៥,៤៥​ លាននាក់ កើន ១៣៩,៥ ភាគរយ ចំណែកឯ​ថវិកា​​​ប្រមាណ ៣,០៨​ ពាន់​លាន​ដុល្លារ កើន ៨៧,៥ ភាគរយធៀបនឹងឆ្នាំ ២០២២៕

អត្ថបទ៖ ឡេង ដេត