ព័ត៌មានអន្ដរជាតិ

ថៃ ដាក់គោលដៅពាណិជ្ជកម្មជាមួយម៉ាឡេស៊ី ឱ្យបាន ៣០ ប៊ីលានដុល្លារនៅឆ្នាំក្រោយ

បានផុស

៦ ម៉ោង មុន

នៅ

ថ្ងៃអង្គារ ២ កក្កដា ២០២៤

ដោយ

រដ្ឋាភិបាលថៃ គ្រោងនឹងចូលរួមក្នុងកិច្ចប្រជុំគណៈកម្មាធិការពាណិជ្ជកម្មរួម (JTC) ជាមួយប្រទេសម៉ាឡេស៊ី នាថ្ងៃព្រហស្បតិ៍ខានស្អែកនេះ ក្នុងគោលបំណងបង្កើនទំហំពាណិជ្ជកម្មទ្វេភាគី ឱ្យឈានដល់ ៣០ ប៊ីលានដុល្លារនៅឆ្នាំ ២០២៥។ នេះបើតាមការចុះផ្សាយរបស់សារព័ត៌មាន The Thaiger។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំដែលនឹងធ្វើឡើងនៅទីក្រុងគូឡាឡាំពួ នឹងចូលរួមដោយរដ្ឋមន្ត្រីក្រសួងពាណិជ្ជកម្មថៃ លោក Phumtham Wechayachai ដែលនេះក្លាយនឹងជាកិច្ចប្រជុំ JTC របស់ប្រទេសថៃជាផ្លូវការជាមួយប្រទេសអាស៊ានសម្រាប់ឆ្នាំនេះ។ កិច្ចប្រជុំនេះ រំពឹងថានឹងបង្កើនទំហំពាណិជ្ជកម្មរវាងប្រទេសទាំង២ពី ២៥ ប៊ីលានដុល្លារក្នុងឆ្នាំ ២០២៣ ដល់ ៣០ ប៊ីលានដុល្លារនៅឆ្នាំក្រោយ ខណៈពន្លឿនការនាំផលិតផលកសិកម្មថៃបន្ថែម ចូលទៅកាន់ទីផ្សាររបស់ម៉ាឡេស៊ី។

ជាងនេះទៅទៀត ប្រទេសទាំង២នឹងស្វែងយល់ពីភាពជាដៃគូថ្មី ក្នុងគោលបំណងផ្តល់ផលប្រយោជន៍ដល់សេដ្ឋកិច្ច និងសហគ្រិនរបស់ពួកគេ ដែលនេះស្របតាមគោលនយោបាយរបស់ លោក Phumtham ក្នុងការលើកកម្ពស់ពាណិជ្ជកម្ម កាត់បន្ថយរបាំងពាណិជ្ជកម្ម និងសម្រួលពាណិជ្ជកម្មទ្វេភាគី។

កិច្ចប្រជុំដដែល ក៏នឹងផ្តល់វេទិកាសម្រាប់ពង្រឹងទំនាក់ទំនងសេដ្ឋកិច្ចតាមបណ្តោយព្រំដែនផងដែរ ដោយវានឹងរួមបញ្ចូលការបង្កើតក្រុមការងារស្តីពីពាណិជ្ជកម្ម និងការវិនិយោគឆ្លងព្រំដែន ក៏ដូចជាការសាងសង់ផ្លូវតភ្ជាប់ច្រកត្រួតពិនិត្យអន្តោប្រវេសន៍ Sadao ក្នុងខេត្តសង់ខ្លា ទៅប៉ុស្តិ៍ត្រួតពិនិត្យរបស់ម៉ាឡេស៊ី។

គួរគូសបញ្ជាក់ថា ម៉ាឡេស៊ីឈរគឺជាដៃគូពាណិជ្ជកម្មកំពូលរបស់ថៃក្នុងតំបន់អាស៊ាន និងឈរនៅលំដាប់ទី៤លើពិភពលោក។ កាសែតបាងកកប៉ុស្តិ៍ បានរាយការណ៍ថា ពាណិជ្ជកម្មរវាងប្រទេសទាំង២បានឈានដល់ ២៥ ប៊ីលានកាលពីឆ្នាំមុន និងឈានដល់ ១០,៧៨៧ ប៊ីលានដុល្លារ ក្នុងរយៈពេល ៥ ខែដំបូងក្នុងឆ្នាំនេះ៕

Related Topics: