ព័ត៌មានអន្ដរជាតិ

ការលក់ iPhone របស់ Apple នៅចិន កើនឡើងជាថ្មីនៅខែឧសភា ក្រោមយុទ្ធសាស្រ្តបញ្ចុះតម្លៃ

បានផុស

៣ ខែ មុន

នៅ

ថ្ងៃអង្គារ ២ កក្កដា ២០២៤

ដោយ

ការលក់ទូរស័ព្ទម៉ាក iPhone របស់ក្រុមហ៊ុនបច្ចេកវិទ្យា Apple នៅចិន បានកើនឡើងប្រហែល ៤០ ភាគរយនៅក្នុងខែឧសភា ខណៈការលក់ស្មាតហ្វូនគ្រប់ម៉ាកក្នុងប្រទេសដដែលកើនឡើង ១៣ ភាគរយ។ នេះបើយោងតាមការគណនារបស់សារព័ត៌មាន Bloomberg ដោយផ្អែកលើតួលេខថ្មីពីបណ្ឌិត្យសភាបច្ចេកវិទ្យាព័ត៌មាន និងទំនាក់ទំនងរបស់ចិន ដែលជាក្រុមស្រាវជ្រាវមានទំនាក់ទំនងជាមួយរដ្ឋាភិបាលចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកើនឡើងនេះ កើតឡើងក្រោយកំណើន ៥០ ភាគរយនៃការលក់ស្មាតហ្វូនរបស់ Apple ក្នុងខែមេសា ដែលវាជាសញ្ញានៃការស្ទុះងើបឡើងវិញនៃទីផ្សារ iPhone ក្រៅសហរដ្ឋអាមេរិក។

ទោះជាយ៉ាងណាក៏ដោយ អ្នកជំនាញគូសភ្ជាប់នឹងកំណើននៃការលក់នេះ ទៅនឹងយុទ្ធនាការបញ្ចុះតម្លៃ iPhone ទ្រង់ទ្រាយធំក្នុងប្រទេសចិន របស់ Apple ដើម្បីវាយលុកទីផ្សារឡើងវិញ ដែលធ្វើឱ្យគេថ្លឹងថ្លែងលើប្រាក់ចំណេញរបស់ក្រុមហ៊ុន។

គួររំឭកថា ការលក់ទូរស័ព្ទម៉ាក iPhone បានធ្លាក់ចុះ ១០ ភាគរយនៅទូទាំងពិភពលោកក្នុងត្រីមាសទី ១ ដោយសារការលក់ចិនហាក់ដូចជាចុះខ្សោយ ដែលបណ្ដាលមកពីការប្រកួតប្រជែងដណ្ដើមចំណែកទីផ្សារខ្លាំងក្លាពីក្រុមហ៊ុនហ៊ុនក្នុងស្រុក ដូចជាក្រុមហ៊ុន Huawei ជាដើម។

Apple ពឹងផ្អែកខ្លាំងលើការលក់ iPhone ក្នុងប្រទេសចិន ដែលជាទីផ្សារធំទី៣របស់ខ្លួន ដោយរួមចំណែកលើប្រាក់ចំណូលសរុបបន្ទាប់ពីអាមេរិក និងអឺរ៉ុប។ នៅឆ្នាំ ២០២៣ Apple រកចំណូលពីចិនបានចំនួន ៧២,៥៦ ប៊ីលានដុល្លារ ធៀបនឹងប្រាក់ចំណូលសរុប ៣៨៣,៣ ប៊ីលានដុល្លារ ខណៈទីផ្សារនៅអាមេរិករកបាន ១៦២,៦ ប៊ីលានដុល្លារ ហើយអឺរ៉ុបរកបាន ៩៤,៣ ប៊ីលានដុល្លារ៕