បន្លែផលិតក្រោមឆ័ត្រ «សហគមន៍កសិកម្មទំនើប» នឹងដាក់លក់នៅរា​ជធានីភ្នំពេញ

លោក ឃឹម ហ្វីណង់ អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ បានឱ្យដឹងនៅថ្ងៃទី ០៤ ខែកក្កដា ឆ្នាំ ២០២៤​នេះថា បន្លែចម្រុះរបស់កសិករនៅស្រុកត្រាំកក់ ដែលផលិត​ក្រោម​ឆ័ត្រ«សហគមន៍កសិកម្មទំនើប» នឹងត្រូវដាក់លក់ ចែកចាយផ្ទាល់នៅរាជធានីភ្នំពេញ​ជារៀង​រាល់ថ្ងៃ​ក្នុងម្លៃសមរម្យ ចាប់ពីខែសីហា ឆ្នាំ ២០២៤ ខាងមុខ។

លោក ឃឹម ហ្វីណង់ បានអះអាងថា ការចងក្រងជាសហគមន៍កសិកម្មទំនើប នឹងអាចការប្រកួតប្រជែងជាមួយបន្លែនាំចូលដោយមិនបាច់បិទការនាំចូល ខណៈដំណាំមាន​ប្រភពច្បាស់លាស់ មិនបន្លំ ដាំដោយខ្មែរ គុណភាពល្អជាង និងមានលក់គ្រប់រដូវមិនចេះដាច់។

អ្នកនាំពាក្យរូបនេះ បញ្ជាក់ថា សហគមន៍កសិកម្មទំនើបគឺជារនាំងពិតប្រាកដ និងយូរអង្វែង តាមរយៈ​ការធ្វើឱ្យកសិករខ្លាំង ទោះបីមានការនាំចូលក៏ប្រជែងមិនឈ្នះបន្លែក្នុងស្រុក ខណៈតម្លៃលក់​ដូចបន្លែនាំចូល។

យោងតាមតារាងតម្លៃមុខទំនិញរបស់ធនាគារ ាARDB ចេញផ្សាយនៅថ្ងៃទី ០៤ ខែកក្កដា ឆ្នាំ ២០២៤ តម្លៃត្រកួនចិនលក់រាយថ្លៃ ៣.០០០ រៀល ក្នុងមួយគីឡូក្រាម ស្ពៃចង្កឹះ ២.៨០០ រៀលក្នុងមួយគីឡូក្រាម ស្ពៃបូកគោ ៣.០០០ រៀល ស្ពៃក្រញាញ់ ៣.៥០០ រៀល ក្នុងមួយគីឡូក្រាម ស្ពៃក្ដោប ២.៥០០ រៀល ក្នុងមួយគីឡូក្រាម ឆៃថាវ ៣.០០០ រៀល ក្នុងមួយគីឡូក្រាម។

រាជរដ្ឋាភិបាលបានដាក់ចេញគោលនយោបាយការអភិវឌ្ឍសហគមន៍កសិកម្មទំនើប ក្នុងការ​អនុវត្តផលិតកម្មកសិកម្មរួមគ្នាក្នុងទ្រង់ទ្រាយធំនៅក្នុងវិស័យកសិកម្ម និងមានគោល​បំណង​ប្រែក្លាយវិស័យកសិកម្មកម្ពុជាពីលក្ខណៈគ្រួសារឱ្យទៅជាសហគ្រាស​សេដ្ឋកិច្ចក​សិកម្មដ៏រឹងមាំ។

កម្មវិធីគោលនយោបាយនេះ ត្រូវបានរំពឹងទុកថា នឹងជួយលើកកម្ពស់​កម្រិត​ជីវភាពប្រជាកសិករ ក៏ដូចជានឹងបង្កើនប្រសិទ្ធភាពផលិតកម្មប្រកប​ដោយភាតរបរិស្ថាន និងចីរភាព៕

អត្ថបទ៖ ឡេង ដេត