ព័ត៌មានអន្ដរជាតិ

អាជ្ញាធររសិង្ហបុរី រឹបអូសបារីអេឡិចត្រូនិកតម្លៃជាង ៤,៤ លានដុល្លារ ក្នុងខែមិថុនា

បានផុស

៨ ខែ មុន

នៅ

ថ្ងៃសុក្រ ៥ កក្កដា ២០២៤

ដោយ

អាជ្ញាធរសិង្ហបុរី បានរឹបអូសបារីអេឡិចត្រូនិកជាង ៣៥០ ០០០ ដើម អំឡុងពេលចុះបង្រ្កាបនៅតាមទីតាំងផ្សេងៗក្នុងខែមិថុនា ដែលជាផ្នែកមួយនៃកិច្ចប្រឹងប្រឹងហាមឃាត់ការប្រើប្រាស់បារីប្រភេទនេះ។ នេះបើតាមការឱ្យដឹងរបស់អាជ្ញាធរវិទ្យាសាស្ត្រសុខាភិបាល (HSA) កាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បារីអេឡិចត្រូនិកដែលរឹបអូសបាន មានតម្លៃសរុបប្រមាណ ៦ លានដុល្លារសិង្ហបុរី ឬប្រមាណជាង ៤,៤ លានដុល្លារអាមេរិក។ ហើយមុនពេលរឹបអូស អ្នកជួញដូរបានដាក់លក់បារីទាំងនោះ នៅលើបណ្ដាញទំនាក់ទំនងតេឡេក្រាម។

HSA បានគូសបញ្ជាក់ថា ការចុះបង្រ្កាបចាប់ពីថ្ងៃទី ១៤-១៩ ខែមិថុនា នៅទីតាំង៣ផ្សេងៗគ្នា បានរំខានដល់បណ្តាញចែកចាយបារីអេឡិចត្រូនិក ដ៏ធំបំផុតមួយនៅក្នុងប្រទេស។ បារីអេឡិចត្រូនិកចំនួន ១៤ ដើម ដែលសង្ស័យថាមានផ្ទុកសារធាតុញៀន tetrahydrocannabinol (THC) ដែលធ្វើឱ្យប៉ះពាល់ខ្លាំងដល់ដំណើរការខួរក្បាល និងផ្លូវចិត្ត ក៏ត្រូវបានរកឃើញ ហើយប្រគល់ទៅឱ្យការិយាល័យគ្រឿងញៀនកណ្តាល (CNB) ផងដែរ។

បើតាម HSA ផលិតផលបារីអេឡិចត្រូនិក ដែលមានតម្លៃជាង ១៨ លានដុល្លារសិង្ហបុរី ត្រូវបានរឹបអូសចាប់តាំងពីខែមករា ដើមឆ្នាំមក ខណៈអាជ្ញាធរបានព្រមានថា ការនាំចូល ចែកចាយ ការលក់ ឬការផ្សាយពាណិជ្ជកម្មផលិតផលបារីអេឡិចត្រូនិក ត្រូវបានហាមឃាត់។

អ្នករងការផ្តន្ទាទោសជាលើកដំបូងពីបទនាំចូល ចែកចាយ ឬលក់ផលិតផលបារីប្រភេទដដែល អាចប្រឈមនឹងការផាកពិន័យរហូតដល់ ១០ ០០០ ដុល្លារសិង្ហបុរី ឬជាប់គុករហូតដល់ ៦ ខែ ឬទាំង២។ ហើយបើល្មើសជាលើកទី២ និងជាបន្តបន្ទាប់ អ្នកដែលរងការផ្តន្ទាទោស អាចប្រឈមនឹងការផាកពិន័យរហូតដល់ ២០ ០០០ ដុល្លារសិង្ហបុរី ឬជាប់ពន្ធនាគាររហូតដល់ ១២ ខែ ឬទាំង២។

ចំណែកឯការទិញ ប្រើប្រាស់ និងកាន់កាប់បារីអេឡិចត្រូនិក វិញ ក៏ខុសច្បាប់ផងដែរ ដោយមានពិន័យជាអតិបរមាចំនួន ២ ០០០ ដុល្លារសិង្ហបុរី៕

Related Topics:បារីអេឡិចត្រូនិក