ព័ត៌មានអន្ដរជាតិ

អង្ករនាំចេញរបស់វៀតណាម បន្តឡើងថ្លៃនៅឆមាសទី១

បានផុស

៧ ខែ មុន

នៅ

ថ្ងៃអង្គារ ៩ កក្កដា ២០២៤

ដោយ

ស្ថិតិពីអគ្គនាយកដ្ឋានគយវៀតណាម បានបង្ហាញថា តម្លៃអង្ករនាំចេញរបស់វៀតណាម បានបន្តកើនឡើងយ៉ាងខ្លាំងនៅតាមបណ្ដាទីផ្សារបរទេសជាច្រើន ក្នុងឆមាសទី១នៃឆ្នាំនេះ។ នេះបើតាមការចុះផ្សាយរបស់កាសែត Việt Nam News កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃអង្ករនាំចេញជាមធ្យម បានកើនឡើងជាង ១៨ ភាគរយ បើធៀបទៅនឹងឆមាសទី១ដូចគ្នាកាលពីឆ្នាំមុន។ គិតក្នុង១តោនៗ អង្ករវៀតណាម លក់ក្នុងតម្លៃ ៩៥៩ ដុល្លារអាមេរិកនៅប្រ៊ុយណេ ៨៦៨ ដុល្លារនៅសហរដ្ឋអាមេរិក ៨៥៧ ដុល្លារនៅហូឡង់ ៨៤៧ ដុល្លារនៅអ៊ុយក្រែន ៨៣៦ ដុល្លារនៅអ៊ីរ៉ាក់ និង ៨៣១ ដុល្លារនៅតួកគី។

ក្នុងឆមាសទី១ដដែល ការនាំចេញអង្កររបស់វៀតណាម សម្រេចបាន ៤,៧លានតោន កើនឡើង ១០,៤ភាគរយ បើធៀបនឹងរយៈពេលដូចគ្នាកាលពីឆ្នាំមុន ជាមួយនឹងចំណូលប្រមាណជិត ៣ ប៊ីលានដុល្លារ ដែលស្មើនឹងកំណើន ៣២ ភាគរយ។

ក្នុងនោះ ការនាំចូលទៅតំបន់អឺរ៉ុប មានកំណើនគួរឱ្យកត់សម្គាល់។ ក្នុងត្រីមាសទី១ ការនាំចេញអង្កររបស់វៀតណាមទៅប្រទេសបារាំង បានកើនឡើងយ៉ាងខ្លាំងដល់១៨ ២០០តោន ក្នុងតម្លៃ ១៩,១ លានដុល្លារ ខណៈក្នុងរយៈពេល៣ខែដើមឆ្នាំដូចគ្នា ការនាំចេញអង្ករទៅសហភាពអឺរ៉ុបទាំងមូល មានប្រមាណ ៤៦ ០០០ តោន រកចំណូលបាន ៤១,៤ លានដុល្លារ ដែលកើនឡើងជិត ១១៨ ភាគរយ បើធៀបនឹងរយៈពេលដូចគ្នាកាលពីឆ្នាំមុន។

យោងតាមការិយាល័យពាណិជ្ជកម្មវៀតណាមប្រចាំសហភាពអឺរ៉ុប ពូជអង្ករក្រអូបពិសេសរបស់វៀតណាមជាច្រើនមុខ ត្រូវប៉ាន់មានគេចូលចិត្តច្រើននៅលើទីផ្សារ ដោយសារគុណភាពលេចធ្លោ ដែលនាំឱ្យអង្ករវៀតណាមលក់ក្នុងតម្លៃខ្ពស់។

ស្ថិតិដដែលពីអគ្គនាយកដ្ឋានគយ បង្ហាញផងដែរថា នៅត្រីមាសទី១ វៀតណាមបាននាំចេញអង្ករទៅកាន់ទីផ្សារអាមេរិកដល់ទៅ ១៣៥ ៣០០ តោន ដោយកើបចំណូល ៩៤,៥ លានដុល្លារ កើនឡើងខ្ពស់កប់ពពក រហូតដល់ ២៩៩ ភាគរយ ធៀបនឹងរយៈពេលដូចគ្នានៅឆ្នាំមុន។

គួរគូសបញ្ជាក់ថា បើនិយាយពីបរិមាណ វៀតណាមជាប្រទេសផលិតអង្ករធំជាងគេទី៥របស់ពិភពលោក និងជាប្រទេសនាំចេញអង្ករដ៏ធំបំផុតលំដាប់ទី៣ បន្ទាប់ពីថៃ និងឥណ្ឌា។ បច្ចុប្បន្ន តម្លៃអង្ករពិភពលោកនៅតែបន្តកើនឡើង ដោយសារតែគ្រោះរាំងស្ងួត និងបញ្ហារំខានដល់ការផ្គត់ផ្គង់ផ្សេងៗ ដែលជាក្ដីបារម្ភសម្រាប់សន្ដិសុខស្បៀង៕

Related Topics:វៀតណាម