ទំហំពាណិជ្ជកម្មអន្តរជាតិកម្ពុជា សម្រេចបានទឹកប្រាក់ជាង ២៦ ពាន់លានដុល្លារ

នៅក្នុងឆមាសទី ០១ ឆ្នាំ ២០២៤ ​ទំហំ​ពាណិជ្ជកម្ម​អន្តរជាតិ​របស់​កម្ពុជា សម្រេចបានទឹកប្រាក់ជាង ២៦ ពាន់​លានដុល្លារ កើនឡើងជាង ១២,៧ ភាគរយ បើប្រៀបធៀបរយៈពេលដូចគ្នាកាលពីឆ្នាំមុន។ នេះ​បើយោងតាម​ទិន្ន​​ន័យ​របស់អគ្គនាយកដ្ឋាន​គយ និង​រដ្ឋាករ​កម្ពុជា ​(GDCE) ចេញផ្សាយ​​នៅថ្ងៃ​ទី១០ ខែកក្កដា ឆ្នាំ ២០២៤។

ទិន្នន័យដដែលបង្ហាញថា ​ទំហំនៃការនាំចេញ-នាំចូលសរុបនេះ ក្នុងនោះទំនិញ​កម្ពុជា​នាំចេញមានទំហំទឹកប្រាក់ជាង ១២,២៩ ពាន់លានដុល្លារ កើនឡើង ១២,៦ ភាគរយ ចំណែកឯទំនិញនាំចូលពីក្រៅប្រទេសមានទំហំទឹកប្រាក់ចំនួន ១៣,៧៩ ពាន់លានដុល្លារ កើន ១២,៨ ភាគរយ។

អ្នកជំនាញសេដ្ឋកិច្ចនៅរាជ្យបណ្ឌិតសភាកម្ពុជា លោកបណ្ឌិត ហុង វណ្ណៈ ប្រាប់កម្ពុជាថ្មីនៅថ្ងៃទី ១០ ខែកក្កដា ឆ្នាំ ២០២៤នេះថា ពាណិជ្ជកម្មកម្ពុជាមានលក្ខណៈប្រសើរមួយកម្រិត ខណៈកម្រិតឱនភាពពាណិជ្ជកម្មមានតិចតួច។

លោកបញ្ជាក់ថា ប្រសិនបើស្ថានភាពបែបនេះ បន្តរហូតដល់ដាច់ឆ្នាំ មានន័យថា ដំណើរនៃសង្វាក់ផលិតកម្មនៅកម្ពុជាបន្តមានសន្ទុះ ដែលអាចធានាការផ្គត់ផ្គង់ផលិតផលសម្រាប់ការនាំចេញជាមួយគុណភាព។

លោកបណ្ឌិត ហុង វណ្ណៈ បានឱ្យដឹងថា កម្ពុជានាំចេញសម្លៀកបំពាក់កាត់ដេរ​ សម្ភារធ្វើដំណើរ ដែលសុទ្ធតែជាទំនិញឈានមុខ ដែលកម្ពុជាមានទីផ្សារនៅអឺរ៉ុប និងសហរដ្ឋអាមេរិក។ ក្រៅពីនេះ មានគ្រឿងបង្គុំ បន្ទះសូឡា និងផលិតផលកសិផល ដែលកម្ពុជាត្រូវខិតខំបន្ថែមទៀត ជំរុញក្នុងការនាំចេញ ដែលអាចបង្កើតការងារក្នុងស្រុកសម្រាប់ប្រជាពលរដ្ឋ។

លោក ឃឹម ហ្វីណង់ អ្នកនាំពាក្យក្រសួងកសិកម្ម មានប្រសាសន៍ថា ការបើកទីផ្សារថ្មី និងស្ដង់ដារផលិតផលកសិផលរបស់កម្ពុជា ជំរុញឱ្យមានកំណើននាំចេញ៕

អត្ថបទ៖ ឡេង ដេត