ព័ត៌មានអន្ដរជាតិ

វៀតណាម ហ្វីលីពីន ព្រមព្រៀងគ្នាបង្កើតសម្ព័ន្ធឧស្សាហកម្មអង្ករ

បានផុស

៦ ខែ មុន

នៅ

ថ្ងៃព្រហស្បតិ៍ ១១ កក្កដា ២០២៤

ដោយ

រដ្ឋមន្ត្រីក្រសួងកសិកម្មវៀតណាម និងហ្វីលីពីន បានព្រមព្រៀងគ្នាបង្កើតសម្ព័ន្ធឧស្សាហកម្មអង្កររវាងប្រទេសទាំង២ ដើម្បីលើកកម្ពស់ទំនាក់ទំនងពាណិជ្ជកម្មទៅជាដៃគូវិនិយោគក្នុងឧស្សាហកម្មអង្ករ។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឯកភាពនេះ ធ្វើឡើងក្នុងអំឡុងកិច្ចពិភាក្សាកាលពីថ្ងៃអង្គារនៅទីក្រុងហាណូយ រវាងរដ្ឋមន្ត្រីក្រសួងកសិកម្ម និងអភិវឌ្ឍន៍ជនបទវៀតណាម លោក Lê Minh Hoan និងរដ្ឋមន្ត្រីក្រសួងកសិកម្មហ្វីលីពីន លោក Francisco Tiu Laurel Jr។

វាស្របទៅនឹងសំណើរបស់លោក Francisco ដែលបានសុំឱ្យវៀតណាមបង្កើតសម្ព័ន្ធភាពឧស្សាហកម្មអង្កររវាងប្រទេសទាំង២ ដើម្បីនឹងជំរុញទំនាក់ទំនងពាណិជ្ជកម្មអង្ករទៅជាដៃគូវិនិយោគ ក្នុងបំណងដោះស្រាយបញ្ហាប្រឈមនានា ដែលឧស្សាហកម្មកសិកម្មហ្វីលីពីនកំពុងជួបប្រទះ រួមទាំងផលិតភាពទាប និងផលិតកម្មររាត់ររាយ ដែលសុទ្ធតែជាបន្ទុកលើសន្តិសុខស្បៀង។

លោក Hoan យល់ស្របជាមួយ លោក Francisco ដោយបាននិយាយថា ភាពជាដៃគូវិនិយោគក្នុងឧស្សាហកម្មអង្ករ នឹងអនុញ្ញាតឱ្យវៀតណាមបញ្ជូនបច្ចេកវិទ្យាបង្កើនប្រសិទ្ធភាពសង្វាក់ផលិតកម្មស្រូវទៅហ្វីលីពីន បន្ថែមពីលើការនាំចេញអង្ករតែមួយមុខ។

រដ្ឋមន្រ្តីវៀតណាមដដែល បាននិយាយថា ឧស្សាហកម្មអង្ករវៀតណាមកំពុងមានការផ្លាស់ប្តូរយ៉ាងសំខាន់ក្នុងផលិតកម្ម ការប្រើប្រាស់ក្នុងស្រុក និងការនាំចេញ ក្នុងបរិបទនៃការប្រែប្រួលយ៉ាងឆាប់រហ័សរបស់ទីផ្សារពិភពលោក រសនិយមរបស់អ្នកប្រើប្រាស់ ក៏ដូចជាការប្រែប្រួលអាកាសធាតុជាដើម។

លោក Hoan បានថ្លែងថា ហ្វីលីពីនគឺជាប្រទេសនាំចូលអង្ករដ៏ធំបំផុតរបស់វៀតណាម ដោយរួមចំណែកពី ៣៥-៤០ ភាគរយនៃការនាំចេញអង្ករសរុបរបស់ប្រទេស។ ឆមាសទី១ឆ្នាំនេះ វៀតណាមនាំចេញអង្ករប្រមាណ ៤,៦៨ លានតោន ក្នុងតម្លៃ ២,៩៨ ប៊ីលានដុល្លារ ដោយកើនឡើង ១០៤ ភាគរយ។

ជុំវិញបញ្ហានេះដូចគ្នា លោក Francisco បានគូសបញ្ជាក់ថា ហ្វីលីពីនបាននាំចូលអង្ករចំនួន ២,១៧ លានតោននៅក្នុងឆមាសទី១ ឆ្នាំនេះ ដោយ ១,៥៩ លានតោនក្នុងនោះ នាំចូលពីវៀតណាម ដែលជាប្រទេសផ្គត់ផ្គង់អង្ករធំជាងគេដល់ហ្វីលីពីន អស់រយៈពេលរាប់សិបឆ្នាំមកហើយ៕