វិស័យធនាគារ​មានកំណើនប្រសើរឡើងវិញក្នុងឆមាសទី១ ទោះបីបញ្ហាប្រឈមនៃសេដ្ឋកិច្ចសកលនៅបន្ត

គ្រឹះស្ថានធនាគារនៅកម្ពុជាបានបង្ហាញអំពីស្ថានភាពប្រសើរឡើងនៃប្រតិបត្តិការអាជីវកម្មរបស់ខ្លួនកាលពីឆមាទី១កន្លងទៅនេះ ទោះបីជាបញ្ហាប្រឈមនៃកំណើនយឺតនៃ សេដ្ឋកិច្ច  ដែលនៅបន្តរងឥទ្ធិពេលពីការអូសបន្លាយពេល​​​នៃ​សង្រ្គា​មរវាងរុស្ស៊ី-អ៊ុយក្រែន​ ការបន្តឡើង កំដៅនៃបញ្ហាភូមិសាស្រ្តនយោបាយនិងបញ្ហាសង្រ្គាមពាណិជ្ជកម្មរវាងប្រទេសលោកខាងលិចជាមួយប្រទេសចិនក្តី។

ស្ថានភាពប្រសើរឡើងនៃផ្នែកឥណទាន និងការថមថយនៃឥណទានមិនដំណើការ(NPL)

លោក តូច ចៅចេកប្រធាននាយកប្រតិបត្តិធនាគារ ប្រៃសណីយ៍កម្ពុជាបានលើកឡើងថា​ជាទូរទៅស្ថានភាពនៃប្រតិបត្តិការរបស់វិស័យធនាគារនេះមានកំណើនធម្មតាប្រហាក់ប្រែលទៅនឹងឆ្នាំមុន ដោយគុណភាពឥណទានមានការប្រែប្រួលតិចតួច។​

លោកថា៖«ការណ៍នេះមានន័យថាកាលពីឆ្នាំមុនគឺមានការប្រែប្រួលខ្លាំងដោយយើងឃើងថាឥណទានមិនដំណើការកើនឡើងខ្លាំង ហើយសម្រាប់ឆ្នាំ២០២៤នេះនៅតែមានទំនោរ នៃការ កើនឡើងប៉ុន្តែអត្រានៃកំណើននោះគឺវាមានស្ថេរភាព វាកើនតិចតួចបំផុត។ អ្វីដែលល្អសម្រាប់ ឆ្នាំ២០២៤នេះគឺថ្លៃដើមនៃប្រភពមូលនិធិយើងធ្លាក់ចុះ ដូច្នេះបណ្តាធនាគារនានាសង្ឃឹម ថានឹងមានប្រាក់ចំណេញ»។

លោកបានពន្យល់ថា ចំពោះមូលហេតុដែលធ្វើឱ្យ ថ្លៃដើមនៃប្រភពមូលនិធិធ្លាក់ចុះ ដោយសារ តែមានវិនិយោគិននៅស្រុកយើងគាត់មើលថាសេដ្ឋកិច្ចមិនសូវអំណោយផលដូច្នេះអតិថិជន​យកលុយដាក់នៅធនាគារបានការប្រាក់ច្រើន​ដែលជាហេតុធ្វើឱ្យប្រាក់សន្សំរបស់នៅក្នុង​វិស័យនេះតាំងពីឆ្នាំ​មុនមានការកើនឡើងខ្ពស់ជាងប្រាក់កម្ចីដូច្នេះធនាគារ សល់លុយ ច្រើនក្នុងដៃ ជាហេតុធ្វើឱ្យធនគារភាគច្រើនទាំងលោកទាំងគេបន្ថយអត្រាការប្រាក់សន្សំ។ ​

លោកបានថ្លែងបន្តទៀតថា៖«នៅពេលដែលយើងបន្ថយអត្រាការប្រាក់សន្សំក៏ល្អដល់អ្នកខ្ចីដែរនិងការទទួលបានអត្រាការប្រាក់ក៏ធូរជាងមុនដែរ។ យើងសង្ឃឹមថាបន្តិចទៀតការសង ត្រឡប់អាចនឹងល្អប្រសើរឡើងវិញ»។ ​

បើយោងតាមលោក​តូច​ ចៅចេក សម្រាប់ធនាគារប្រៃសណីយ៍គឺផ្តល់ឥណទានទៅ គ្រប់វិស័យទាំងអស់ ប៉ុន្តែក្រុមប្រឹក្សាភិបាលរបស់លោកបានធ្វើការរឹតត្បិតបន្តិចទៅ លើវិស័យអចលនទ្រព្យ និងខាងឥណទានគេហដ្ឋាន។

លោកថា៖«ការណ៍នេះមិនមែនមានន័យថាយើងមិនផ្តល់ទៅលើវិស័យនេះទេ គ្រាន់តែ យើង ប្រយ័ត្នប្រយែងបន្តិចលើការផ្តល់កម្ចី ឧទាហរណ៍ថាឆ្នាំមុនវិស័យនេះការផ្តល់ ឥណទាន យើងកើនប្រមាណជា១៥ភាគរយ ប៉ុន្តែឆ្នាំនេះយើងថាវានឹងនៅតែកើនក្នុងរង្វង់៦ភាគរយ»។

ការប្រើប្រាស់ប្រព័ន្ធបច្ចេកវិទ្យាហិរញ្ញវត្ថុចូលរួមជម្រុញកំណើននៃឧស្សាហកម្មនេះ

ធនាគារ​ ABA បាន​រាយការណ៍ពីកំណើនដ៏រឹងមាំដែលជំរុញដោយយុទ្ធសាស្រ្តឌីជីថលរបស់ខ្លួន ដោយ​អ្នកប្រើប្រាស់កម្មវិធីទូរស័ព្ទបានកើនឡើង ៣៤ភាគរយក្នុងឆមាសទី១ឆ្នាំនេះធៀប នឹងឆ្នាំមុន​ ដែលឆ្លុះបញ្ចាំងពីការកើនឡើងនៃការទទួលយករបស់អតិថិជននូវ ដំណោះស្រាយ ធនាគារតាមអ៊ីនធឺណិត។

លោក Igor Zimarev ប្រធានផ្នែកទីផ្សារ និង CSR នៅធនាគារ ABA មានប្រសាសន៍ថា ​ប្រព័ន្ធ អេកូឡូស៊ី និងសេវាកម្មដ៏ងាយស្រួលរបស់ខ្លួនបន្តទាក់ទាញអតិថិជនថ្មី។ លោកថាសម្រាប់ ប្រតិបត្តិការហិរញ្ញវត្ថុរបស់ធនាគារបានបន្ទរពីភាពជោគជ័យឌីជីថលរបស់ខ្លួន។ ប្រាក់កម្ចីបាន កើនឡើង ៥,៦ភាគរយ ដោយសម្រេបានចំនួនឥណទានសរុបកើដល់ ៨,៣ពាន់លានដុល្លារ អាមេរិក ខណៈដែលប្រាក់បញ្ញើរបស់អតិថិជនកើនឡើង ៦,៥ភាគរយសម្រេចបានដល់ ៩,៨​ ពាន់លានដុល្លារ។ ​

ទោះបីជាមានការថមថយសេដ្ឋកិច្ចក៏ដោយ ធនាគារមួយនេះបានមើលឃើញពីការកើនឡើង នៃប្រតិបត្តិការដោយមិនប្រើសាច់ប្រាក់ ដោយដំណើរការប្រតិបត្តិការ ABA PAY នៅឆមាសទី១ ឆ្នាំនេះមានកំណើនជាង ១២៦ភាគរយ បើប្រៀបធៀបទៅនឹងឆ្នាំ ២០២៣។ ​

លោក Igor បានសង្កត់ធ្ងន់ថា៖«យើងនៅតែមើលឃើញនិន្នាការកំណើន​​ហើយមូលដ្ឋាន អតិថិជនរបស់យើងក៏មានកំណើនគួរឱ្យចាប់អារម្មណ៍ផងដែរ​ ដោយកើនឡើងប្រមាណ ៣២ភាគរយធៀបនឹងរយៈពេលដូចគ្នាកាលពីឆ្នាំ​ ដោយចំនួនអតិថិជនសរុបឈានដល់ ៤លាននាក់»។

​​ទស្សនៈវិស័យធនាគារកណ្តាល

ថ្លែង​នៅ​ក្នុងកម្មវិធីខួប ៣០ ឆ្នាំនៃការបង្កើតសមាគមធនាគារនៅកម្ពុជាកាលពីខែមេសា លោកស្រី ជា សិរី អគ្គ​ទេសាភិបាលធនាគារជាតិនៃ​កម្ពុជាក៏​បាន​ថ្លែង​កត់​សម្គាល់ពី​ការរីក​ចម្រើន​នៃ​ប្រព័ន្ធធនាគារនៅកម្ពុជា​ក្នុងរយៈ​ពេល ៣ ០ឆ្នាំនេះ ដោយបាន​បន្តរក្សាបាននូវភាព ធន់ និងបោះជំហានទៅមុខជាលំដាប់ ក្នុងការរួមចំណែកជំរុញសកម្មភាពសេដ្ឋកិច្ច។

លោកស្រី​អះអាង​ថា ការបន្តកើនឡើងនូវទ្រព្យសកម្ម ឥណទាន និង​ប្រាក់បញ្ញើ នៅក្នុងប្រព័ន្ធ ធនាគារបាន​បង្ហាញយ៉ាងច្បាស់​នូវជំនឿទុកចិត្តរបស់សាធារណជន និងវិនិយោគិនមកលើ ប្រព័ន្ធធនាគារ និង​ការងើបឡើងវិញ​នៃសេដ្ឋកិច្ចនៅកម្ពុជា។

បើ​តាមសមាគមធនាគារកម្ពុជា គិតត្រឹមឆ្នាំ២០២៣ ទ្រព្យសកម្ម​ក្នុង​ប្រព័ន្ធ​ធនាគារ​មាន​ទំហំ ៨៤,៣ ប៊ីលាន​ដុល្លារអាមេរិក ឬជាង ២៦៥ % នៃផលិតផលក្នុងស្រុកសរុប (GDP) ខណៈ​ឥណទាន​អតិថិជន​កើនដល់ ៥៧,៦ ប៊ីលានដុល្លារអាមេរិក ឬជាង ១៨០% នៃផលិតផលិត​ផលក្នុងស្រុកសរុប ដែលមានប្រជាជនប្រើប្រាស់ប្រមាណជា ៣,៨ លាន គណនី។ រីឯប្រាក់បញ្ញើបានកើនឡើងដល់ ៤៧,៩ ប៊ីលានដុល្លារអាមេរិក ដែលមានប្រមាណជា ១៨,៦ លានគណនី​៕