ព័ត៌មានអន្ដរជាតិ

ប្រាក់ចំណេញរបស់ក្រុមហ៊ុនឈីបយក្ស TSMC កើនឡើង ៣០ ភាគរយ ដោយសារកំណើនតម្រូវការឈីប AI

បានផុស

៨ ខែ មុន

នៅ

ថ្ងៃចន្ទ ១៥ កក្កដា ២០២៤

ដោយ

ប្រាក់ចំណេញរបស់ក្រុមហ៊ុនផលិតបន្ទះឈីបយក្សតៃវ៉ាន់ TSMC រំពឹងថានឹងកើនឡើង ៣០ ភាគរយនៅត្រីមាសទី២ ឆ្នាំនេះ ដោយសារតែកំណើននៃតម្រូវការបន្ទះឈីបទំនើបប្រើក្នុងកម្មវិធីបញ្ញាសិប្បនិម្មិត (AI)។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

TSMC ដែលជាក្រុមហ៊ុនទទួលផលិតបន្ទះឈីបធំបំផុតរបស់ពិភពលោក រំពឹងថានឹងរាយការណ៍ពីប្រាក់ចំណេញប្រមាណ ៧,២៥ ប៊ីលានដុល្លារ (២៣៦,១ ប៊ីលានដុល្លារតៃវ៉ាន់) សម្រាប់ត្រីមាសទី២ ចន្លោះពីខែមេសា ដល់ខែមិថុនា។ នេះបើយោងតាមក្រុមហ៊ុនវិភាគទិន្នន័យ LSEG SmartEstimate។ ក្នុងត្រីមាសដូចគ្នាកាលពីឆ្នាំមុន TSMC រកប្រាក់ចំណេញបានប្រមាណ ១៨១,៨ ប៊ីលានដុល្លារតៃវ៉ាន់។

គួររំឭកថា កាលពីសប្ដាហ៍មុន TSMC ត្រូវបានរាយការណ៍ពីកំណើននៃប្រាក់ចំណូលនៅត្រីមាសទី ២ ដែលល្អប្រសើរជាងការរំពឹងទុករបស់ទីផ្សារ ក្នុងចំនួនប្រមាណ ៦៧៣,៥១ ប៊ីលានដុល្លារ (២០,៦៧ ប៊ីលានដុល្លារ) ចន្លោះពីខែមេសា ដល់ខែមិថុនា។ នេះបើយោងតាមការគណនារបស់រ៉យទ័រ ដែលថា ចំនួននេះស្មើនឹងកំណើនប្រមាណ ៣២ ភាគរយ ធៀបនឹងរយៈពេលដូចគ្នាកាលពីឆ្នាំមុន។

ខណៈតម្រូវការបន្ទះឈីប AI បន្តកើនឡើង ប្រាក់ចំណូល និងចំណេញរបស់ TSMC ក៏រំពឹងថានឹងស្ថិតនៅក្នុងស្ថានភាពអំណោយផលផងដែរ នៅត្រីមាសទី៣ បន្ទាប់នេះ។ គេមើលឃើញថា ការរីកចម្រើនរបស់ AI បានជួយជំរុញតម្លៃភាគហ៊ុនរបស់ក្រុមហ៊ុនដែលចុះបញ្ជីនៅក្រុងតៃប៉ិដដែល រហូតដល់ ៧៥ ភាគរយមកទល់ពេលនេះ ដែលវាជាការហក់ឡើងខ្ពស់បំផុតជាប្រវត្តិសាស្រ្តរបស់ក្រុមហ៊ុន។

ដើម្បីជាផ្នែកមួយនៃការពង្រីកខ្លួន ក្នុងបំណងប្រកួតប្រជែងកាន់តែខ្លាំង ក្រុមហ៊ុន TSMC កំពុងចំណាយប្រាក់រាប់ពាន់លានដុល្លារក្នុងការសាងសង់រោងចក្រថ្មីៗនៅបរទេស រួមទាំង ៦៥ ប៊ីលានដុល្លារលើរោងចក្រចំនួន៣ក្នុងរដ្ឋអារីហ្សូណា សហរដ្ឋអាមេរិក ទោះបីជាក្រុមហ៊ុននិយាយថា ការផលិតភាគច្រើននឹងនៅតែមានក្នុងកោះតៃវ៉ាន់ក៏ដោយ៕