​សិប្បកម្មកែច្នៃសំបកដបទឹកសុទ្ធធ្វើអំបោសប្រឈមនឹងការធ្លាក់ចុះនៃតម្រូវការ

សហគ្រិនខ្មែរ លោក ហាស់ គា អាយុ៤១ឆ្នាំ ម្ចាស់សិប្បកម្មកែច្នៃសំបកដបទឹកសុទ្ធធ្វើអំបោស ប្រាប់ឱ្យដឹងថា បច្ចុប្បន្នផលិតផលអំបោសធ្វើចេញអំពីសំបកដបទឹកសុទ្ធ ហាក់មិនសូវមានទីផ្សារដូចឆ្នាំកន្លងទៅ ខណៈដែលការលក់តាមអនឡាញក៏ធ្លាក់ចុះគួរឱ្យកត់សម្គាល់។

លោក ហាស់ គា ម្ចាស់សិប្បកម្មកែច្នៃសំបកដបជួយបរិស្ថាន បានប្រាប់ កម្ពុជាថ្មី ថា សិប្បកម្មផលិតអំបោសចេញពីដបទឹកសុទ្ធ បច្ចុប្បន្ននេះ ហាក់មិនសូវមានទីផ្សារខ្ពស់ដូចកាលចាប់ផ្ដើមដំបូងអំឡុងឆ្នាំ ២០២៣ កន្លងទៅ។

លោក បន្តថា សម្រាប់ពេលបច្ចុប្បន្ននេះ អំបោសរបស់លោក គឺអាចលក់ចេញបានត្រឹមចន្លោះពី ៣០ ទៅ ៥០ដើម ខណៈពេលកន្លងទៅ អាចលក់ចេញបានជាង ២០០ដើម ក្នុងមួយថ្ងៃ។

មូលហេតុនៃការធ្លាក់ចុះការលក់បែបនេះ លោក ហាស់ គា បានប្រាប់ឱ្យដឹងថា បណ្ដាលមកពីការធ្វើអាជីវកម្មតាមអនឡាញមានការប្រែប្រួល ទើបនាំឱ្យការលក់អំបោស ក៏មានការធ្លាក់ចុះយ៉ាងខ្លាំង ក្នុងអំឡុងឆ្នាំ ២០២៤នេះ។

លោក ហាស់ គា បានបញ្ជាក់ទៀតថា សម្រាប់តម្លៃអំបោសដែលចេញទៅកាន់ទីផ្សារ ចន្លោះពី ១ម៉ឺនរៀល​ ទៅ ១ម៉ឺនប្រាំពាន់រៀល ក្នុងមួយដើម។

ម្ចាស់សិប្បរូបនេះ បានបញ្ជាក់ដែរ លោកបានចំណាយដើមទុនជាង ៣ម៉ឺនដុល្លារ ដើម្បីទិញសម្ភារៈ មានដូចជា៖ សំបកដបទឹកសុទ្ធ ដើមឬស្សី ដើម្បីស្ដុកទុកក្នុងសិប្បកម្ម សម្រាប់ផលិតចេញជាអំបោសលក់ចេញទៅកាន់ទីផ្សារ។

គួរបញ្ជាក់ថា សិប្បកម្មកែច្នៃសំបកដបទឹកសុទ្ធជួយបរិស្ថាន គឺជាសិប្បកម្មមួយ ដែលបានជួយផ្ដល់ការងារដល់ស្ត្រីក្នុងសហគមន៍ និងរួមចំណែកក្នុងការជួយបរិស្ថាន បច្ចុប្បន្នស្ថិតនៅភូមិព្រៃទា ២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ៕

អត្ថបទ ៖ សួស សិត