គម្រោងខុនដូបើកថ្មីចំនួន ៣ ផ្គត់ផ្គង់ជាង ២ ពាន់យូនីតចាក់ចូលទីផ្សារក្នុងឆមាសទី១

ចំនួនខុនដូសរុប ២ ២០០ យូនីត ពីគម្រោង Time Square 7, Capital Center City និង L Tower TTP ត្រូវបានផ្គត់ផ្គង់ទៅលើទីផ្សារអចលនទ្រព្យនៅក្នុងឆមាសទី១ ឆ្នាំ ២០២៤។ នេះបើយោងតាមរបាយការណ៍របស់ក្រុមហ៊ុន CBRE Cambodia ចេញ​ផ្សាយ​នៅថ្ងៃទី ១៦ ខែកក្កដា ឆ្នាំ ២០២៤។

កញ្ញា គឹម គិនកេសា ប្រធានគ្រប់គ្រងជាន់ខ្ពស់នៃផ្នែកស្រាវជ្រាវ និងជាទីប្រឹក្សា នៅក្រុមហ៊ុន CBRE Cambodia ប្រាប់កម្ពុជាថ្មីថា សកម្មភាពបើកលក់ថ្មី មានការថយថយចុះច្រើន បើប្រៀបធៀបជាមួយឆ្នាំមុនៗ។ កញ្ញាបញ្ជាក់ថា សកម្មភាពទិញលក់មានសន្ទុះជាងមុនបន្តិច ប៉ុន្តែភាគច្រើនជាការលក់ត្រឡប់ទៅវិញ។

កញ្ញា គឹម គិនកេសាប្រាប់ថា គម្រោងថ្មីៗ នៅក្នុងកម្រិតមធ្យមនៅឡើយ ដោយសារតែ​មិនមានគម្រោងបើកថ្មី នៅចំពេលដែលគ្មានទុនវិនិយោគពីបរទេសលើវិស័យមួយនេះ។

បើតាម កញ្ញា គឹម គិនកេសា នៅក្នុងរយៈពេលខ្លី ខុនដូអាចមានចំណាប់អារម្មណ៍​ទីផ្សារក្នុងស្រុក ច្រើនជាងមុន ដោយសារតែតម្លៃធូរថ្លៃជាងមុន ហើយទីតាំងក៏ល្អៗ ខណៈប្រជាជនឥឡូវបានប្ដូររបៀបរស់នៅដោយចាប់ផ្ដើមទិញខុនដូដើម្បីរស់នៅផ្ទាល់ខ្លួន ដែលជាសញ្ញាល្អ ក្នុងការគាំទ្រទីផ្សារខុនដូជាជាងពឹងផ្អែកពីវិនិយោគិនបរទេស។

អ្នកជំនាញរូបនេះ បញ្ជាក់ថា៖ «រយៈពេលវែង ខ្ញុំគិតថា នៅតែមានបរទេសគាត់វិនិយោគ គ្រាន់តែថា ការវិនិយោគរបស់គាត់ វាអាចមានលក្ខណៈ ជ្រើសរើសជាងមុន ទាក់ទង​នឹងគុណភាព ទីតាំងខុនដូដែលគាត់ទិញ»។

ក្នុងឆមាសទី១ ឆ្នាំ ២០២៤ តម្លៃខុនដូជាមធ្យមសម្រាប់តម្លៃ ២ ៧០០ ដុល្លារ កម្រិតមធ្យមជិត ២ ពាន់ដុល្លារ និងតម្លៃសមរម្យ ១ ៤៥០ ដុល្លារ ក្នុងមួយម៉ែត្រការ៉េ។ ជាមួយគ្នានេះ តម្លៃនៃការលក់ខុនដូប្រណីត បានកើនឡើងតិចតូច ០,៣% កម្រិតមធ្យមធ្លាក់ចុះជិត ៦% និងតម្លៃសមរម្យនៅត្រឹម ៩,៩%។

លោក ឡោ វិចិត្រ ប្រធានសមាគម​អចលនទ្រព្យសកល រាជធានីភ្នំពេញយល់ឃើញថា ទីផ្សាខុនដូនៅកម្ពុជាពឹងផ្អែកលើអតិថិជនក្រៅប្រទេសជាងក្នុងស្រុក។ លោកថា នៅពេលណាដែល លំហូរភ្ញៀវអន្តរជាតិមិនមានកំណើននោះទេ ដូច្នេះការបើក​គម្រោងថ្មី ក៏ឆ្លុះបញ្ចាំងទៅតាមហ្នឹងដែរ។​

លោក ឡោ វិចិត្រ បញ្ជាក់ថា ទីផ្សារខុនដូនៅកម្ពុជាអាស្រ័យលើ​កំណើនភ្ញៀវ​ទេស​ចរ និងការវិនិយោគពីអន្តរជាតិ។ ហើយថា ប្រសិនបើកម្ពុជាមិនយកថ្លៃ Visa សម្រាប់​ភ្ញៀវទេសចររយៈពេល ១៤ ថ្ងៃ ទៅ ៣០ ថ្ងៃ ក៏ជាការជំរុញភាពទាក់ទាញទេសចរមួយផ្នែកដែរ។

យោងតាមរបាយការណ៍ពីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា វិស័យសំណង់របស់កម្ពុជាបានទាក់ទាញការវិនិយោគសរុបចំនួន ១,៨១ ពាន់លានដុល្លារអាមេរិកក្នុងរយៈពេល ៥ ខែដំបូងនៃឆ្នាំ ២០២៤ធ្លាក់ចុះ ២០,២ ភាគរយដោយថយពី២,២៧ ពាន់លានដុល្លារក្នុងរយៈពេលដូចគ្នាកាលពីឆ្នាំមុន ទោះបីជាស្ថានភាពសេដ្ឋកិច្ចសកលនិងក្នុងតំបន់ហាក់មានសភាពមិនប្រាកដប្រជា។

ទិន្នន័យដដែលបង្ហាញថា រដ្ឋាភិបាលបានផ្តល់អាជ្ញាប័ណ្ណដល់គម្រោងសាងសង់ចំនួន ១៣៣០ ក្នុងអំឡុងពេលខែមករាដល់ខែឧសភាឆ្នាំនេះផងដែរ ដែលធ្លាក់ចុះ ៩ ភាគរយដោយថតពី ១៤៦៣​ គម្រោងក្នុងរយៈពេលដូចគ្នាកាលពីឆ្នាំមុន។

យោងតាមទិន្នន័យ រយៈពេល៥ខែ ឆ្នាំ២០២៤ គម្រោងទទួលបានការអនុញ្ញាតសាងសង់សរុប មានចំនួន ១ ៣៣០ គម្រោង ក្នុងនោះ មានគម្រោងលំនៅដ្ឋាន ១ ០៩៥ គម្រោង (មានបុរីចំនួន ១ ០៦១ គម្រោង និងខុនដូ ៣៤ គម្រោង), សំណង់ឧស្សាហកម្ម ៨៨ គម្រោង, សំណង់ពាណិជ្ជកម្ម ៩០ គម្រោង, សំណង់ទេសចរណ៍ ២១ គម្រោង, សំណង់សាធារណៈ ៣៥ គម្រោង និងសំណង់វិនិយោគ ១ គម្រោង៕

អត្ថបទ៖ ឡេង ដេត