ព័ត៌មានអន្ដរជាតិ

ហេតុអ្វីចិននាំចូលទុរេនច្រើន?

បានផុស

៨ ខែ មុន

នៅ

ថ្ងៃព្រហស្បតិ៍ ១៨ កក្កដា ២០២៤

ដោយ

Huon Dina

តម្រូវការទុរេនដ៏អនេកពីសំណាក់អ្នកបរិភោគក្នុងស្រុកចិន ប្រហែលជាចម្លើយសម្រាប់សំនួរដែលថា ហេតុអ្វីបានជាចិននាំចូលទុរេនច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ មានកត្តាជាច្រើន ដែលប្រទេសដ៏ធំបំផុតជាងគេទី២នៅអាស៊ីបើផ្អែកលើផ្ទៃដីមួយនេះ នាំចូលទុរេនច្រើនរាប់ពាន់លានដុល្លារក្នុង១ឆ្នាំៗ ពីប្រទេសដាំទុរេនសំខាន់ៗដូចជាថៃ វៀតណាម ម៉ាឡេស៊ី និងឥណ្ឌូណេស៊ីជាដើម។

ខណៈទុរេនដាំក្នុងស្រុកចាប់ផ្ដើមដាក់លក់នៅលើទីផ្សារចិនកាលពីឆ្នាំមុន វានៅតែពិបាករកទិញ ដោយសារតែទិន្នផលទាបខ្លាំង និងតម្លៃខ្ពស់កប់ពពកធៀបនឹងទុរេននាំចូល។

ការដាំទុរេនដើម្បីលក់នៅចិន ចាប់ផ្ដើមក្នុងឆ្នាំ ២០១៨ និងបានប្រមូលផលកាលពីឆ្នាំមុន ជាមួយនឹងទិន្នផលត្រឹមតែ ៥០ តោនប៉ុណ្ណោះ។ ទោះបីទិន្នផលរំពឹងថានឹងកើនដល់ ២០០ តោននៅឆ្នាំនេះក៏ដោយ វានៅតែស្ថិតក្នុងកម្រិតទាបខ្លាំង បើធៀបនឹងទំហំទុរេន ដែលចិននាំចូលពីអាស៊ីអាគ្នេយ៍ប្រមាណ ១,៤ លានតោន កាលពីឆ្នាំមុន។

កាសែតវៀតណាម VnExpress បានរាយការណ៍ជុំវិញបញ្ហានេះ ដោយស្រង់សម្ដី នាយកវិទ្យាស្ថានដើមឈើហូបផ្លែត្រូពិកនៃបណ្ឌិត្យសភាវិទ្យាសាស្ត្រកសិកម្មខេត្ត Hainan លោក Feng Xuejie ដែលបានកត់សម្គាល់ថា៖ «ទិន្នផលនៅតិចណាស់ ព្រោះដើម(ទុរេន)មិនទាន់ធំល្មម។ វាត្រូវចំណាយពេល៦ឬ៧ឆ្នាំ ដើម្បីឱ្យទិន្នផលចាប់ផ្តើមរីកចម្រើន»។

ដោយសារតែទិន្នផលទាប ទុរេនចិនមានតម្លៃខ្ពស់ខ្លាំង ដោយបច្ចុប្បន្នលក់ក្នុងតម្លៃពី ១២០-១៤០ យន់ (១៦,៥-១៩,២៥ ដុល្លារ)/គីឡូក្រាម ពោលគឺថ្លៃជាងទុរេននាំចូលពីថៃដល់ទៅ៣ដង។ លោក Feng រំពឹងថា តម្លៃនេះនឹងទំនងជាធ្លាក់ចុះនៅពេលដែលផលិតកម្មកើនឡើងក្នុងរយៈពេល ២ ទៅ ៣ ឆ្នាំខាងមុខ ប៉ុន្តែគោលដៅនេះអាចនឹងរំខានដោយបញ្ហាប្រឈមផ្សេងៗជាច្រើន។

ទុរេនក្នុងស្រុកចិន ភាគច្រើនដាំដុះនៅខេត្ត Hainan ដែលជាខេត្តចិនតែមួយគត់ដែលមានអាកាសធាតុត្រូពិកសមរម្យ ដែលអាចអំណោយផលសម្រាប់ការដាំដុះដំណាំហូបផ្លែប្រភេទនេះ។ កាសែតថៃ The Nation បានរាយការណ៍ថា ខណៈចិនមានគំនិតផ្ដួចផ្ដើមជំរុញការដាំទុរេន សមត្ថភាពនៅមានកម្រិតរបស់ប្រទេស ក៏ដូចជាបញ្ហាធាតុអាកាស រួមទាំងការគំរាមកំហែងពីព្យុះទីហ្វុង បង្កជាឧបសគ្គយ៉ាងសំខាន់។

ទុរេនក៏ត្រូវការដី និងធាតុអាកាសជាក់លាក់ ដើម្បីលូតលាស់ ហើយខេត្ត Hainan មិនជាល្អសម្រាប់ផ្លែឈើប្រភេទនេះនោះទេ។ លោក Feng បាននិយាយថា៖ «ដីដែលអាចដាំដុះបាន មានតិចតួចណាស់ [នៅក្នុងប្រទេសចិន]» ហើយឧបសគ្គធម្មជាតិទាំងនេះហើយ ដែលរារាំងផលិតកម្មទុរេនក្នុងស្រុកមិនឱ្យពង្រីកទៅជាទ្រង់ទ្រាយធំ។

អ្នកជំនាញដដែល បានកត់សម្គាល់ថា៖ «យើងមិនអាចប្រកួតប្រជែងជាមួយអាស៊ីអាគ្នេយ៍លើបរិមាណបានទេ។ តម្លៃដី និងកម្លាំងពលកម្មក៏ខ្ពស់ជាងដែរ នៅក្នុងប្រទេសចិន»។

យ៉ាងណាមិញ លោកគូសបញ្ជាក់ថា ផលិតកម្មទុរេននៅចិន នឹងមិនរងផលប៉ះពាល់ដោយសារតែការនាំចូលពីអាស៊ីអាគ្នេយ៍នោះទេ។ លោកថា ឧស្សាហកម្មទុរេនក្នុងស្រុក គួរតែផ្តោតលើការដាំដុះទុរេនមានគុណភាពខ្ពស់ ហើយលក់ក្នុងតម្លៃថ្លៃវិញ។

កន្លងមក កាសែត South China Morning Post បានរាយការណ៍ដោយស្រង់សម្ដីកសិករដាំទុរេនម្នាក់នៅខេត្ត Hainan ដែលនិយាយថា គុណភាពទុរេន Hainan មិនទាន់ល្អនៅឡើយទេ ដោយសារតែការដាំដុះស្ថិតក្នុងដំណាក់កាលដំបូងនៃការឆ្ពោះទៅមុខបន្តទៀត។ កសិករដដែលបន្ថែមថា ការស្រាវជ្រាវ និងពិសោធន៍បច្ចេកទេសកសិកម្មបន្ថែមទៀត មានភាពចាំបាច់ ដើម្បីបង្កើនគុណភាពផ្លែឈើប្រភេទនេះ៕