ធានារ៉ាប់រងកសិកម្មចាប់ផ្ដើមមានការចាប់អារម្មណ៍ពីកសិករ

លោក នី លីហួង អគ្គនាយកធា​នា​រ៉ាប់​រងខ្នាតតូច និងកសិកម្ម នៃក្រុមហ៊ុន Forte បានឱ្យដឹងនៅថ្ងៃទី ១៨ ខែកក្កដា ឆ្នាំ ២០២៤ថា ការធានារ៉ាប់រងកសិកម្ម​មាន​ការ​​ចូលរួមច្រើនក្នុងរយៈពេល ២ ឆ្នាំចុងក្រោយនេះ ដែលធានារ៉ាប់រង​ទៅលើដំណាំស្រូវ​របស់​ប្រ​ជា​កសិករនៅខេត្តបាត់ដំបង ខេត្តកំពង់ធំ និងខេត្តព្រៃវែង។

លោក នី លីហួងប្រាប់ថា នៅឆ្នាំ ២០២៣ មានកសិករចូលរួមប្រើសេវាធានារ៉ាប់រងដំណាំស្រូវ ៥ ម៉ឺន ៦ ពានន់នាក់ ហើយនៅឆ្នាំ ២០២៤ មានកសិករ ៧ ម៉ឺន ៦ ពាន់នាក់ បានចូលរួម ដែលមានទំហំទឹកប្រាក់ប្រមូលបានពីកសិករក្រោម ១ លានដុល្លារ​ ពោលគឺនៅមានកំណើនទាបនៅឡើយ។

លោក នី លីហួង ថ្លែងថា៖ «ដំណាំស្រូវនៅកម្ពុជា ភាគច្រើននៅពឹងផ្អែកទៅលើមេឃ អញ្ចឹង​អ្វី​ដែលយើងធានា គឺធានា​ថា បើសិនជាទឹកភ្លៀងខ្វះរហូតដល់ស្រូវលូតលាស់មិនបានល្អ អញ្ចឹង​យើងផ្ដល់សំណងជូនគាត់ ដើម្បី​យកទៅបូបទឹក​ដាក់ស្រែ ទិញជី ឬទិញពូជ»។

លោក នី លីហួង បញ្ជាក់ថា ការធានរ៉ាប់រងលើកសិកម្មគឺជាផលិតផលថ្មី ដែលក្រុមហ៊ុន​លោក​កំពុង​ជំរុញទៅលើដំណាំផ្សេងទៀត ដូចជាស្វាយចន្ទី ស្វាយ ដំឡូងមី និងដំណាំពោតជាដើម។

យោងតាមនិយ័ត​ករ​ធានា​រ៉ាប់​​រង​កម្ពុជា​វិស័យធានារ៉ាប់រងរបស់កម្ពុជា​មានកំណើនទាប​នៅឆ​មាសទី១ ឆ្នាំ ២០២៤នេះ​ដែលសម្រេចបាន​​ទឹកប្រាក់ចំនួន ១៧៨ លានដុល្លារ កើនឡើង​ប្រមាណតែ ១ ភាគរយ ធៀប​នឹង​រយៈ​ពេល​ដូចគ្នា កាលពីឆ្នាំ ២០២៣ មានចំនួន ១៧៦ លានដុល្លារ៕

អត្ថបទ៖ ឡេង ដេត