វៀតណាមស្វាគម​​អ្នកដំណើរជើង​អាកាស​ជាង ៥៤ លាននាក់នៅក្នុងឆមាស​ទី​១​

អាជ្ញាធរអាកាសចរណ៍ស៊ីវិលវៀតណាម (CAAV) បានឱ្យដឹងថា ចំនួន​អ្នកដំណើរ​ដែល​ចុះ​នៅ​អាកាសយានដ្ឋានក្នុង​ស្រុកវៀតណាម​​ បានឈានដល់ជាង ៥៤ លាននាក់ក្នុងរយៈពេល ៦ ខែដំបូងនៃឆ្នាំនេះ ប៉ុន្តែ​ស្មើ​តែ​ ៩៧ ភាគរយ​ នៃ​ចំនួនអ្នក​ដំណើរ​​ក្នុង​រយៈ​ពេលដូច​គ្នា​កាល​ពី​ឆ្នាំ​មុន​ប៉ុណ្ណោះ​។ ​ ​នេះ​បើ​តាម​ការ​ចុះផ្សាយ​របស់​កាសែត​ Viet Nam News។

បើនិយាយពីទីផ្សារក្នុងស្រុក​ ក្រុមហ៊ុនអាកាសចរណ៍វៀតណាមបានដឹកជញ្ជូនអ្នកដំណើរក្នុងស្រុកជាង ១៧ លាននាក់ក្នុងរយៈពេល៦ខែដដែល​ ឬ​ស្មើនឹង ៨២ ភាគរយ បើធៀបនឹងរយៈពេលដូចគ្នាកាលពីឆ្នាំមុន។

ដោយសារការលំបាកផ្សេង​ៗ​ក្នុងកងយន្តហោះ ក្រុមហ៊ុនអាកាសចរណ៍ត្រូវកែសម្រួល និងកាត់បន្ថយជើង​ហោះហើរក្នុងស្រុក ដែលជាហេតុធ្វើឱ្យទីផ្សារក្នុងស្រុកធ្លាក់ចុះ បើធៀបនឹងរយៈពេលដូចគ្នាកាលពីឆ្នាំមុន និងឆ្នាំ ២០១៩​។

យ៉ាង​ណា​មិញ​ ទីផ្សារដឹក​ជញ្ជូន​អន្តរជាតិ បាន​កើន​ឡើង ដោយ​​ក្នុងរយៈពេល៦ខែដំបូងនៃឆ្នាំនេះ អ្នកដំណើរអន្តរជាតិជាង ២០ លាននាក់បានធ្វើដំណើរកាត់​វៀតណាម​​ ដោយ​កើនឡើង ៣៨ ភាគរយ​ ធៀប​នឹង​រយៈ​ពេល​ដូច​​គ្នា​កាល​ពី​ឆ្នាំ​មុន​។ ​

ក្រុមហ៊ុនអាកាសចរណ៍វៀតណាម បានដឹកជញ្ជូនអ្នកដំណើរអន្តរជាតិជិត៩លាននាក់​ ស្មើ​នឹង​កំណើន ២៨ ភាគរយ ដោយ​រួម​ចំណែក​ប្រមាណ​ ៤៤ ភាគរយ នៃទីផ្សារដឹកជញ្ជូនអ្នកដំណើរអន្តរជាតិ។

បើ​តាម Viet Nam News​ ​ក្រុមហ៊ុនអាកាសចរណ៍២ ដែលមានចំណែកទីផ្សារក្នុងស្រុកច្រើនជាងគេ គឺ ក្រុមហ៊ុន Vietnam Airlines (៤២ ភាគរយ) និង​ Vietjet Air 44 ភាគរយ៕