ព័ត៌មានជាតិ

ក្រុមហ៊ុនចិន ៤០ ចង់វិនិយោគលើវិស័យវាយនភណ្ឌនៅកម្ពុជា

បានផុស

២ ខែ មុន

នៅ

ថ្ងៃចន្ទ ២២ កក្កដា ២០២៤

ដោយ

ក្រុមហ៊ុនចិនចំនួន ៤០ មានបំណងចង់វិនិយោគក្នុងវិស័យឧស្សាហកម្មវាយនភណ្ឌនៅកម្ពុជា ដូចជាការផលិតសម្លៀកបំពាក់ អាវរងារ និងស្បែកជើងជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនូបពិភាក្សាការងាររវាងលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ជាមួយគណៈប្រតិភូក្រុមហ៊ុនចិនចំនួន ៤០ នៅព្រឹកថ្ងៃទី ២២ ខែកក្កដា ឆ្នាំ ២០២៤ លោក ជា វុទ្ធី លើកឡើងថា នេះជាលើកទី២ហើយ ក្នុងរយៈពេល ៣ ខែដែលលោកបានទទួលជួបគណៈប្រតិភូដឹកនាំដោយ សភាពាណិជ្ជកម្មចិនសម្រាប់ការនាំចូល នាំចេញវាយនភ័ណ្ឌ ដែលការណ៍នេះ បង្ហាញពីឆន្ទៈក្នុងការស្វែងរកការបណ្ដាក់ទុនវិនិយោគនៅកម្ពុជាយ៉ាងពិតប្រាកដ។

លោក ជា វុទ្ធី បានបញ្ជាក់ថា រំហូរវិនិយោគចិនមកកម្ពុជា និងទំហំពាណិជ្ជកម្មរវាងប្រទេសទាំងពីរដែលមានកំណើនខ្ពស់ជារៀងរាល់ឆ្នាំក្នុងរយៈពេល ១ ទសវត្សរ៍ចុងក្រោយនេះ ហើយក្នុងរយៈពេល ៦ ខែដើមឆ្នាំ ២០២៤ ការវិនិយោគចិនជាប់ចំណាត់ថ្នាក់លេខ១ បើប្រៀបធៀបនឹងការវិនិយោគបរទេសផ្សេងទៀត ដោយសារសុខសន្តិភាព ស្ថិរភាពនយោបាយ និងអំណោយផលនៃច្បាប់វិនិយោគកម្ពុជា។

យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) ការដោះដូរទំនិញទ្វេភាគីរវាងប្រទេសកម្ពុជា-ចិនសម្រេចទឹកប្រាក់បានជាង៧,៣ពាន់លានដុល្លារក្នុងឆមាសទី១ឆ្នាំ២០២៤នេះកើនឡើងជិត១៩ភាគរយធៀបនឹងរយៈពេលដូចគ្នាកាលពីឆ្នាំមុន៕

អត្ថបទ៖ ឡេង ដេត