ក្រុមហ៊ុនអាកាសចរណ៍​ AirAsia បើក​ជើង​ហោះហើរ​ថ្មី សៀមរាប-កោះភូកេតចុងខែតុលា

ក្រុមហ៊ុនអាកាសចរណ៍​ AirAsia ​បានប្រកាសបើកជើងហោះហើរថ្មីពីអាកាសយានដ្ឋានសៀមរាប ទៅកោះភូកេត ប្រទេសថៃ ចាប់ពីថ្ងៃទី ២៩ ខែតុលា ឆ្នាំ ២០២៤ដើម្បីឆ្លើយតបទៅនឹងកំណើននៃតម្រូវការរបស់ភ្ញៀវទេចរ។

តាមគម្រោងក្រុមហ៊ុន AirAsia Cambodia  នឹងចាប់ផ្ដើម​ហោះ​ហើរ​ចាប់ពីថ្ងៃទី ២៩ ខែតុលា ឆ្នាំ ២០២៤ ដែលធ្វើឡើង ៣ ជើងក្នុងមួយសប្ដាហ៍ ក្នុងតម្លៃ ៧០ ដុល្លារសម្រាប់១ ជើង និង ១១២ ដុល្លារ(សម្រាប់តម្លៃទៅ-មក)។

សូមជំរាបផងដែរថា ជើងហោះហើរត្រង់ថ្មីចំនួន ៣ ដែល AirAsia គ្រោងហោះហើរ រួមមាន បាងកក-ហៃដ្រាបាដ ចាប់ផ្ដើមពី​ថ្ងៃទី២៧ ខែតុលា, កោះភូកេត-សៀមរាប ចាប់ផ្ដើមពីថ្ងៃទី២៩ ខែតុលា ឆ្នាំ២០២៤, និងដនមឿង-កោះភូកុក ឬកោះត្រល់ វៀតណាម ដែលបានចាប់ផ្ដើមរួចហើយកាលពីថ្ងៃទី ១៧ ខែ​កក្កដា ឆ្នាំ២០២៤។

ក្រុមហ៊ុន AirAsia Cambodia  បានចាប់ផ្ដើម​ហោះ​ហើរ​ក្នុងស្រុកនៅកម្ពុជាកាលពីថ្ងៃទី ០២ ខែឧសភា ឆ្នាំ ២០២៤ ដោយដំណើរការដំបូង​មានយន្ត​ហោះ​ថ្មីចំនួន ២ គ្រឿង។​ ដោយបានត្រៀម​ជើងហោះហើរ​ប្រចាំថ្ងៃ​ចំនួន ៤ ជើង ក្នុង១ថ្ងៃ គឺ​ពី​ភ្នំពេញ​ទៅ​ខេត្ត​សៀមរាប និង​​​រវាង​ក្រុងព្រះសីហនុ និង​ខេត្តសៀមរាប​៕

អត្ថបទ៖ ឡេង ដេត