ព័ត៌មានអន្ដរជាតិ

អ្នកវិភាគ៖ ការពឹងផ្អែកខ្លាំងលើការនាំចេញទៅចិន អាចឱ្យពាណិជ្ជកម្មឥណ្ឌូណេស៊ីងាយរងគ្រោះ

បានផុស

៧ ខែ មុន

នៅ

ថ្ងៃពុធ ២៤ កក្កដា ២០២៤

ដោយ

អ្នកវិភាគសេដ្ឋកិច្ចឥណ្ឌូណេស៊ីបានព្រមានកាលពីថ្ងៃអង្គារថា ការពឹងផ្អែកខ្លាំងពេកលើការនាំចេញទៅចិន អាចធ្វើឱ្យពាណិជ្ជកម្មរបស់ឥណ្ឌូណេស៊ីស្ថិតនៅក្នុងភាពងាយរងគ្រោះ ពេលដែលសេដ្ឋកិច្ចរបស់ចិនមិនមានស្ថិរភាព។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកវិភាគសេដ្ឋកិច្ចមកពីមជ្ឈមណ្ឌលកំណែទម្រង់សេដ្ឋកិច្ច (CORE) លោក Mohammad Faisal បានលើកឡើងថា ចិនរួមចំណែក ២២,៥ ភាគរយ នៃតម្លៃនាំចេញសរុបរបស់ឥណ្ឌូណេស៊ី ក្នុងឆមាសទី១ ឆ្នាំនេះ ខណៈការនាំចេញទៅចិនរបស់ប្រទេសជាច្រើនផ្សេងទៀត មានត្រឹមតែរង្វង់ ១០-១២ ភាគរយ ប៉ុណ្ណោះ។

លោក Faisal បន្តយ៉ាងដូច្នេះថា៖ «ពេលតម្រូវការពីប្រទេសចិនធ្លាក់ចុះ វាប៉ះពាល់យ៉ាងខ្លាំងដល់ដំណើរការនាំចេញរបស់ឥណ្ឌូណេស៊ី។ នេះគឺជាហេតុផលចម្បង ដែលនៅពីក្រោយការធ្លាក់ចុះនៃការនាំចេញរបស់យើងនាពេលថ្មីៗនេះ»។

យោងតាមទិន្នន័យពីរដ្ឋាភិបាលឥណ្ឌូណេស៊ី អតិរេកពាណិជ្ជកម្មអន្តរជាតិរបស់ប្រទេសបានថយចុះប្រមាណ ៤,៤៦ ប៊ីលានដុល្លារ មកនៅត្រឹម ១៥,៤៥ ប៊ីលានដុល្លារ ក្នុងឆមាសទី១ នៃឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។ខណៈការនាំចេញទៅកាន់ប្រទេសភាគច្រើនបានបន្តកើនឡើង ដូចជាឥណ្ឌា (កើនឡើង ២២ ភាគរយ) ការនាំចេញទៅចិនបានធ្លាក់ចុះ ៤,២ ភាគរយ។

លោក Faisal បានសន្មត់ថា ការផ្គត់ផ្គង់ដ៏ច្រើនលើសលុបនៃទំនិញផលិតក្នុងស្រុកចិនផ្ទាល់ ជាកត្តាកាត់បន្ថយតម្រូវការរបស់ប្រទេសនេះ សម្រាប់ការនាំចូលវត្ថុធាតុដើម។ លោកបន្តថា៖ «ភាពខុសគ្នាសំខាន់ចំពោះលក្ខណៈនៃការនាំចេញរវាងឥណ្ឌូណេស៊ី និងប្រទេសផ្សេងៗដូចជាថៃ ម៉ាឡេស៊ី និងហ្វីលីពីន គឺថា ប្រទេសទាំងនោះមិនពឹងផ្អែកខ្លាំងលើចិននោះទេ»។

ផ្ទុយពីការនាំចេញ ការនាំចូលពីចិនរបស់ឥណ្ឌូណេស៊ី បានកើនឡើងគួរកត់សម្គាល់ក្នុងរយៈពេលប៉ុន្មានខែថ្មីៗនេះ។ ផលិតផលវាយនភណ្ឌ រួមចំណែក ៤១ ភាគរយលើការនាំចូលពីចិនសរុបរបស់ឥណ្ឌូណេស៊ី។ កាលពីខែមិថុនា ឱនភាពពាណិជ្ជកម្មទ្វេភាគីដ៏ធំបំផុតរបស់ឥណ្ឌូណេស៊ី គឺចិន (៦៩៣,៤ លានដុល្លារ)៕