បង្ក្រាបទីតាំងលក់ប្រេងម៉ាស៊ីនក្លែងក្លាយ តាមពាក្យបណ្ដឹងម្ចាស់ក្រុមហ៊ុន

កម្លាំងនាយកដ្ឋាននគរបាលប្រឆាំងបទល្មើសសេដ្ឋកិច្ច បានសហការជាមួយកម្លាំងនគរបាលនៃស្នងការដ្ឋាននគរបាលខេត្តកំពង់ស្ពឺ ចុះបង្ក្រាបទីតាំងស្តុកទុក និងចែកចាយប្រេងម៉ាស៊ីនក្លែងក្លាយមួយកន្លែងរឹបអូសប្រេងម៉ាស៊ីនជាង​៣០០០ប៊ីដុង។ ការចុះបង្ក្រាបនេះបានធ្វើឡើងតាមពាក្យបណ្ដឹងរបស់ក្រុមហ៊ុន K.l.S និងក្រុមហ៊ុន Siam Kubota Corpo​ration ដែលជាម្ចាស់តំណាងសិទ្ធិផ្ដាច់មុខនៃការនាំចូល​។

ប្រតិបត្តិការចុះបង្ក្រាបនេះបានធ្វើឡើងកាលពីព្រឹកថ្ងៃទី២៤ ខែកក្កដា ឆ្នាំ២០២៤ នៅលើទីតាំងដេប៉ូយីហោ ហេង សុខជា ស្ថិតនៅលើផ្លូវជាតិលេខ៤ ភូមិក្រាំងពលទេព សង្កាតរកាធំ ក្រុងច្បារមន ខេត្តកំពង់ស្ពឺ។ ក្នុងប្រតិបត្តិការនេះ កម្លាំងបានឆែកឆេរកឃើញ​ប្រេងម៉ាស៊ីន​​មួយចំនួនរួមមាន​ ប្រេងរំអិលម៉ាក់ NOVA 2T (1L) ចំនួន ៤៩១ កំប៉ុង និង NOVA 2T (0,5L) ចំនួន ៧៧១ កំប៉ុង (សរុប N​OVA 2T ចំនួន ១,២៦២ កំប៉ុង)។ ប្រេងរំអិលម៉ាក់ TRA CHANG (3L) ចំនួន ២៨០​៨ TRA CHANG (6L) ចំនួន ២៧៨ ប៊ីដុង (សរុបប្រេង​រំអិលម៉ាក TRA CHANG ចំនួន ៣,០៨៦ ប៊ីដុ​ង)។

ក្រោយបញ្ចប់ប្រតិបត្តិការ កម្លាំងជំនាញសម្រេចដូកហូត និងបញ្ជូ​នសម្ភារៈទាំងអស់យកទៅរក្សាទុកនៅស្នងការដ្ឋាននគរបាលខេត្តកំពង់ស្ពឺ បណ្ដោះអាសន្ន​ និងដំណើរការនីតិវិធីលើម្ចាស់ទីតាំង​ឈ្មោះ ហេង សុខជា​ សាកសួរ​តាម​នីតិវិធី​ច្បាប់​៕