រដ្ឋពន្លឿននិតិវិធីគម្រោងវិនិយោគវិស័យថាមពលអគ្គិសនី និងរ៉ែ

រាជរដ្ឋាភិបាលកម្ពុជាបានជំរុញនិតិវិធីក្នុងការសិក្សាគម្រោងវិនិយោគ     វារីអគ្គិសនី, គម្រោង​ថាមពល​​ដើរ​​​ដោយ​ខ្យល់ និង​គម្រោង​ថាមពលដើរដោយ​ពន្លឺព្រះអាទិត្យឱ្យកាន់​តែ​មាន​ប្រសិទ្ធ​ភាព សំដៅធ្វើយ៉ាងណាឱ្យការផលិតថាមពលដើម្បីឆ្លើយតបទៅនឹងកំណើននៃតម្រូវការ។

ការជំរុញបែបនេះ បានធ្វើឡើងក្នុងកិច្ចប្រជុំចង្អៀតមួយរវាងលោក កែវ​ រតនៈ​ រដ្ឋមន្រ្តី​ក្រសួងរ៉ែ​ និងថាមពល ជាមួយលោក អ៊ាង សុផល្លែត រដ្ឋមន្ត្រីក្រសួងបរិស្ថាន កាលពីព្រឹកថ្ងៃទី ២៣​ ខែកក្កដា ឆ្នាំ ២០២៤ នៅទីស្ដីការក្រសួងបរិស្ថាន។

លោក​ កែវ​ រតនៈ​ រដ្ឋមន្រ្តី​ក្រសួងរ៉ែ​ និងថាមពល បានឱ្យដឹងថា កិច្ចប្រជុំនេះ ធ្វើឡើងដើម្បីជំរុញ​ការអភិវឌ្ឍប្រទេស ដោយ​បំពេញនូវថាមពលអគ្គិសនីឱ្យបានគ្រប់គ្រាន់ និងមិនចំណាយ​ពេល​ច្រើន ដែលមានការកំណត់នូវតម្លៃ ក្នុងការសិក្សាច្បាស់លាស់។

ជាមួយគ្នានេះ ថ្នាក់ដឹកនាំទាំងពីរ ក៏បានពិភាក្សា ក្នុងការជំរុញ​ឱ្យមានការវិនិយោគក្នុងវិស័យរ៉ែ ដូចវិស័យថាមពលដែរ ដើម្បី​ចូលរួមវិភាគទានក្នុងការអភិវឌ្ឍប្រទេស ប៉ុន្តែការធ្វើនេះ ក៏ត្រូវ​ធ្វើឱ្យបានត្រឹមត្រូវ ប្រកបដោយការទទួលខុសត្រូវខ្ពស់ចំពោះបរិស្ថានផងដែរ។

លោក​ កែវ​ រតនៈ​ រដ្ឋមន្រ្តីក្រសួងរ៉ែ​ និងថាមពលមានប្រសាសន៍​ បានលើកឡើងកាល​ពីពេលថ្មីៗនេះថា រដ្ឋាភិបាលកម្ពុជាបានប្តេជ្ញាចិត្តក្នុងការបង្កើន​ប្រភពថាមពល​កកើតឡើងវិញឱ្យបាន ៧០% នៅឆ្នាំ២០៣០​ ដើម្បីដោះស្រាយបញ្ហាការប្រែប្រួលអាកាស​ធាតុ។

នៅក្នុងរយៈពេល ៣ ឆ្នាំ ខាងមុខ ​គឺអាចមានការប្រឈមកង្វះថាមពលអគ្គិសនី ​ដែលរដ្ឋាភិបាលត្រូវដោះស្រាយបញ្ហាចំនួន ៣ គឺបញ្ហាទី១ ការរក្សាថ្លៃ​ថាមពល​អគ្គិសនីកុំឱ្យឡើង ទី២ ដោះស្រាយបញ្ហាផ្គត់ផ្គង់អគ្គិសនីកុំឱ្យខ្វះ និងទី៣ គឺចង់​បង្កើនថាមពលបៃតងឱ្យបានច្រើន។​

បច្ចុប្បន្នកម្ពុជាមានថាមពលបៃតងប្រមាណ ៦២% ខណៈរដ្ឋាភិបាលចង់ឱ្យបង្កើនដល់ជាង ៧០% មុនឆ្នាំ ២០៣០ ដើម្បីការពារបរិស្ថាន និងយក​ថាមពល​បៃតងក្នុងការទាក់ទាញការ​វិនិយោគ​ពីក្រៅ​ប្រទេសមកបង្កើតការងារ​ឱ្យពលរដ្ឋខ្មែរ៕

អត្ថបទ៖ ឡេង ដេត