ព័ត៌មានអន្ដរជាតិ

ឥណ្ឌាសម្លឹងបង្កើនការវិនិយោគផ្ទាល់ពីចិន ទោះបីមានជម្លោះនយោបាយ

បានផុស

៨ ខែ មុន

នៅ

ថ្ងៃព្រហស្បតិ៍ ២៥ កក្កដា ២០២៤

ដោយ

ឥណ្ឌាមានបំណងចង់បង្កើនការវិនិយោគផ្ទាល់ពីបរទេស (FDI) ពីចិន បើទោះបីជាទំនាក់ទំនងនយោបាយរវាងប្រទេសទាំង២ ស្ថិតនៅក្នុងភាពទ្រុធទ្រោម ក្រោយការប៉ះទង្គិចគ្នាផ្នែកយោធាតាមបណ្ដោយព្រំដែនក្នុងឆ្នាំ ២០២០ ក៏ដោយ។ នេះបើតាមការចុះផ្សាយរបស់សារព័ត៌មាន Investment Monitor កាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទបង្ហាញស្ដីពីការស្ទង់មតិសេដ្ឋកិច្ចប្រចាំឆ្នាំរបស់ឥណ្ឌា រដ្ឋមន្ត្រីក្រសួងហិរញ្ញវត្ថុរបស់ប្រទេសនេះ លោក Nirmala Sitharaman បានមានប្រសាសន៍ថា៖ «ឥណ្ឌាប្រឈមមុខនឹងជម្រើស២ដើម្បីទទួលបានអត្ថប្រយោជន៍ពីយុទ្ធសាស្រ្ត ចិន+១៖ ឥណ្ឌាអាចសមាហ័រណទៅក្នុងខ្សែសង្វាក់ផ្គត់ផ្គង់របស់ចិន ឬលើកកម្ពស់ FDI ពីប្រទេសចិន»។

ដោយមើលឃើញពីឱនភាពពាណិជ្ជកម្មដ៏ធំជាមួយចិន លោក Sitharaman បាននិយាយថា ការបង្កើន FDI នឹងជំរុញការនាំចេញរបស់ឥណ្ឌាទៅកាន់សហរដ្ឋអាមេរិក។

គួរគូសបញ្ជាក់ថា ឥណ្ឌាត្រូវការការវិនិយោគ FDI ដើម្បីបង្កើនសមត្ថភាពផលិតរបស់ខ្លួន ដែលជាគោលដៅមួយរបស់រដ្ឋាភិបាល។ បច្ចុប្បន្ន វិស័យផលិតកម្មរួមចំណែក ១៧ ភាគរយនៃសេដ្ឋកិច្ចរបស់ឥណ្ឌា ហើយប្រទេសមានគោលដៅឱ្យវិស័យនេះរួមចំណែកដល់ ២៥ ភាគរយ នៅឆ្នាំ ២០២៥។

គេមើលឃើញថា ទំនាក់ទំនងរវាងចិន និងឥណ្ឌា បានក្លាយទៅជាជូរចត់ក្រោយជម្លោះព្រំដែនក្នុងឆ្នាំ ២០២០ ដែលសម្លាប់ទាហានឥណ្ឌា ២០ នាក់ និងចិន ៤ នាក់។ បន្ទាប់ពីហេតុការណ៍នោះ រដ្ឋាភិបាលឥណ្ឌា បានបញ្ចេញវិធានការប្រឆាំងនឹងចិនជាច្រើន រួមទាំងការបិទកម្មវិធីទូរស័ព្ទចិនជាង ៣០០ ការដំឡើងពន្ធលើក្រុមហ៊ុនចិន និងការរឹតបណ្ដឹងធ្ងន់ធ្ងរលើការវិនិយោគរបស់ចិនណាមួយជាដើម។ ជាលទ្ធផល ការវិនិយោគពីចិនទៅក្នុងប្រទេសឥណ្ឌា បានធ្លាក់ចុះយ៉ាងគំហុក។

យ៉ាងណាមិញ អ្នកវិភាគមើលឃើញពីរបត់នៃគោលនយោបាយរបស់រដ្ឋាភិបាលឥណ្ឌា ដើម្បីជំរុញសេដ្ឋកិច្ចក្នុងស្រុក។ តម្រូវការផ្នែកបច្ចេកវិទ្យា និងអ្នកជំនាញរបស់ចិនបានកើនឡើង ដោយសារតែភាពចាំបាច់ ដើម្បីពង្រីកវិស័យផលិតកម្ម។ ក្នុងឆ្នាំ ២០២៣-២០២៤ ចិនបានវ៉ាដាច់អាមេរិក ហើយក្លាយជាដៃគូពាណិជ្ជកម្មកំពូលរបស់ឥណ្ឌាជាថ្មី៕