សេដ្ឋកិច្ច

កម្ពុជារកចំណូលបាន $១,៧ ពាន់លាន ពីទេសចរអន្តរជាតិ កើនឡើង ៧%

បានផុស

៥ ខែ មុន

នៅ

ថ្ងៃសុក្រ ២៦ កក្កដា ២០២៤

ដោយ

នៅក្នុងឆមាសទី១ ឆ្នាំ ២០២៤ កម្ពុជារកចំណូលបានប្រមាណ ១,៧ ពាន់លានដុល្លារ ពីទេសចរអន្តរជាតិ មានកើនឡើង ៧% ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់ធនាគារជាតិនៃកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមធនាគារជាតិ វិស័យទេសចរណ៍នៅរយៈពេល ៦ ខែ ឆ្នាំ ២០២៤ មានកំណើនល្អ ទាំងភ្ញៀវទេសចរអន្តរជាតិ និងទេសចរក្នុងស្រុក ដោយសារភាពប្រសើរឡើងនៃសេដ្ឋកិច្ចក្នុងតំបន់ និងសកល ការកសាងហេដ្ឋារចនាសម្ព័ន្ធផ្លូវថ្នល់ និងអាកាសយានដ្ឋានអន្តរជាតិ គួបផ្សំនឹងការតភ្ជាប់ជើងហោះហើរជាមួយប្រទេសនានា បានរួមចំណែកទាក់ទាញភ្ញៀវទេសចរអន្តរជាតិប្រមាណ ៣,១៦ លាននាក់។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) បានឱ្យដឹងថា កំណើនភ្ញៀវទេសចរបរទេស មានកំណើនតិចតូច មិនទាន់មានសញ្ញាវិជ្ជមានច្រើនគួរឱ្យកត់សម្គាល់នោះទេ។ ហើយថា តួលេខដែលកើនឡើងភាគច្រើន គឺការឆ្លងកាត់ព្រំដែននៅប្រទេសថៃ និងវៀតណាម ដែលទេសចរចូលមកលេងរយៈពេលខ្លីហើយត្រឡប់ទៅវិញ។

ក្នុងចំណោមទេសចរជាង ៣,១៦ លាននាក់ទេសចរថៃឈរនៅលំដាប់លេខរៀងទី ១ មានចំនួន ៩៥៥ ២៥០ នាក់ កើន ៩,៧% វៀតណាមចំនួន ៦៣៩ ៥៤៩ នាក់ កើន ៣៨% ចិន ៣៨៩ ៣៦០ នាក់ កើន ៤៥,២% ឡាវ ១៨៨ ៧២៦ កើន៣៤,៤% អាមេរិក ១១២ ០៤៣ កើន ១៥,៧%។

ក្រសួងទេសចរណ៍បានឱ្យដឹងថា ក្នុងឆមាសទី១ ភ្ញៀវទេសចរបរទេសចំនួន ៥២១ ៩៥០ នាក់ បានទិញសំបុត្រចូលទស្សនារមណីយដ្ឋានអង្គរ មានការកើនឡើង ៣៥,៣០ ភាគរយ ខណៈប្រាក់ចំណូលទទួលបានពីការលក់សំបុត្រចំនួន ២៤ ៣៥៧ ៦៩៥ដុល្លារ កើន ៣៦,២៥ ភាគរយ។ នៅឆ្នាំ ២០២៣ ទឹកប្រាក់បានពីភ្ញៀវទេសអន្តរជាតិចំនួន ៣,០៨ ពាន់លានដុល្លារ កើន ៨៧,៥ ភាគរយ៕

អត្ថបទ៖ ឡេង ដេត