ព័ត៌មានអន្ដរជាតិ

ថៃគ្រោងចេញវិធានការលើកទឹកចិត្តវិនិយោគ សម្រាប់ក្រុមហ៊ុនផលិតរថយន្តកូនកាត់

បានផុស

៦ ខែ មុន

នៅ

ថ្ងៃសៅរ៍ ២៧ កក្កដា ២០២៤

ដោយ

ក្រុមប្រឹក្សាភិបាលនៃការវិនិយោគថៃ (BOI) បានឱ្យដឹងកាលពីថ្ងៃសុក្រថា មជ្ឈមណ្ឌលផលិតរថយន្តក្នុងស្រុកថៃ នឹងដាក់ជូនការលើកទឹកចិត្តវិនិយោគសម្រាប់ក្រុមហ៊ុនផលិតរថយន្តកូនកាត់ (សាកភ្លើង និងស៊ីសាំង) ដោយបន្ទាបពន្ធសម្រាប់រថយន្តកូនកាត់ចាប់ពីឆ្នាំ ២០២៨ ដល់ឆ្នាំ ២០៣២។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គលេខាធិកា BOI លោក Narit Therdsteerasukdi បាននិយាយអំពីប្រភេទរថយន្តកូនកាត់ថាជា «បច្ចេកវិទ្យាដ៏សំខាន់មួយនៅក្នុងការផ្លាស់ប្តូរទៅកាន់រថយន្តអគ្គិសនី (EVs)»។

លោកបន្ថែមយ៉ាងដូច្នេះថា៖ «ប្រទេសថៃមានសមត្ថភាពក្លាយជាអ្នកផលិតរថយន្តកូនកាត់ដ៏សំខាន់ ហើយការគាំទ្រដល់ការផលិតរថយន្តកូនកាត់ នឹងជួយរក្សាផលិតកម្មគ្រឿងបន្លាស់រថយន្ត»។ លោកថា វិធានការលើកទឹកចិត្ត រំពឹងថានឹងទាក់ទាញការវិនិយោគចំនួន ៥០ ប៊ីលានបាត (១,៣៩ ប៊ីលានដុល្លារ)។

BOI បាននិយាយថា ពន្ធអាករសម្រាប់ក្រុមហ៊ុនផលិតរថយន្តកូនកាត់ នឹងបន្ទាបរយៈពេល ៥ ឆ្នាំ ចំពោះក្រុមហ៊ុនណាដែលដាក់ការវិនិយោគយ៉ាងហោចណាស់ ៣ ប៊ីលានបាតក្នុងរយៈពេល ៤ ឆ្នាំខាងមុខ ហើយដាក់បញ្ជូលគ្រឿងបន្លាស់ថៃចូលទៅក្នុងផលិតកម្មរថយន្តរបស់ខ្លួន។

គួរគូសបញ្ជាក់ថា ថៃគឺជាមជ្ឈមណ្ឌលក្នុងតំបន់សម្រាប់ការផលិតរថយន្ត និងជាមូលដ្ឋាននាំចេញសម្រាប់ក្រុមហ៊ុនផលិតរថយន្តកំពូលៗមួយចំនួនរបស់ពិភពលោក រួមទាំង Toyota និង Honda ផងដែរ។ ការវិនិយោគថ្មីៗពីក្រុមហ៊ុនផលិតរថយន្តអគ្គិសនីរបស់ចិនដូចជា BYD (Build Your Dreams) និង Great Wall Motor កំពុងធ្វើឱ្យឧស្សាហកម្មរថយន្តថៃកាន់តែមានការប្រកួតប្រជែងទៅៗ៕