ចិនផ្ដល់ជំនួយច្រើនជាងគេ ក្នុងការស្ដារ និងអភិវឌ្ឍហេដ្ឋារចនាសម្ព័ន្ធអគ្គិសនីនៅកម្ពុជា

លោក កែវ រតនៈ រដ្ឋមន្ត្រីក្រសួងរ៉ែ និងថាមពល នៅថ្ងៃទី ២៧ ខែកក្កដា ឆ្នាំ ២០២៤ បាន​ជួប​សម្ដែង​ការគួសមរសម និងភាក្សាការងារជាមួយលោក លោកWang Wenbin ឯកអគ្គ​រដ្ឋទូត​ថ្មី​ប្រទេស​ចិន។

នៅក្នុងជំនូបនោះ លោក កែវ រតនៈ រដ្ឋមន្ត្រីក្រសួងរ៉ែ និងថាមពលបានថ្លែងថា ប្រទេសចិន បាន​និងកំពុងផ្តល់ជំនួយច្រើនជាងគេក្នុងការស្តារ និងអភិវឌ្ឍហេដ្ឋារចនាសម្ព័ន្ធអគ្គិសនី​កម្ពុជា​ក្រោយសង្គ្រាម ធ្វើឱ្យកម្ពុជាក្លាយជាប្រទេសដែលភ្ជាប់អគ្គិសនីជូ​នប្រជាជនលឿនជាង​គេបំផុត​មួយក្នុងពិភពលោក។ ភាគីទាំងពីរ ប្តេជ្ញាពង្រឹងកិច្ចសហការបន្ថែមដើម្បីធ្វើឱ្យកម្ពុជាមាន​ថាមពល​បៃតងកាន់តែខ្ពស់មុនឆ្នាំ២០៣០។

រាជរដ្ឋាភិបាលកម្ពុជាបានជំរុញនិតិវិធីក្នុងការសិក្សាគម្រោងវិនិយោគ     វារីអគ្គិសនី, គម្រោង​ថាមពល​​ដើរ​​​ដោយ​ខ្យល់ និង​​​គម្រោង​​​ថាមពលដើរដោយ​ពន្លឺព្រះអាទិត្យឱ្យកាន់​តែ​មាន​ប្រសិទ្ធ​ភាព សំដៅធ្វើយ៉ាងណាឱ្យការផលិតថាមពលដើម្បីឆ្លើយតបទៅនឹងកំណើននៃតម្រូវការ។

បច្ចុប្បន្នកម្ពុជាមានថាមពលបៃតងប្រមាណ ៦២% ខណៈរដ្ឋាភិបាលចង់ឱ្យបង្កើនដល់ជាង ៧០% មុនឆ្នាំ ២០៣០ ដើម្បីការពារបរិស្ថាន និងយក​ថាមពល​បៃតងក្នុងការទាក់ទាញការ​វិនិយោគ​ពីក្រៅ​ប្រទេសមកបង្កើតការងារ​ឱ្យពលរដ្ឋខ្មែរ៕

អត្ថបទ៖ ឡេង ដេត