រាជរដ្ឋាភិបាល ត្រៀមលក្ខណៈរួចរាល់ ថ្ងៃបើកការដ្ឋានព្រែកជីកហ្វូណនតេជោ

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងនៅថ្ងៃទី ២៩ ខែ​កក្កដា នេះថា គណៈកម្មការទាំងអស់បានត្រៀមលក្ខណៈរួចរាល់ហើយ ដើម្បីរៀបចំពិធីបើក​ការដ្ឋានគម្រោងព្រែកជីកហ្វូណនតេជោនៅថ្ងៃទី ០៥ ខែសីហា ឆ្នាំ ២០២៤ ខាងមុខនេះ។

លោក ផន រឹមថ្លែងថា៖ «គណៈកម្មការទទួលខុសត្រូវតាមមុខព្រួញនីមួយៗទាំងអស់ នៃ​គម្រោងបើកការដ្ឋាន​សាង​សង់​ព្រែកជីកហ្វូណតេជោជាផ្លូវការ នៅថ្ងៃទី ០៥ ខែសីហា ឆ្នាំ ២០​២៤ គឺគ្រប់គណៈកម្មការទាំងអស់​បានត្រៀម​លក្ខណៈ​​រួចរាល់​ហើយ»។

គម្រោងព្រែកជីកហ្វូណនតេជោដែលជា ផ្លូវទឹកថ្មីទៅកាន់សមុទ្រនេះ មានប្រវែង ១៨០គីឡូម៉ែត្រ ចាប់ពីព្រែកតាកែវ នៃទន្លេមេគង្គ ឆ្លងកាត់ខេត្ត ៤ រួមមាន៖ ខេត្តកណ្តាល តាកែវ កំពត និងខេត្តកែប។

ផ្លូវទឹកនេះ មានទទឹងមុខកាត់ផ្នែកខាងលើប្រវែង ១០០ម៉ែត្រ និងមុខកាត់ផ្នែកខាងក្រោម ប្រមាណ៨០ម៉ែត្រ និងជម្រៅទឹកប្រមាណ ៥,៤ម៉ែត្រ។

គម្រោងព្រែកជីកហ្វូណនតេជោនឹងត្រូវបើកការដ្ឋាននៅថ្ងៃទី៥ ខែសីហា ឆ្នាំ២០២៤​ខាង​មុខនេះ ក្រោមអធិបតីភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី៕

អត្ថបទ៖ ឡេង ដេត