សេដ្ឋកិច្ច

ក្រុមហ៊ុនជប៉ុនប្រមាណ ៥០០ កំពុងធ្វើអាជីវកម្មនៅកម្ពុជា

បានផុស

៨ ខែ មុន

នៅ

ថ្ងៃអង្គារ ៣០ កក្កដា ២០២៤

ដោយ

លោក ហ្វូគុហារ៉ា ខូជិ (FUKUHARA KOJI) ប្រធានសមាគមធុរកិច្ចជប៉ុនប្រចាំកម្ពុជាបានឱ្យដឹងថា ក្រុមហ៊ុនជប៉ុនសរុបប្រមាណ ៥០០ កំពុងធ្វើការវិនិយោគនៅកម្ពុជា ក្នុងនោះក្រុមហ៊ុនដែលចូលជាសមាជិកសមាគម (JBAC) មានចំនួន ២៥០ ក្រុមហ៊ុន និងក្រុមហ៊ុនផ្សេងទៀត ដែលបានធ្វើការវិនិយោគក្នុងវិស័យផលិតកម្មប្រមាណ ២៣ ភាគរយ និងផ្នែកសាងសង់ប្រមាណ ២០ ភាគរយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងបទសម្ភាសន៍ជាមួយកម្ពុជាថ្មី លោក ហ្វូគុហារ៉ា ខូជិ បានលើកឡើងថា កម្ពុជាមានសក្ដានុពលច្រើនក្នុងការវិនិយោគ ខណៈក្រុមហ៊ុននៅក្នុងសមាគមរបស់លោកកំពុងធ្វើសហប្រតិបត្តិការជាមួយប្រទេសចិន វៀតណាមបូក១ និងថៃបូក១ ផងដែរ។

លោក ហ្វូគុហារ៉ា ខូជិ ប្រាប់ថា សមាគមរបស់លោកតែងតែបង្កើតបរិយាកាស ដូចជាការពិភាក្សាជាមួយរាជរដ្ឋាភិបាលដើម្បីបង្កើតបរិយាកាសធុរកិច្ចឱ្យកាន់តែប្រសើរទាក់ទាញការវិនិយោគ។

លោក ហ្វូគុហារ៉ា ខូជិ បានឱ្យដឹងទៀតថា តម្លៃអគ្គិសនីនៅកម្ពុជា អាស្រ័យទៅតាមប្រភេទនៃការធ្វើអាជីវកម្មរបស់ក្រុមហ៊ុន ប៉ុន្តែពាក់ព័ន្ធនឹងរោងចក្រផ្នែកឧស្សាហកម្ម អាចនិយាយបានថា ជាតម្លៃមួយថ្លៃសម្រាប់ពួកគាត់។

លោក ហ្វូគុហារ៉ា ខូជិ បានបញ្ជាក់ថា សមាគមរបស់លោកកំពុងរកវិធីជំរុញការវិនិយោគពីជប៉ុនមកកម្ពុជាបន្ថែមទៀត ខណៈវិស័យកសិកម្មគឺកម្ពុជានាំចេញផលលិតផលមិនទាន់កែច្នៃទៅកាន់ប្រទេសថៃ និងវៀតណាម ដើម្បីកែច្នៃបន្ត និងនាំចេញទៅកាន់ពិភពលោក។

លោកថា ចំណុចនេះ មានសារសំខាន់ក្នុងការទាក់ទាញវិនិយោគិនជប៉ុនមកកម្ពុជា ក្នុងការកែច្នៃកសិផលទាំងនោះ ឱ្យទទួលបានតម្លៃបន្ថែម ដើម្បីនាំចេញទៅពិភពលោកផងដែរ។

យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) នៅក្នុងឆមាសទី១ ឆ្នាំ ២០២៤ ពាណិជ្ជកម្មទ្វេភាគីកម្ពុជា-ជប៉ុនសម្រេចបានទឹកប្រាក់ជាង ៩៥០ លានដុល្លារ កើនឡើង ១០,៥%។

ការនាំចេញរបស់កម្ពុជា សម្រេចបានទឹកប្រាក់ជាង ៦០០ លានដុល្លារកើនឡើង ១៥,៤%។ ចំណែកឯការនាំចូលមកវិញ មានទំហំទឹកប្រាក់ជាង ៣២១ លានដុល្លារ កើនឡើង ២ ភាគរយ។

នៅឆ្នាំ ២០២៣ ពាណិជ្ជកម្មទ្វេភាគីកម្ពុជា-ជប៉ុនសម្រេចបានជាង ១,៧៩ ពាន់លានដុល្លារ ធ្លាក់ចុះ ៧,២ ភាគរយ៕