ព័ត៌មានអន្ដរជាតិ

ប្រជាជនថៃ រិះគន់ និងគំរាមពហិការក្រុមហ៊ុន Apple ជុំវិញវិដេអូពាណិញ្ជកម្មបង្ហាញប្រទេសថៃដូចសម័យចាស់

បានផុស

៦ ខែ មុន

នៅ

ថ្ងៃពុធ ៣១ កក្កដា ២០២៤

ដោយ

ប្រជាជនថៃនាំគ្នារិះគន់ និងគំរាមធ្វើពហិការក្រុមហ៊ុនបច្ចេកវិទ្យាយក្ស Apple ក៏ដូចជាបោះចោលទូរស័ព្ទម៉ាក iPhone របស់ពួកគេ ហើយប្ដូរទៅប្រើផលិតផលរបស់ក្រុមហ៊ុន Samsung វិញ ជុំវិញវិដេអូពាណិជ្ជកម្មចុងក្រោយរបស់ Apple ដែលបង្ហាញប្រទេសថៃដូចនៅសម័យរាប់សិបឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការចុះផ្សាយរបស់កាសែតក្នុងស្រុកថៃ The Thaiger វិដេអូពាណិជ្ជកម្មរបស់ Apple បង្កការរិះគន់ទាំងប្រជាជនធម្មតា ក៏ដូចជាអ្នកមានឥទ្ធិពលលើបណ្ដាញសង្គមក្នុងស្រុកថៃធំៗ តួយ៉ាងដូចជាគ្រូបង្រៀនភាសាអង់គ្លេស លោក David William ដែលមានអ្នកគាំទ្រលើបណ្ដាញសង្គម Facebook ចំនួន ១,៦ លាន និង TikTok ចំនួន ៣ លាន។

វិដេអូរិះគន់របស់លោក William លើពាណិជ្ជកម្មរបស់ Apple ដែលមានចំណងជើងថា «The Underdogs: OOO (Out Of Office) | Apple at Work» បានទាញអ្នកចូលមើលច្រើនជាង ១៧ លានដង និងការបញ្ចេញមតិរាប់ម៉ឺន ដែលយល់ស្របស្រដៀងនឹងលោក ក៏ដូចជាបង្ហាញការគាំទ្រលើផលិតផលស្មាតហ្វូនរបស់ក្រុមហ៊ុន Samsung។

ទាំងលោក William និងអ្នកប្រើអ៊ិនធឺណិតថៃជាច្រើន ខឹងនឹងរបៀបដែលក្រុមហ៊ុន Apple បង្ហាញផ្សព្វផ្សាយអំពីប្រទេសថៃ។ ថ្វីត្បិតតែពាណិជ្ជកម្មនោះថតនៅប្រទេសថៃ និងបង្ហាញអំពីអត្តសញ្ញាណថៃដូចជាអាហារ សម្លៀកបំពាក់ និងការដឹកជញ្ជូនសាធារណៈក៏ដោយ ក៏ពណ៌បែបហួសសម័យរបស់វិដេអូពាណិញ្ជកម្ម បង្ហាញថាថៃជាប្រទេសក្រីក្រដែរ។

ក្នុងពាណិជ្ជកម្ម ដែលមានរយៈពេលពេល 9 នាទី និង ៥៧ វិនាទី ក្រុមហ៊ុន Apple បាននិយាយអំពីក្រុម «Underdogs» ដែលធ្វើដំណើរជំនួញទៅថៃដើម្បីស្វែងរករោងចក្រវេចខ្ចប់ថ្មី។ ពាណិជ្ជកម្មដដែល មានភ្ជាប់ជាមួយនឹងផលិតផលរបស់ Apple រួមមាន Mac, iPhone, iPad និង Apple Vision Pro ខណៈបង្ហាញពីមុខងារផ្សេងៗរួមទាំងការដោះស្រាយឧបសគ្គភាសា ដូចជាការបកប្រែថៃ-អង់គ្លេសជាដើម។

ប៉ុន្តែអ្នកប្រើអ៊ិនធឺណិតថៃ បានរិះគន់ថា ការកែសម្រួលពណ៌ សំលៀកបំពាក់ គ្រឿងប្រើប្រាស់ និងយានជំនិះ ដែលមានក្នុងពាណិជ្ជកម្ម សុទ្ធតែបង្កើតរូបភាពដែលហួសសម័យ និងដើរថយក្រោយ។ The Thaiger ផ្សាយថា សូម្បីតែព្រលានយន្តហោះ ឡានក្រុង តាក់ស៊ី និងសណ្ឋាគារ ក៏មើលទៅបុរាណដែរ។

ប្រជាជនថៃថា ក្រុមហ៊ុន Apple ធ្វើដូច្នេះដើម្បីឱ្យប្រទេសថៃមានស្ថានភាពអាក្រក់នៅចំពោះភ្នែកទូទាំងពិភពលោក។

ក្នុងវិដេអូរិះគន់របស់ខ្លួន លោក William បាននិយាយយ៉ាងដូច្នេះថា៖ «បើធៀបនឹងឃ្លីបរបស់ Apple ផ្សេងទៀតដែលថតនៅទីតាំងផ្សេងៗដូចជាក្រុង New York ឬក្រុង Chicago មើលទៅអស្ចារ្យណាស់។ ខ្ញុំចង់សួរ Apple និងក្រុមការងាររបស់ពួកគេថា តើមានបញ្ហាអ្វី? មើលពាណិជ្ជកម្មហ្នឹងហើយ ខ្ញុំក៏ឆ្ងល់ថា តើនេះជាប្រទេសថៃកាលពី ៥០ ឬ ៧០ ឆ្នាំមុនមែន? ហេតុអ្វីបានជាគ្មានភាពទំនើបអញ្ចឹង? អ្នកមិនចាំបាច់មកប្រទេសរបស់ខ្ញុំទេ។ គ្រាន់តែរកមើលក្នុង Google ទៅ ក៏ដឹងថាថៃជាប្រទេសទំនើបដែរ»។

លោក William ដដែលបន្តថា ក្រុមហ៊ុន Apple គួរតែដឹងហើយថា ប្រជាជនថៃមានអារម្មណ៍រងម៉ាក់ងាយជុំវិញពិភពលោករួចស្រាប់ហើយ «ជនបរទេសមានទំនោររើសអើងយើងរួចហើយ។ សំណួរសួរថា តើវាចាំបាច់សម្រាប់អ្នកទៅបន្ថែមល្បើយទៀតទេ»។ លោកបន្តថា៖ «ពេលមើលងាយយើងបែបនេះ ធ្វើឲ្យយើងមើលទៅមិនល្អក្នុងក្រសែភ្នែកពិភពលោក។ ខឹងពេក ខ្ញុំចង់តែរត់ទៅទិញទូរសព្ទបត់ Samsung ភ្លាមៗ»។

ជុំវិញបញ្ហានេះ ក្រុមហ៊ុន Apple មិនទាន់បានចេញប្រតិកម្មយ៉ាងណានៅឡើយទេ៕