ទុនបម្រុងអន្តរជាតិរបស់កម្ពុជាមានរហូតដល់២០ពាន់លានដុល្លារគិតត្រឹម​ឆមាសទី១

កម្ពុជាមានទុនបម្រុងអន្តរជាតិប្រមាណ២០ពាន់លានដុល្លារគិតត្រឹមឆមាសទី១ឆ្នាំ២០២៤ ដោយមានអត្រាប្រប្រែប្រួលតិចតួច ប៉ុណ្ណោះ (-០,១%) ដោយមានប្រហាក់ប្រហែលនឹងចុងឆ្នាំ២០២៣ (២០ ប៊ីលានដុល្លារអាមេរិក)។ នេះបើយោងតាមរបាយការណ៍ចុងក្រោយរបស់ធនាគារជាតិនៃកម្ពុជា (NBC)។

NBC បានគូសបញ្ជាក់ថា៖«ការថយចុះនេះ បណ្តាលមកពីកត្តាមួយចំនួន ដូចជា ការថយចុះ នៃប្រាក់បញ្ញើរបស់រាជរដ្ឋាភិបាល ការថយចុះនៃ ប្រាក់បម្រុងកាតព្វកិច្ច និងការរងសម្ពាធពីការប្រែ ប្រួលស្ថានភាពទីផ្សារហិរញ្ញវត្ថុអន្តរជាតិ តាមរយៈ ការកើនឡើងនៃអត្រាចំណូលសញ្ញាប័ណ្ណ វិនិយោគ ដែលរងឥទ្ធិពលពីភាពមិនប្រាកដប្រជាក្នុងការ កាត់បន្ថយអត្រាការប្រាក់គោលរបស់បណ្តាធនាគារ កណ្តាលធំៗ ជាពិសេស ធនាគារកណ្តាលអាមេរិក និងធនាគារកណ្តាលអឺរ៉ុប។ ទុនបម្រុងអន្តរជាតិ មានកម្រិតខ្ពស់គ្រប់គ្រាន់ដែលស្មើនឹង ៧ខែ នៃការនាំចូលទំនិញនិងសេវានាគ្រាបន្ទាប់»។

 បើយោងតាម NBC ការវិនិយោគទុនបម្រុងអន្តរជាតិត្រូវបានអនុវត្តដោយប្រុងប្រយ័ត្ន និងមានភាពបត់បែន ខ្ពស់។ ហានិភ័យនៃការវិនិយោគត្រូវបានគ្រប់គ្រង និងតាមដានយ៉ាងហ្មត់ចត់ ​ សំដៅធានាឱ្យបាននូវការគ្រប់គ្រង ទុនបម្រុងអន្តរជាតិប្រកបដោយសុវត្ថិភាព សន្ទនីយភាព និងទទួលបានចំណូលសមស្រប។

គួររំលេចថា ការវិនិយោគលើសញ្ញាប័ណ្ណបៃតង (Green bonds) និងសញ្ញាប័ណ្ណដែលពាក់ព័ន្ធនឹង បរិស្ថាន សង្គម និងអភិបាលកិច្ច (ESC) ត្រូវបានជំរុញនិងបន្តយកចិត្តទុកដាក់ក្នុងគោលដៅចូលរួម ចំណែកលើកកម្ពស់ការអនុវត្តតាមគោលនយោបាយវិនិយោគប្រកបដោយការទទួលខុសត្រូវ ដើម្បីរក្សាបានចីរភាព សុវត្ថិភាពការវិនិយោគទុនបម្រុង និងស្របតាមនិន្នាការនៃការវិនិយោគ សកល។

NBC បានបញ្ជាក់ទៀតថា៖«ជារួម ស្ថានភាពម៉ាក្រូសេដ្ឋកិច្ចកម្ពុជាបន្តរក្សាបានស្ថិរភាពល្អ ដោយកំណើនសេដ្ឋកិច្ចបាន បន្តងើបឡើង ជាមួយនឹងកម្រិតទាបនៃអតិផរណា និងស្ថិរភាពអត្រាប្តូរប្រាក់។ សមតុល្យជញ្ជីងទូទាត់ កម្ពុជាបន្តមានអតិរេក ស្របពេលដែលទុនបម្រុងអន្តរជាតិមានកម្រិតខ្ពស់គ្រប់គ្រាន់»៕