ព័ត៌មានអន្ដរជាតិ

ថៃផ្ដោតការពង្រីកទីផ្សារផលិតផលសត្វចិញ្ចឹម និងផ្លែឈើនៅចិន ក្នុងកិច្ចប្រជុំជំរុញសម្ព័ន្ធភាពពាណិជ្ជកម្ម

បានផុស

៧ ខែ មុន

នៅ

ថ្ងៃព្រហស្បតិ៍ ១ សីហា ២០២៤

ដោយ

ប្រទេសថៃ និងចិន បានចូលរួមក្នុងកិច្ចពិភាក្សាបង្កើនកិច្ចសហប្រតិបត្តិការពាណិជ្ជកម្មផ្សេងៗ ដោយថៃផ្តោតលើការពង្រីកទីផ្សារសម្រាប់ផលិតផលសត្វចិញ្ចឹម និងផ្លែឈើរបស់ខ្លួននៅក្នុងប្រទេសចិន ខណៈស្វាគមន៍ការវិនិយោគិនរបស់ចិនលើឧស្សាហកម្មកំពុងរីកចម្រើន ដែលមានក្នុងច្រករបៀងសេដ្ឋកិច្ចភាគខាងកើតរបស់ថៃ (EEC)។ នេះបើតាមការចុះផ្សាយរបស់កាសែត បាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការពិភាក្សាគ្នា ធ្វើឡើងនៅពេលអនុរដ្ឋមន្ត្រីក្រសួងពាណិជ្ជកម្មថៃ លោក Suchart Chomklin បានចូលរួមក្នុងកិច្ចប្រជុំលើកទី៣ នៃអនុគណៈកម្មាធិការស្តីពីពាណិជ្ជកម្ម និងការវិនិយោគរវាងប្រទេសថៃ និងចិន ដោយលោកបានធ្វើជាសហប្រធានកិច្ចប្រជុំជាមួយអនុរដ្ឋមន្ត្រីពាណិជ្ជកម្មចិន លោក Li Fei កាលពីថ្ងៃអង្គារ។

កិច្ចប្រជុំដដែលធ្វើឡើងដើម្បីលើកកម្ពស់កិច្ចសហប្រតិបត្តិការពាណិជ្ជកម្មទ្វេភាគីលើផលិតផលកសិកម្ម សំដៅជំរុញការប្រកួតប្រជែងទំនិញថៃនៅក្នុងប្រទេសចិន តាមរយៈបណ្ដាញផ្សេងៗរួមទាំងកិច្ចសហប្រតិបត្តិការពាណិជ្ជកម្មអេឡិចត្រូនិក វេទិកាផ្សព្វផ្សាយពាណិជ្ជកម្ម និងការវិនិយោគ និងការតាំងពិព័រណ៍ដែលរៀបចំដោយប្រទេសទាំង២ ជាដើម។

ក្រុមមន្ត្រីថៃបានស្នើឱ្យមន្ត្រីចិនជួយសម្រួលការនាំចេញផលិតផលសត្វចិញ្ចឹម និងផ្លែឈើរបស់ថៃទៅប្រទេសចិន។ បើតាម លោក Suchart ថៃក៏អញ្ជើញអ្នកវិនិយោគចិនឱ្យចាប់ឱកាសក្នុងឧស្សាហកម្មកំពុងរីកចម្រើនផ្សេងៗផងដែរដូចជារថយន្តអគ្គិសនី ថាមពលស្អាត សេដ្ឋកិច្ចឌីជីថល បញ្ញាសិប្បនិម្មិត និងវិទ្យាសាស្ត្រ និងបច្ចេកវិទ្យាអវកាសជាដើម។ វិនិយោគិនទាំងនោះ ត្រូវបានលើកទឹកចិត្តឱ្យទាញយកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីអាស៊ាន-ចិនដែលមានស្រាប់ និងភាពជាដៃគូសេដ្ឋកិច្ចទូលំទូលាយក្នុងតំបន់។

គួរគូសបញ្ជាក់ថា ចិនគឺជាដៃគូពាណិជ្ជកម្មកំពូលរបស់ប្រទេសថៃអស់រយៈពេល ១១ ឆ្នាំជាប់ៗគ្នា។ ក្នុងឆ្នាំ ២០២៣ ទំហំពាណិជ្ជកម្មរវាងប្រទេសថៃ និងចិន មានចំនួន ១០៥ ប៊ីលានដុល្លារ ដែលធ្លាក់ចុះ ០,២២ ភាគរយ ធៀបនឹងឆ្នាំ ២០២២។ ក្នុងរយៈពេល៥ខែដំបូងនៃឆ្នាំ ២០២៤ ទំហំពាណិជ្ជកម្មរវាងប្រទេសទាំង២ បានឈានដល់ ៤៥,៧ ប៊ីលានដុល្លារ ពោលគឺកើនឡើងប្រមាណ ៤,២៤ ភាគរយ បើធៀបនឹងរយៈពេលដូចគ្នាកាលពីឆ្នាំមុន។

បាងកកប៉ុស្តិ៍បានរាយការណ៍ថា ការនាំចេញសំខាន់ៗរបស់ថៃទៅកាន់ប្រទេសចិនរួមមានផ្លែឈើស្រស់ គ្រាប់ប្លាស្ទិក កុំព្យូទ័រ និងគ្រឿងបន្លាស់ ផលិតផលកៅស៊ូ និងផលិតផលដំឡូងមី។ ការនាំចូលសំខាន់ៗពីចិនវិញ រួមមានគ្រឿងម៉ាស៊ីន ឧបករណ៍អគ្គិសនី និងគ្រឿងបន្លាស់ សារធាតុគីមី ដែកថែប និងផលិតផលដែកថែប និងគ្រឿងបន្លាស់រថយន្តជាដើម៕