ព័ត៌មានអន្ដរជាតិ

សិង្ហបុរីនឹងប្រើប្រព័ន្ធអន្តោប្រវេសន៍ដោយមិនប្រើលិខិតឆ្លងដែននៅព្រលាន Changi

បានផុស

៨ ខែ មុន

នៅ

ថ្ងៃព្រហស្បតិ៍ ១ សីហា ២០២៤

ដោយ

អាជ្ញាធរអន្តោប្រវេសន៍ និងប៉ុស្តិ៍ត្រួតពិនិត្យ (ICA) របស់សិង្ហបុរី បានឱ្យដឹងកាលពីថ្ងៃពុធ ទី ៣១ ខែកក្កដា ថា អាជ្ញាធរនឹងបើកសាកល្បងការប្រកាសអន្តោប្រវេសន៍ដោយមិនប្រើលិខិតឆ្លងដែនសម្រាប់ប្រជាជនក្នុងស្រុក និងជនបរទេសដែលមានលក្ខណៈសម្បត្តិគ្រប់គ្រាន់នៅព្រលានយន្ត Changi ចាប់ពីថ្ងៃ ៥ សីហាតទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន CNA ប្រជាជនសិង្ហបុរីដែលធ្វើដំណើរឆ្លងកាត់ព្រលាន Changi នឹងអាចធ្វើដំណើរតាមគន្លងស្វ័យប្រវត្តិដែលបានកំណត់នៅស្ថានីយអ្នកដំណើរទី៣ ដោយមិនចាំបាច់បង្ហាញលិខិតឆ្លងដែន និងគ្រាន់តែប្រើប្រាស់ប្រព័ន្ធផ្ទៀងផ្ទាត់មុខ។

ICA និយាយថា ការសាកល្បងនេះ គឺជាផ្នែកមួយនៃការសាកល្បងប្រព័ន្ធត្រួតពិនិត្យអន្តោប្រវេសន៍ដោយមិនចាំបាច់ប្រើលិខិតឆ្លងដែនថ្មី ដែលនឹងដាក់ឱ្យដំណើរការជាបណ្តើរៗសម្រាប់អ្នកដំណើរទាំងអស់ នៅគ្រប់ស្ថានីយអ្នកដំណើរ ក្នុងព្រលាន Changi នៅខែកញ្ញា និងនៅច្រកផ្លូវសមុទ្រ Marina Bay Cruise Center នៅខែធ្នូ។ ប្រព័ន្ធត្រួតពិនិត្យថ្មី អាចកាត់បន្ថយការចំណាយពេលរបស់អ្នកដំណើរ ក្នុងដំណើរការប្រកាសអន្តោប្រវេសន៍រហូតដល់ ៤០ ភាគរយ។

បើតាមអាជ្ញាធរដដែល គំនិតផ្តួចផ្តើមនេះគឺជាផ្នែកមួយនៃផែនការរបស់ ICA ក្នុងបំពាក់ប្រព័ន្ធឌីជីថលសម្រាប់ការត្រួតពិនិត្យច្រកព្រំដែន ដើម្បីសម្រួលផ្លូវអ្នកដំណើរម្នាក់ៗ និងពង្រឹងសន្តិសុខព្រំដែន។

ជាមួយគ្នានេះ ក្នុងផែនការដដែលដូចគ្នា ICA បានបន្ថែមថា ប្រព័ន្ធត្រួតពិនិត្យឃ្យូអរកូដ (QR code) នៅច្រកត្រួតពិនិត្យដីគោករវាងសិង្ហបុរី និងម៉ាឡេស៊ី ក៏នឹងដាក់ឱ្យអ្នកដំណើរតាមម៉ូតូ ប្រើប្រាស់សម្រាប់ការប្រកាសអន្តោប្រវេសន៍ចាប់ពីពាក់កណ្ដាលខែសីហានេះតទៅ។ ប្រព័ន្ធនេះ ត្រូវបានដាក់ចេញឱ្យប្រើប្រាស់សម្រាប់រថយន្តធម្មតា កាលពីថ្ងៃទី ១៩ ខែមីនា មុនពេលបន្ថែមទៅដល់អ្នកបើកបររថយន្តក្រុង នៅថ្ងៃទី ១៥ ខែមេសា៕

Related Topics:សិង្ហបុរី