គម្រោងជួសជុលផ្លូវជាតិលេខ ២៣ តម្លៃជិត ២២ លានដុល្លារ សម្រេចបាន ៥៧,៥០%

គម្រោងលើកកម្រិត ជួសជុល និងថែទាំកំណាត់ផ្លូវជាតិលេខ២៣ ចាប់ពីគល់ស្ពានកោះធំ ដល់ផ្លូវ​ជាតិ​លេខ ១៤ ឃុំពាមរាំង ស្រុកលើកដែក ខេត្តកណ្ដាល ប្រវែងជិត ២០ គីឡូម៉ែត្រ សម្រេចបាន ៥៧,៥០% បន្ទាប់ពីបើកការដ្ឋាន​សាង​សង់កាលពីថ្ងៃទី ២០ ខែមិថុនា ឆ្នាំមុន។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា គិតត្រឹមខែកក្កដា ឆ្នាំ ២០២៤ គម្រោងជួសជុលផ្លូវជាតិលេខ ២៣ ដែលមានតម្លៃ ២២ លានដុល្លារ​ក្រោមឥណទានសម្បទាន​របស់​ធនាគារអភិវឌ្ឍន៍អាស៊ី (ADB) សម្រេចបាន៥៧,៥០%។

គម្រោងលើកកម្រិតជួសជុល និងថែទាំកំណាត់ផ្លូវជាតិលេខ២៣ ក្រោមឥណទានសម្បទាន​របស់ធនាគារអភិវឌ្ឍន៍អាស៊ី​មានប្រវែង ១៩,៨៣៣គីឡូម៉ែត្រ មានចំណុចចាប់​ផ្តើម​ពីឃុំជ្រោយតាកែវ ឆ្លងកាត់ឃុំលើកដែក ស្រុកកោះធំ រហូតដល់​ឃុំពាមរាំង ស្រុកលើកដែក នៃភូមិសាស្រ្តខេត្តកណ្តាល។

គម្រោងនេះ នឹងត្រូវស្ថាបនាពង្រីក ទទឹងតួផ្លូវប្រវែង ១១ម៉ែត្រ និងក្រាលកៅស៊ូAC កម្រាស់ ៨សង់ទីម៉ែត្រ លើទទឹង តួផ្លូវប្រវែង ១០ម៉ែត្រ មានគន្លងសម្រាប់រថយន្ត និងគន្លងសម្រាប់​ទោចក្រយានធ្វើចរាចរណ៍ (២គន្លង ទៅ-មក)។

គម្រោងនេះក៏ស្ថាបនាស្ពានចំនួន ៤កន្លែង លូមូលកាត់ទទឹងផ្លូវចំនួន៣៣កន្លែង លូប្រអប់កាត់ ទទឹងផ្លូវចំនួន១៧​កន្លែង និងលូមូលអមសងខាងផ្លូវ ប្រវែង ១៥៥៨ម៉ែត្រ ព្រម​ទាំងការបំពាក់ស្លាកសញ្ញា គំនូសសញ្ញា បង្គោលគីឡូម៉ែត្រ និងបង្គោលសុវត្ថិភាព តាម​បទដ្ឋាន​បច្ចេក​ទេសផ្លូវថ្នល់​ផងដែរ៕

អត្ថបទ៖ ឡេង ដេត