ក្រុមហ៊ុនសិង្ហបុរី សិក្សាឱកាសវិនិយោគលើថាមពលស្អាតផលិតផលចេញពីស្វាយចន្ទីនៅកម្ពុជា

ប្រធានក្រុមហ៊ុន Midori Climate Partner Pte ឯកទេសផលិតកាកសំណល់ស្វាយចន្ទី ដែលមានមូលដ្ឋាននៅប្រទេសសិង្ហបុរី កាល​ពីថ្ងៃទី ០១ ខែសីហា ឆ្នាំ ២០២៤ បានជួបសមាគមស្វាយចន្ទីកម្ពុជា ដើម្បីសិក្សាឱកាស​វិនិ​យោគ​លើថាមពលស្អាត បានមកពីផលិតផលចន្ទី ឆ្ពោះទៅកាន់​ស្វាយចន្ទីសំណល់សូន្យ។

លោក អួន ស៊ីឡុត ប្រធានសមាគមស្វាយចន្ទីកម្ពុជាបានឱ្យដឹងថា ដំណើរការកែច្នៃគ្រាប់ស្វាយចន្ទីឆៅមាន ៣ ដំណាក់កាល​ទី១ យើងត្រូវការរោង​ចក្រ​កែច្នៃ ក្នុងនោះ ១ តោនគ្រាប់ចន្ទីឆៅ ទទួលបានសំបក ៧៥០ គីឡូ​ក្រាម។ ទី២ យើងត្រូវ យកសំបក ទៅគាបយកប្រេង ដោយ ៣ គីឡូក្រាមសំបក ទទួលបានប្រេងមួយគីឡូ។

ទី៣ កាកសំណល់ចុងក្រោយដែលសល់ពីគាប យកទៅឱ្យរោងចក្រទី៣ ដែលអាចកែច្នៃទៅ​ជា​កាកសំណល់សរីរាង្គ ផលិតជាជី និងធ្យូងឧស្សាហកម្ម។

លោក អួន ស៊ីឡុត បានបន្តថា ក្រុមហ៊ុនសិង្ហបុរីនេះ ជាក្រុមហ៊ុនទី៣ ដែលប្រធានក្រុមហ៊ុន​បាន​លើកសំណើរថា ប្រសិនបើកម្ពុជាអាចផ្គត់ផ្គង់សំបកចុងក្រោយ ១ ម៉ឺនតោន ក្រុមហ៊ុននឹងបើក​រោង​ចក្រផលិត ដើម្បីទ្រទ្រង់អព្យាក្រឹត្យកាបោន ហើយយកសំណល់​ទាំងអស់ពីស្វាយចន្ទី ដើម្បី​យក​មកធ្វើធ្យូងឧសហកម្ម។

លោក អួន ស៊ីឡុត បញ្ជាក់ថា លទ្ធផលផ្គត់ផ្គង់សំបកចុងក្រោយ នៅកម្ពុជានៅមានកម្រិត ដោយសារបច្ចុប្បន្ន មានតែក្រុមហ៊ុន Santana Agro Products តែមួយ ដែលបានចាប់ផ្ដើម​គាបប្រេងនៅឆ្នាំនេះ ហើយមិនដឹងថា សមត្ថភាពទទួលបានប៉ុណ្ណា ប៉ុន្តែលោក សង្ឃឹមថា ២ ឬ៣ ឆ្នាំខាងមុខ ក្រុមហ៊ុនជប៉ុន MIRATH Agri Tech អាចកែច្នៃបាន នោះនឹងនៅសល់សំបក​ហើយ​បន្ត​រុញទៅរោងចក្ររោងចក្រកែច្នៃចុងក្រោយ៕

អត្ថបទ៖ ឡេង ដេត