ព័ត៌មានអន្ដរជាតិ

តម្លៃកៅស៊ូធ្លាក់ចុះទាប ដោយសារតែភាពស្រពិចស្រពិលនៃតម្រូវការនៅចិន

បានផុស

៥ ខែ មុន

នៅ

ថ្ងៃចន្ទ ៥ សីហា ២០២៤

ដោយ

តម្លៃកៅស៊ូធម្មជាតិអន្តរជាតិ បានធ្លាក់ចុះដល់កម្រិតទាបបំផុតក្នុងរយៈពេលជាង ២ ខែ ដោយកង្វល់នៃការផ្គត់ផ្គង់ត្រូវបានបន្ធូរបន្ថយ គួបផ្សំនឹងភាពមិនច្បាស់លាស់នៃតម្រូវការនៅប្រទេសចិន។ នេះបើតាមការចុះផ្សាយរបស់កាសែត Nikkei Asia កាលពីចុងសប្ដាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃកៅស៊ូនាពេលអនាគត ម៉ាក RSS3 បានជួញដូរនៅតម្លៃ ២,១១ ដុល្លារ/គីឡូក្រាមនាពេលខ្លះ កាលពីថ្ងៃសុក្រ លើផ្សារហ៊ុន Osaka ដែលនេះជាកម្រិតទាបបំផុតរាប់តាំងពីពាក់កណ្ដាលខែឧសភា។

អ្នកជំនាញបានគូសបញ្ជាក់ថា ក្នុងប្រទេសនាំចេញកៅស៊ូធំៗរួមមានថៃ និងវៀតណាម ខែមេសា និងឧសភា ត្រូវបានចាត់ទុកខ្សត់កៅស៊ូសម្រាប់ផលិតកម្ម។ រយៈពេលខ្សត់នេះ ត្រូវបានអូសបន្លាយនៅឆ្នាំនេះដោយសារតែបាតុភូតអាកាសធាតុ អែល នីណូ ធ្វើឱ្យការចូលមកដល់នៃរដូវវស្សាត្រូវពន្យាពេល ដែលធ្វើឱ្យតម្លៃកៅស៊ូឡើងខ្ពស់ជាកម្រក្នុងខែមិថុនា។ ប៉ុន្តែឥឡូវ ការព្រួយបារម្ភនៃការផ្គត់ផ្គង់ក៏បានធ្លាក់ចុះ។

លើសពីនេះ តម្រូវការកៅស៊ូធម្មជាតិក្នុងប្រទេសចិន ត្រូវបានចុះខ្សោយដោយសារការបាត់បង់សន្ទុះនៃការលក់រថយន្ត ជាពិសេសរថយន្តអគ្គិសនី ខណៈដែលសំបកកង់រួមចំណែករហូតដល់ ៧០ ភាគរយនៃតម្រូវការកៅស៊ូធម្មជាតិ ហើយចិនគឺជាទីផ្សាររថយន្តដ៏ធំបំផុតរបស់ពិភពលោក។

អ្នកជំនាញបន្តថា ការឡើងថ្លៃនៃប្រាក់យ៉េននាពេលថ្មីៗនេះ ក៏បានរួមចំណែកដល់ការធ្លាក់ចុះតម្លៃកៅស៊ូនាពេលអនាគត ដែលប្រើប្រាក់យ៉េនក្នុងការជួញដូរផងដែរ។ ទោះជាយ៉ាងណាក៏ដោយ ទិដ្ឋភាពលេចធ្លោក្នុងទីផ្សារគឺថា តម្លៃកៅស៊ូនឹងនៅតែរឹងមាំបំផុតសម្រាប់រយៈពេលខាងមុខ៕