កម្ពុជានឹងបង្កើតក្រុមការងារដើម្បីសម្រួលដល់ធុរជនជប៉ុនដើម្បីទាក់ទាញវិនិយោគ និងជម្រុញការនាំចេញ

ប្រមុខរាជរដ្ឋាភិបាលកម្ពុជាបានណែនាំដល់បណ្តាក្រសួងឬស្ថាប័នរបស់រដ្ឋនានាបង្កើតក្រុមការងារ​ ដើម្បីសម្របសម្រួលដល់អង្គការពាណិជ្ជកម្មក្រៅប្រទេសជប៉ុន (Jetro)និងក្រុមហ៊ុន​ជប៉ុន​ក្នុងគោលបំណងដើម្បីទាក់ទាញការវិនិយោគនិង​ជំរុញការដោះដូរពាណិជ្ជកម្មរវាងប្រទេសទាំងពីរ។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី៦ខែសីហា  បានអនុញ្ញាតឲ្យ លោកស្រី Mio Kawada អនុប្រធាន​ JETROដែលបានដឹកនាំក្រុមហ៊ុនជប៉ុន​មួយចំនួនដើម្បីស្វែងរកឪកាសវិនិយោគនៅកម្ពុជា។ នៅក្នុងជំនួបនោះក៏មានការចូលរួមពី អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា (CCC) និងបណ្តាក្រុមហ៊ុនក្នុងស្រុកផងដែរ។ នេះបើយោងតាមសេចក្តីប្រកាសព័ត៌មានពី CCC។​

លោកស្រី Mio Kawada ​ បានវាយតម្លៃខ្ពស់ចំពោះកិច្ចខិតខំប្រឹងប្រែង របស់រាជរដ្ឋាភិបាលកម្ពុជា ក្នុងការធ្វើឱ្យប្រសើរឡើងនូវបរិយាកាសវិនិយោគនៅកម្ពុជា។

លោកស្រីបានថ្លែងបញ្ជាក់ថា៖« នេះជាលើកទី២ ដែលអង្គការ JETRO បានរៀបចំបេសកកម្មធុរកិច្ច នៅកម្ពុជា ដោយលើកនេះមានក្រុមហ៊ុនជប៉ុនចូលរួមចំនួន១៩ ដែលចាប់អារម្មណ៍ការវិនិយោគនៅកម្ពុជាក្នុងវិស័យផ្សេងៗ រួមទាំងលើបច្ចេកវិទ្យាបៃតង និងឥណទានកាបូន តាមរយៈបច្ចេកវិទ្យាថ្មី និងទំនើប របស់ជប៉ុន»។

សម្ដេចធិបតីបានស្វាគមន៍ការបន្តចាប់អារម្មណ៍របស់បណ្តាក្រុមហ៊ុនជប៉ុន ក្នុងការស្វែងរកនូវឱកាសវិនិយោគ និងការផ្សារភ្ជាប់ទំនាក់ទំនងជាមួយដៃគូធុរកិច្ចនៅកម្ពុជា។ ជាមួយគ្នានោះដែរ សម្តេចធិបតីបានសម្តែងនូវការគាំទ្រលើចំណាប់អារម្មណ៍របស់ក្រុមហ៊ុនជប៉ុន លើវិស័យថាមពលស្អាត និងឥណទានកាបូន ដែលមានសង្គតិភាពជាមួយគោលនយោបាយរបស់រាជរដ្ឋាភិបាលក្នុងការធានានូវការអភិវឌ្ឍប្រកបដោយចីរភាព និងការដាក់ចេញនូវទិសដៅជំរុញថាមពលស្អាតឱ្យបានដល់ ៧០% ត្រឹមឆ្នាំ២០៣០។

សម្ដេចធិបតី ក៏បានណែនាំឱ្យបង្កើតក្រុមការងារដែលមានតំណាងក្រសួង-ស្ថាប័នកម្ពុជាពាក់ព័ន្ធ ដើម្បីសម្របសម្រួលជាមួយអង្គការ JETRO និងក្រុមហ៊ុនជប៉ុនខាងលើ ក៏ដូចជាពិភាក្សាការងារបន្តលើបច្ចេកវិទ្យាបៃតង និងឥណទានកាបូន។

បើយោតាមលោក ហ្វូគុហារ៉ា ខូជិ (FUKUHARA KOJI) ប្រធានសមាគមធុរកិច្ចជប៉ុនប្រចាំកម្ពុជា​បានថ្លែងប្រាប់កម្ពុជាថ្មីកន្លងមកថា គិតមកដល់បច្ចុប្បន្នក្រុមហ៊ុន​ជប៉ុនសរុបប្រមាណ ៥០០ កំពុងធ្វើការវិនិយោគនៅកម្ពុជា ក្នុងនោះក្រុម​ហ៊ុន​ដែល​​ចូល​ជាសមាជិកសមាគម (JBAC) មានចំនួន ២៥០ ក្រុមហ៊ុន និងក្រុមហ៊ុនផ្សេងទៀត ដែលបាន​​​​ធ្វើការ​វិនិយោគ​​ក្នុង​វិស័យ​​​ផលិតកម្មប្រមាណ ២៣ ភាគរយ និងផ្នែកសាងសង់ប្រមាណ ២០ ភាគរយ។

​ លោក ហ្វូគុហារ៉ា ខូជិ បានលើកឡើងថា៖« កម្ពុជាមាន​សក្ដា​​​​នុពលច្រើនក្នុងការវិនិយោគ ខណៈក្រុមហ៊ុននៅក្នុងសមាគមរបស់លោកកំពុងធ្វើសហប្រតិបត្តិការ​ជាមួយ​ប្រទេស​​​​ចិន វៀតណាមបូក១ និង​ថៃបូក១ ផងដែរ»។

លោក ហ្វូគុហារ៉ា ខូជិ ប្រាប់ថា សមាគមរបស់លោកតែងតែបង្កើតបរិយាកាស ដូចជាការពិភាក្សា​ជាមួយ​រាជរដ្ឋាភិបាលដើម្បី​បង្កើតបរិយាកាសធុរកិច្ចឱ្យកាន់តែប្រសើរទាក់ទាញការវិនិយោគ។

លោក ហ្វូគុហារ៉ា ខូជិ បានឱ្យដឹងទៀតថា តម្លៃអគ្គិសនីនៅកម្ពុជា អាស្រ័យទៅតាមប្រភេទនៃ​ការ​ធ្វើ​​អាជីវកម្មរបស់ក្រុមហ៊ុន ប៉ុន្តែពាក់ព័ន្ធនឹងរោងចក្រផ្នែកឧស្សាហកម្ម អាចនិយាយបានថា ជា​តម្លៃ​មួយថ្លៃសម្រាប់ពួកគាត់។

 យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) នៅក្នុងឆមាសទី១ ឆ្នាំ ២០២៤ ពាណិជ្ជ​កម្ម​ទ្វេភាគី​កម្ពុជា-ជប៉ុនសម្រេចបានទឹកប្រាក់ជាង ៩៥០ លានដុល្លារ កើនឡើង ១០,៥%។​ការ​នាំ​ចេញ​របស់​កម្ពុជា សម្រេចបានទឹកប្រាក់ជាង ៦០០ លានដុល្លារកើនឡើង ១៥,៤%​។ ចំណែកឯការនាំចូលមកវិញ មានទំហំទឹកប្រាក់ជាង ៣២១ លាន​ដុល្លារ កើនឡើង ២ ភាគ​រយ។

នៅឆ្នាំ ២០២៣ ពាណិជ្ជកម្មទ្វេភាគីកម្ពុជា-ជប៉ុនសម្រេចបានជាង ១,៧៩ ពាន់លានដុល្លារ ធ្លាក់​ចុះ ៧,២ ភាគរយ៕